PUHPA HIPHEI MESSAGE

MTP GENERAL CONFERENCE (13)NA

Sabypi (Vasai), Chin State, Myanmar

12th  - 15th December 2009

MESSAGE FROM PUHPA HIPHEI Ex-MP

Kyh ei pachapa nata kyh na pachâ hrapa Mara satlia-laihsa zy, M.CH.P chhituhpa zy, râh nôpawpazy, awnano chhituhpazy, Khihlô/Vasai khih nôpaw nata zawpi a tlôpakhypa zydua nama tlah khai bao ma? Cha naoh ei na ta, nama hmo a chhuahpa chyu liata nama hlaotloh thei nawpata ei khokheina a sâh chaipa ei cha hlâ ei.

HIPHEI

Marapa he chi hropazy ta “Lakher, Shandoo” tahpazy  ta miah aw hr’ei sala keimo ta “Mara” eimâ tah zôzaw. Ahyzy ma Marapa a châ ei? Marapa cha, ei reih cheipa thei thai ta a reih cheipa ei thei thai hrapa maih he ama châ. Reih he bahtata anano hrasala eima thei thai veichâh thlahha khiahta cha chi kha pho kha eima châ. India Mara hry liata Zyhno reih nata Chapi reih alyu khai vei. Saikao reih nata Vyhtu (Zyuhphei) reih a lyu khai hra vei. Hawthai nata Vyhtu reih a lyu hra vei. Chahrasala eima reih eimâ thei veichâh thlahha. Chahawh hrata Hnaro (Kahno) reih zy, Saihthah reih zy, Zyuphei reih zy, Azyuh reih zy he thei khai na ta, amo chhao Chapi reih ama thei khai hra. He vana heta chi khapa, pho khapa châ pita, eima zydua he “Mara” tahpa heta miah a pahly khai. Chadei châ leipata, hlano mahnô-mahpaw tawhta Hla chi nano-nanopa, Lâso chi nano-nanopa a hneipa, eima hla sapa nata lâsopa zy a hly khaipa eima châ. Hla chi nano-nanopa, Hnaro ao, Potia ao, Chapi ao (Awhkhypa), Lialai-Heima ao, Zyhno ao, Tlôsai ao, Aolahpa, Pazita, Azao etc.. hnei pita, lâso zy chhao eimâ hly khai. Phôhryhpa (Custum and Tradition) alyupa châ pita lyurah-hripa eimâ chhy tyhnazy chhao â lyu rô sai.

Mongyuh (British)nah he chhazaw hrona thatihpha miah a chhotuhpa ama châna kyh liata aly tlâhpa ama châ taraw pata ama policy chhie kawpa “Divide and Rule” miah ama hmâ thlupa he cha pei ngâsâ ta, my a ru kaw aw. India nata Burma liata miah pachhaih khaiha ei ta a pei hmeihseih. India Marazy chhâ cha District sakha ry liata y pita, Burma Marazy cha District  3 liata pachhaih-pachhuahpa châ heih ei chi ta a pei via pachai. Chahrasala hnabeidypa châ vei. Nôpawzy ta, “Tilih he tily lâta alie thei ta, tily chhao tilih lâta a lie thei” tah ei ta, khizaw daihti anano chatlie kawpa heta hmaohkha ta eima y theina daihti a tlôkhei pyly aw, tahpa hnabeiseih suh vy.

Marapazy he Khazohpa ta a khokhei eih-hrahpa chi nata pho eima châ. Khizaw liata Missionary hluhpi pua ei ta, chi nata pho moh ta mission a paduapa y tlâ v’ei. Keimo Marapa saw ngâhlah he chi nata pho moh ta mission a paduapa a y chhôhpa eima châ. Kô 1905 liata Vaili mahpaw R.A. Lorrain ta London khihpi liata Lakher Pioneer Mission a padua. Lakher nata Mara cha miakhapa châ ta, atahma chhochhi cha India Constitution liata Lakher cha ‘Mara’ tahpata thlâpa a châ haw. Cha dei châ leipata India zy Burma zy British tawhta Independent ama hmô tawhna khata Foreign missionary zydua ama râh lâ amâ lie pakhua khai haw. Keimo missionaryzy deikua ama râh lâ a lie khoh vei ei. Vaili mahnô nata mahpaw zy, Vaili nô nata paw zy Mara râh liata ama luh amâ pabu khai. Tahma ama sawchanô Vaili (Violet) chhochhi cha maniah hrolâh thlahha ta, eima hry liata y ta, eima râh leilô liata a luh â pabu hra aw. Britisher a do ngâsâpazy ta eima râh leilô liata ama luh amâ pabu khaihapa he hmo thlahthlipa, yzie a hnei leipa châ thai aw vei. Marapazy châta hmosôhpa, byhna to n’awpa nata thlao eima chhih n’awpa a châ cheingei, tahpa a ngiapâ ei s’u. Chadei châ vei; eima maluh a chyh thlâ bao na ta puhpa Matlei, Puhpa Rô-u zy MP vaw tloh thei ei ta, keima chhao India râh ryureina asâh chaipa Parliament liata kô 12 chhôh MP ei vaw châ ha hra. Hezy vana heta chi vahneipa, Khazohpa khokhei eih-hrahpa châ pita, hnoh asy leipata hmiala tôh lyma a chhuah ei s’u.

