High School ei kaw kiah ha tawhta cha ei pôraoh chhaota satlia tah thei awpa he vaw châ ha hra na ta. Ahyzy hawhta ma vâ-iapa hnei awpa chhao ngâh pathlah mâh vei hr’aw sala, ei palôh-rupa ta cha laihsa hmipha ei tahpazy chhao ama y pathao ha hra.
February thla thaona liata cha ei viasa sahlao ta Class IX â pazao awpa ta â thao ha hra pi ta. School eima kaw tlôpa cha hmia pahno chiehpazy nata chyhsa thiehpazy cha vaw y hôlô ei ta. Hmia pahno thiephazy y hôlô hr’ei sala, viasa parohpazy nata atlâh kawpa ta eimâ vaw hmô heihpa cha â ly ngâsâ ha sai pi ta, tlâh-na biezy reihpa ta eima kuzy â chalyu chyu pi ta, eima thapha ngâsâ haw.
Noh nata daihtizy khô lymâ ta, nopi daihti chhao â khophie tlai cha eimâ vaw hmâh ha heih. Nohkha cha pangiasa pha leipa pi heta chanô pakha, Class VI eima kialâhpa he eima School liata Admission la awpa heta â vy ta. Eina vaw hmôpa taw nah chata thlai na vaw ngai para ta. Keima chata, “Kheihta zieta he liata ei cha hmô thlâh ha tly i..?”, tahpa ta hiahhri na ta. Ano chata, “Admission vaw la na ta, hâta heihpa tawhta ei vaw pazao hra aw”, tahpa ta thlai nâ vaw chhy hra ta. Class la heih awpa a byuhpa vâta bie hropa chhao reih hmâ khao hlei leipa ta Class chhôh lâ cha â ngia sai lilaw ha na ta. Cha hawhta School eima kialâhpa kô 2 hlei tlai hnazô eimâ tyh khao leipa nahta â hmô heih pi ta, School sâkha liata eima kiakhoh heih awpazy cha pachâ na ta, ei tha a thyu kaw nota, ngiaroh kawna chhao ei hnei thlâh ha pyly hra.
 |
| Ng.Veronica |
A hâta heihpa lia chata a reipa hawh tlaita School cha â vaw thao ha hra ta. He ei viasa, NUSA nah heta cha khatinorai ta eimâ pazi ngâthlâh tyhpa châ ta, ano nata eimâ hmô nah heta cha ahy thâ hmahta â ngiah leipa ta âly kawpa ta eimâ pakyh tyhpa a châ. He daihti lia heta cha Chanô nata Chapaw â pakyhpazy nata â pazipazy he cha chyhsazy chhaota ama diah khoh kaw tyhpa vâta chapaw ta chanô viasa hneipa he cha ama sôh kaw. Châhrasala, Nusâ deikua he cha chyhsa hropa zydua hlâta â nano patlua ta, kei châta cha a sôh hmeiseihpa a châ. Lyubie paru mawhla paryh taraw ma pi, deikuala bie ta reihpa hlâta eimâ pielyu ta eima palôh phaozie cha eima palâsa via. Chatlupo ta eimâ pazi thlâh ha tyhpa vâ chata chyhsazy chhaota maniah â ly-ua ngâthlâh ha tyh ei ta. Kei chapaw via hmâchhâh ta ei no a vaw za pâ ngâkaw no chhaota ano chata noza lei awpa nata chyhsa pachâdâh liata bua a byuh lei ziezy tlao na chho tyhpa ta eina pasyu tyh.
Nusâ he laihsa hmipha kawpa ta reih awpa chi la châ taraw vei. Anodeikua, chyhsa nainyu kawpa nata kho âpao kawpa a châ hleikhô ta, â pielyu rai ta chapaw mo ala kawpa chi he a châ. Cha hawhta kho âpao kawpa a châpa vâta Nusâ cha chapaw nah chhaota vaw khoh thei kaw sai tyh ei ta, a teituhpa chhao ama hluh thei ngâsâ ha tyh hrapa a châ. Chyhsa hropazy hleikhô ta keima viasa nah cheingei chhaota keima nata lyuhbieparu â hlâ ma pi tahpa ama pahno thlâh hapa vâta ama khona zie palâsa ngâthlâh ha tyh hra ei ta. Âmo baotuh awpa ta nata Nusâ cha teikhei awpa ta eina hrua ngâthlâh ha tyh hrapa ei a châ.
A châh viachhieta cha Viasazy hmiakha lei vâta ei viasa nahta pha ama tahzie nata amâ hnabeiseihzie zy chhao Nusâ cha ei chho ngâkaw tyh hra. Anohdeikua ahy hmahta vaw khoh beih hlei leipa ta, tlao chyhsa châta ei chhopazy cha a hie lâta vaw hâh tyh ta, “Ei khata he hmahta chyhsa hropa châ heta na chho beih khao khah y”, tahpa ta eina tah pâ ngâkaw hrapa a châ. Chyhsazy ta ama khona bie ama vaw chho tyhna châpaphaopazy chhao na pareisa khai ha tyh ta, a khoh tlâ leiziezy chhao eina chho khai ha tyh hra.
Daihtizy cha ti lohpa hawhta khô lymâ ta. Nusâ nata keima chhao â pakyh via lymâ hra pi ta, eimâ dai thei lei via lymâ hra. Hmeiseihpa ta cha Nusâ he chyhsa hropa châta a paw pakai awpa ta la pasaih tiarâh va na! Ano chhaota kyh na pachâ ta, nâ dai thei vei tahpa he â pielyu tawhta pahnothei thlâh ha na ta. Keima chhao cha hawh pyly hra. Anodeikua, viasa phapa hawhta daihti khachâ rakha tlyma â vaw pakyh tyh pi ta, eimâ vaw moh tyhpa vâna khata kyhpachâna bie he eima reih ngâh rairie khao leipa a châ hri. Reihka ta kyhpachâna bie â hlâ hra v’ei sih la, eima mopadei nata eimâ pielyu ta kyhpachâna bie nata ngâchhihna bie he eimâ hlâ ngâthlâh ha tyh.
Chanô hropa kiah liata ei ypa eina hmô khiahta la a palôh he pasa ngâsâ ha tyh ta, a hiatliana bie he khâ eina chho tyh. Ano hawh pyly ta keima chhao Nusâ ta satlia hropa kiah liata a ypa ei hmô khiahta cha ei palôh pasa ta ei hiahtlia ngâsâ ha tyh hra. Châhrasala, eima hiehâhnazy nata eima hiatlianazy chata noh he tlakhei beih leipa ta, zâlâ School eima bâh awpa nota cha palôhtlâh kawpa ta eimâ pazi lilaw thlâh ha tyh.
Eima School Compound chhôh, School pangaina Step kiah liana heta Mai-i kô buh pha ngâsâpa he y ta. Cha Mai-i kô buh nodi phana ry liana chata, â ngiatiah lei kawna chô heta atlô tuapa maih ta â hâ tyh pi ta, lailâ hropazy thâ â ngiah leipa ta noh nata daihti eimâ hmâh tyh. He Mai-i kô buh ry lia he laphôh to thlupa ta eima thâtih zy eimâ chho tyhpa a vaw châ. Anodeikua, eima palôhrupa liata eimâ vaopa, kyhpachâna bie deikua eima pakah ta reih beih leipa pi ta, pakah ta reipa hlâta a sia viapa, eimâ pielyu nata eima mopadei ta eima palâsa tyh.
Nohkha cha a my hro zydua hlâta School kia cha â thao patoh na ta, cha eimâ hâ tyh-na su Mai-i kô ry ei kaw tlôpa cha a my hro hawhta châ leipa ta. Laihsa pano he cha su liana chata â vaw tyuh thlâh ha ha ei ta. A my hropa hawh pyly chata cha su liana chata Nusâ hâ awpa chata atyuna â paryh ha hra na ta. Cha laihsa panopazy chhao chata bielôhawhpazy reih pi ta, eima pahnei ngânona chata Nusâ cha â vy ha hra ta. Cha hawhta laihsa pano kiapâh liata ei tyuh thlâh hapa eina vaw hmôpa cha a hmia he â vaw nano khai ha ta. Bie ei vâ chhopa chhao ta na palie leipa ta, School lâ cha zu syulyu ha ta. No-âh tah kawna chôta ano pazi pâna chôta School lâ cha va zu pâ ha hra na ta. Anohdeikua, Nusâ cha bie ei chhopa chhaota a phathipa ta na palie leipa ta, ei chô liata a palôh tlâh vei tahpa cha pahnothei thlâh ha na ta. A chhâpa ei hiahri ngâkaw nah chata he hawhna heta ei chô liata a hiehâhna chhâpa cha na chho ta , “Eina vaw hâ thlâh haw chi khiama tah na ta, laihsa hropa nah nata namâ vaw ly kaw bao”, tahpa ta na vaw chho thlâh ha ta.
 thao nota cha cha hawhta a vaw reipa cha ei pahnei lâta vaw chhi kaw ta, anodeikua, a palôh hmeiseihpa ta kyh eina pachâzie nata keima liata a hiatliana zie ei pahnopasia theipa vâta tlao eina palysa kaw. “Na châta ngâ ei chhih”, tahpa ta reih ngâthlâh hapazy hlâta â pielyu ta keima châta ngâ â chhizie palâsa ta, keima leipa ta chyhsa hropa a palôh liata amâ lâ leizie a phualuah tyh. Kyhpachâna nata ngâchhihna he khâchâ âzaopa a châ zie chhao ano tawhna heta a sia kawpa ta ei pahno chanei tyhpa a châ.
A kiapâh liata ei y daihti liata cha khizaw he pawh patlua tyh ta. Khazohpa hmotaopazy chhao ama rôhnazie nata chyhsapazy alyna a piezie chhao â lâ patluapa ta ei pahno tyh. Nusâ kiah liata cha khizaw chanô zydua he ama palôh pathaih khai aw ta, khochhihna zy, ngâchhina zy, areisina zy, alyna zy apietheituhpa sai khiama ama châ aw tah thei awpa he a châ tyh. Noh palo lichih chhao a kiapâh liata cha ziza chhao chakua patlua tyh ta, a hmao saih panyu kawpa ta a khu hapa, a hâh dieh kawpa â lâna taihta eina vaw pahneisao nahta chhochhi cha khizaw he keima châta taopa khiah-ma ei tah pâ ngâkaw tyh.