Khazohpa ta miah khokhei eih-hrah ngâsâ ta chi nata pho ta miah padua ta, pahra n’awpa râh zy maniah pie ta, reihzy miah a pie.He hmosaipiepa zy he eima rei a raoh leipa sala eimâ taosao phaichai khiahta cha eima pahlei thei. Hmo rai rai he ahneituhpa ta khâsia leipa sala pasô leipata a mohôh pha leipa khiahta cha rao ta a leidia thlahha tyh. Khizaw liata chi hluhpi nata reih hluhpi a leidia haw. Thokha reizie ta cha Australia râh liata reih 200 hryta reih 135 a lei haw. India Independence tawhta atanoh taihta India râh liata reih 48 a lei hapata reipa a châ. Keimo chhao he a taosao sila, eima rei â raoh leipa khiata cha a leidia theipa eima châ hra. Reiraohna he a bohna chhaichhi pha chaipa sakha a châ. Tahma ta Mara Autonomous District Council eima hneipa hmô awpa heta 100 liata 100 rei araohpata kô 8 chhôh eima tei tawhta eima hmô. Mongyuh nawh ta “United we stand, Divided we fall” ama tahpa he â do hmeihseih. Rei eimâ raoh khiata cha a dua aw pita eimâ raoh vei khiatacha eima lei aw.

Mara Autonomous District Council eima hnei haipa he biehneina hnei chyh tu ha ta, phusa eima hmôpa chhao reikhi pha vei. Eima chi nata pho, râh leilô nata reih zy pabohsa ta hmah pasiesa n’awpa tlah châ hra vei. Chavata biehneina lai via syulyupa nata phusa hluh via syulyu eima hmô thei n’awpata kô hluhpi eima vaw tei haw. India Constitution panano awpa a byuhpa vata rairuna y ta, daihti chhao a khoh rei kaw. Tahma cha India rah liata biehneituhpazy chhao eima pahnieh ha ba. Biehneina lai viapa nata phusa hluh via eima hmô thei n’awpata lâthlôh patôhpatia haipa a châ. Chavata Delhi tly ta chadai-pazi lymapa a byuh ha chy. December noh 10pa rachhôh ta Chakma, Lai, Mara zy Delhi la eima zu heih aw. He vata ei pôhpa ei kaw la thei leipa he pei ei tah kaw. Ei pôhpa cha hlao thei vei hr’ei sala ei palôhrupa zydua cha nama hnoh- ta y ta, nama hry ta â pahlao hra tahpa na pahnokhei teh u. Eima hmo a chhuah haipa he a hlaotloh tita cha keimo nata keimo sasyh a mohôh ta hmasiena lâ pangai awpata biehneina lai kawpa eima hnei haw ba awpa dei châ leipata tahma ta District Council ta kô kha ta a hlâpa (Annual Plan) Rs. 120000000pa he Rs. 700000000 a châ ha ba aw. He heta hmialâ eima sie laih lyma n’awpa nata eima politics siekhei n’awpa kyh liata nâmo chhao keimo chhao thata maniah a bao na ta ei hnabeiseih.

Hlano Greek chyhsazy ta Politics ama chhopasiana cha soh ha chy sila; tahma daihti râh to politics a nano zie he sai tua si. Râh hla viapa thatihzy cha rei leipata India nata Burma politics zy he pachâ tua si. Burma zawpi ta Democracy vâpata a hro ei ta, politics ama siekhei ngala nota India ta cha kô 2050pa liata Super power châ â chhuah. Keimo Marapazy châta cha maniah a chadôpa chi lai viapazy tawhta eima boh nawpa he politics lai chaipa a châ awpa a châ. Eima chi nata pho, râh leilô nata reih zy chi lai viapazy tawhta pabohsa awpata thathinazy, reiraoh leinazy, a pathluana zy, tovyuh a chhunazy, aru lâta a teikhâna zy etc.. pahlei khai ta, kyhpachana, reiraohna, a chhohia thaina, a khokhei veichahna zy ta eimâ chahry-pabaoh khai awpa a byuh. Eima chhuah chaipa cha Khazohpa ta a saipata maniah a piepa eima pahrana râh leilô he pabohsa ta Mara chhâ a vaw y lai lyma awpazy châta pahrâna su pha viapa nata ngiaryh a chhih viapa râh ta tao awpa he a châ. Chavata riethei tao hualuana chôta eima hriapasa lymapa a byuh.