Nohchhô dawh 12:00 vaw paroh ta, viasa hropazy cha ama o lâ zy, thopi daoh lâ zy nata kheihawhpa su liata tlyma â pahâh awpa ta pua khai ha tyh ei ta. Keima nata Nusâ deikua su hrolâ chhao pangai hlei leipa ta Step kiapâh Mai-i kô ry lâ cha pangai tyh pi ta, cha liana chata zâlâ Class eimâ thao hlâ viata cha lâphôh to eima thlu tyhpa a châ.
Cha tlupo ta â pakyh pi ta, eimâ pazi ngâthlâh ha tyhpa vâna chata eima School kialâhpazy nata eima viasa richâhzy chhao chata maniah pakaopâpa ta maniah amâ ly-ua ngâthlâh ha tyh. Cha hawhta viasazy ta maniah amâ ly-ua tyhpa vâ chata keima cha ei kâzy vawchhie pâ kaw tyh ta. Châhrasala ei kâchhhiena nata ei nozana chata Nusâ ei pakyh n’awpa nata a kiah liata ei y n’awpa taihta la na pakhâ hlei vei.
Cha hawhta noh nata daihtizy ahmâh pi ta eimâ ly kaw nona chata kô chhâna cha vaw tlô ha heih pi ta. Final Exam zy chhao eima vaw patlô ha heih tawhta cha yna suzy pangaipa ta eimâ chhaih heih awpa vaw byuh ha hra ta. Palôh-lie kawna chôta nata â pasaih lei kawna chôta eimâ vaw chhaih h’awpa cha palôh-lie zy â chhih kaw tyh ta. Ama khih tawhta lâsie a y rypaohpa lia maih ta atlâh-na bie reihpa ta, “Nâ vaw biepa mah y”, tahpa bie he khâ eina vaw chho tyh ei.
 |
| Ng.Veronica |
Laihna suzy ananopa ta â hlapi liata chareikhoh hr’ei sih la, eima palôh pachâna cha sukha liata y ta, eima pachâna ta cha Step kiapâh, Mai-i kô ry liata cheingei liana khata eima palaokhoh tyh. Ramâ lâta ei hmô daihti liata chhao su hro liata hmô beih leipa na ta, Mai-i kô ry liata cheingei ei hmô tyhpa he, he Mai-i kô â nano patlua kawna chhao a châ hra.
Noh nata daihtizy khô lymâ ta, Lyubie ta paryh leipa kyhpachâna cha akih tlô thai awpa a châ leipa a châ thlyu aw. Nusâ chhao hrochhôh kaolâh awpa ta vahpa pha kawpa a hnei ha tahpa thâzy thei awpa vaw y ha hra ta. Dyhchâ khôpheih a kiah tawh chhaota viasa pha kawpa eima châna cha khatino ta hmahta my thei hra leipa ta, keima chhaota my thei beih hra va na. Lâsie rypaohpa ama yna châhki ta nata Phone tawh chhaota â rypaohna dâh hawhta a tlâh-na bie nata eimâ vâna bie cha eimâ hlâ ngâthlâh ha tyh.
Nohkha cha cha eima School parohpa lâ cha tao awpa peimawhpa a ypa vâta kaw chareih laih na ta. Cha School pangaina Step kô 10 hlei tlai ei chhih khao leipa liata ei sie ngâkawpa cha ei palôh he nâ lie ngâsâ ha ta. Bahta va zu via na ta, Nusâ nata eimâ pahâ tyh-na su, ‘MAI-I KÔ RY’ cha za tlô na ta. Noh hro hawhta vaw châ khao leipa ta, ziahzi ta he vaw roh thlâh ha ta. A suzy cha a ualuapa heta vaw y thlâh ha ta, Mai-i kô cheingei chhao cha âboh kawpa heta vaw y thlâh ha hra ta, eimâ tyu tyhna alô chhao chhohnazy ta ama vaw khu tahpa hleikhô cha â nano tlâ hra vei. Ananona a y chhôhpa cha Nusâ hnazô hmô awpa a y khao leipa ngâlâh he a châ. Noh nata daihti eimâ hmâkhohna zy cha mothlawpa liata a vaw lâ lymâ ta, pahno hmâ leipa heta ei mothlih cha a vaw tla ngâ kaw.
Kei la ei zâ thei khai ha tyh;
Lôhkipa ta â kaona zy,
Rainô aongia vaw khaih heih ta,
Tlâ to su to sai laih-na chô,
Hnôhlâ zaizy thâh â ngiah na”.
Story Writer : L.Beimokhai
Meisavaih, Siaha.
Story Model
Ng.Veronica
(Link he click la a profile na moh thei aw)
0 comments:
Post a Comment