Khazohpa nata zawpizy zawzi ta Tipa bia tawhta MLA ei (6) tloh na ta, Deputy Speaker, Minister nata Speaker zy ei châ chhôhna khata cha my hlei v’ei na. Ei tao theipa deikua a chyh kaw. 1990 July liata India râh ryureina a sâh chaipa Parliament kô 12 chhôh a pazao na ta, 1991 liata Ministry of Surface Transport, Government of India liata Consultative Committee Member ta raopa ei châ. Marapa râh tawhta Akyab siepahlie nawpa Ti-lathloh (Inland Water way) nata tlah lâthlôh (High way) tao awpata ei pahrua. He pahruana he India ta a pyh ta 1997 liata India, Myanmar nata Maw rah vyuhtuapazy ta Rangoon liata agreement ama sign haw. Tahma cha raihria pathaopa châ ha ta, hmia liahsa eima tôh haw. Chatawhta Mara râh nata Bay of Bengal cha ti lâpi nata tlah lâthlôh ta pazaopa châ aw ta, hmasiena chi nano-nanopazy a vaw tlôkhei awpa cha a nohpahlipazy a vaw lâ pathao haw. A chyuna zie ta cha, viah râh rai rai he vâ khao aw mapi. He dei châ leipata Beinô chavah he atahmapa hlâta phahnai khei viapata hma thai a chhuah lyma aw pita, Chapi tawhta  Rezua – Gangaw  a siepahlai theina lâlai chhao tao eima chhuah aw. Hezy hlaotloh nawpa heta India sawhkha Notla rah lâ a heih tyhpa khata Nochhi lâ a heipa a chhuah ha ba ta policy thiehpa “Look East Policy” zâhkô tawh khata a hnei pathao. India ta nochhi lâ a hei a chhuahpa heta India nata Burma Marapa sawzy châta daihti thiehpa miah pahypa aw ta, hmasiena chi nano-nanopa chhaota hmialâ eima tôh lyma aw. He heta a pôhkhana pha viapazy, a chhohia thaina pha viapazy, kyhpachana pha viapazy nata a zaona pha viapazy miah a taopa cheingei aw.

Rei chiehpa hawhta Marapazy he Hla, bie nata lâso liata a hneirô kawpa châ pi ta, he eima hneirôna zy he my thlahha leipata, thai ta pabohsa eima chhuah awpa a châ. Hlano hla nata lâso a thaipa nô nata paw zy miah ama thisai khai hlana heta thyutliazy ta thai khai a chhuah suh vy. Hlano mahnô mahpawzy ta ryusôhpa maniah ama siesaipazy he eima pahlei thlahha khiatala Marapa chi nata pho he padua hmeihseih thei aw mapi. Keima pôhpa a kaw hlao thei sala cha, hla chi nano-nanopazy he cha sapa aw ei na ta lâso nanopazy ei cha pamosa awpa tlai ei. Chahrasala a khy thai mah vana. Abeipa ta daihti pha viapazy maniah a sopa awpa a hnabei seih sila.

Atanoh ta nama hmôpakhyna he pasôh ngâsâ na ta, ei tlaichhai tu vata he ary liata hlazy he ei vaw tao:

1.         Mara khaudihnieh, pawmaih zau,    (1 & 2 he Awhkhypa ao ta sa awpa)

Cheizae vazôh Vasai tlaulai le;

Mara râh he chiehchalei u la.

2.         Lôh-mao thaotle ‘ma chhâ leta,

Leri nô kha chhôh nae ‘ma lao e;

Vasai khihpi neih au chala.

3.         Arau Meirah lôh thai lie va,                     (Potia ao ta sa awpa)

Nô kha chhôhchhi Mara faw zau;

Lautlah sâzaw keh naenei pi.

A tlah ngâsâpata y chyu ula, Krismas nata 2010 Kô thiehpa chhôhkha zy nata a tlahpata nama hmâ khai awpata ei cha khokhei ngâsâ sai ei. Abeipa ta sapa nata Thlahpa liata byhna hluhpi cha pie chyu mawh ei sy.

Nama uhtapa,

Hiphei (Khaihra  paw)

Aizawl.

Mobile Phone : 9436159069