MARA LOVE STORY

NÔHPI  THLÔCHHOZY VÂTA MA? 

LÔDU  NATA SIARAMAIDI   

                                                                                                                               - LB.Thatlo, Saikao                                     

                                                                                                           Story Image : NC.Elisia, Siaha.                                    

         

      Khizaw a châna hawhta chyhsapa hro liata thisai nata khâchâ âphâpâ hapa nata keimo Mara chi nata Pho lia chhaota hlâno tawhta thokha palôh liata Châ hawhrawh âphie thai khao leipa cha, Khizaw hneirôna tlaichhaina, Phosopa, Abei saw, Khihsa theipa tahpa he a châ thlyu aw, he hmo heta hmoto liata ryu maniah rei tyh ta, eima chyhsa châna taita maniah aparaopakei theipa a châ.

 Cha hawhna hra chata he chyhsa pano penawh a tlaichhai rairie kaw tlôh ei ta, ama lâthlô a po zie cha vaw palâsa aw pi ta, anodeikua ama khih châna dopa nata ama moh hmeiseihpa cha palâsa awpa âryh leipa vâta moh bi chhypa nata Khih sâkha tahpa ta ei vaw palâsapa a châ.

         Khih sâkha liata Sawchanô nô Pakha deita ama hneipa Siaramaidi nata Satlia Pakha khihsana liata âhnaipâ thlâh hapa Lôdu ama tahpa he y ei ta, a khysia ngaita kaw ei ta, khataih lâ rai siechaw hawhta ama siekho vawh khoh tyh. Laisa Siaramaidi he thyudyupa nata kho â pao kawpa, a Nôpaw ta ama mothai kawpa nata amâ palâikhei kawpa châ ta, ahmisâ hleikhôta a riarei ta chyhsa pahnie kawpa a châ. Zâchareih ama o liata Satlia hluhpi kalihpi topa ta ama charei tyh. Satlia hluhpi ta ano buakheipa ta y ei ta, veiseihpalôhhâh kawpa ta Satlia a chareipa maihta a pakypatluapa, bie a chhopatluapa tlyma hnei thai leipa ta moto âlyucho kawpa ta Satlia chareipazy cha â pakypasiah tyh.

           He laisa thyudyupa â nano zie cha a kiah liata ei 1 a y hapa ta cha a hlasai thei khao vei ei. Ei palyusapa cha râh hropa chyhsa Viahpazy ta eima râh laisa thokha sôhpaliena châta ama khopa vâta ama vaw khoh palieh thei n’awpa pachâpa ta Iahdi/Kho-iapa hmo paniesa ei ta, chanô ta chapaw ama hrukheipa hawh tlupota satliazy ta ama hrukhei.

       He chanô chhôkha penawh hrahro heta chyhsa siavo kawpa nata khitlâh liata amâ pachy ngaita kawpa Awnanopa nata khitlâh liata chyhsa hmâtlâh châ kawpa sai ama châ nota Pawhrâhpa Khotalai nata alahpinô deikua ama chhômaruh lâta chyhsa machhie nata atao thei viapa apahrua kawpa ama châ. Anodeikua Ama sawchanô Siaramaidi heta a hneirôpa saw tlyma, châthaipa tlyma. Satlia hmiphapa nata pôraoh phapa hleikhôta Abei saw tlyma apalôh liata pachâna rai hnei leipa  ta Lôdu cha atlaichhai chaipa â lyna chaipa châ thlâh ha ta, kheihawhpa rairuna rai a ypa chhaota Lôdu a y thlâh ha khiahta cha â dai tah hlâh hapa a châ. Lôdu he ahmisa pha hra vei sala chyhsa chahra-charôh kawpa, khâpa hmahta ngiaroh-na hnei leipa, kumâh sihraizy chhao thai kawpa, Chanô riarôzy âzi thai kawpa nata khiahly thai kawpa a châ.

     Ama pano heta ama palôruh chhômaruhpa liata cha a tlaichhai rairie ngaita kaw ei ta, âmo hleikhô heta khizaw hmohropa nata lailâh hropazy thâ rai angiah leipa ei ta, pati taita ama chapaoh khoh tyh. anodeikua Lôdu heta Siaramaidi he a khoh kaw nota za ngaita kaw ta, kyhpachâna deikua a hnei ngaita. Noh kha cha Lôdu â khiekhâ laih nota Siaramaidi ta ahmôpa vâta buakha ta ama o lia a pahâ chy awpa ta Lôdu cha hrua ta, Lôdu chhaota aly ngaita ta, Siaramaidi nah o kiapâh thokô sâkha liata  pavaw tlai a no dei ta sâh ngâh kaw ta, cha cha thei nahta  a chhôso liata a paveihpa biezy cha apathaopatô haw.

Lôdu :- Siaramaidi, “Pavaw sâpa cha na thei hra ma, viasa kaolâh hnei leipa ta ano deita a sâh ngâkaw e, ei ngia na chhie kaw” tahpa ta a chho.

Siaramaidi :-  “Aw tlaichuh! Kei chhao ei ngia na chhie ngaita hra” tahpa ta chho hra ta. Cha nahta Lôdu chata, Siaramaidi hnota,

Lôdu : -  “Ei ngia na chhie pachaih na cha yru kawpa ta a ypa khi na keima duasu nata alyu tu ha ta, ei ngia na chhie pachaih” tahpa ta thlai chho heih ta,Siaramaidi chata no-âh tah ngaita ta.

Siaramaidi :  Lôdu, “ Khi Pavaw sâh ngâpa khi a viasa hnota ngai n’awpa châh a pahno leipa a châ thlyu aw! Mathlaw hnei ta, a zaw sala a viasa a tlua khiahta cha hmô aw ta, a yrupa chhao pahno khao aw vei”. Khazia maw? Nâma thâlie cha keima nata y khohpa ta bie lôhawhpazy reih khoh pi ta, âtluatlâ kaw he maw! Nâma deita chhao y chi va” tahpa ta thlai â chhy ha heih hra.

Lôdu :   Siaramai, na reipa he âdo kaw! Anodeikua viasa he cha a nano via ta, Keima ta palôh tlokhu ta kyh cha pachâ na ta, na châta chhôso ei paruapa hawh-na heta keima châta na chhôsozy na paruapa thei hra la tahpa ei khoh kaw”.

Siaramaidi : Lôdu, Aw, kei cha ahy hmahta ei palôh liata rie tlâ v’ei. Nâma dei he ei palôh liata tlâ na rie tyh e, anodeikua kyhpachâna lâchhâh ta a zaona deikua nohkhihzy vaw rei via tua sala hmialâ daihtizy eimâ pahawh laih khawh..ei khapi ta achhy n’awpa dia ma ei na vaw chamy khai haw.

Lôdu : Siaramai, â do kaw, keimozy cha he hawhta vâtlâh pahnopa ta eima duasu dei châ ta, cha ngiabâh pha awpa chhao châ va na tahpa cha ei pahno thlâh tarawpa ta viasa eima châna heta ei palôh liata kyhpachâna na vaw pa-i-sapa ta kyhpachâna mei cha na vaw pa-ia ha ta, ei cha chho vei khiah ei chô liata phaohri phaohpa hawhta ei y thlâh haw. Rie na pachâthai ma y. Olâ adi awpa ta achhuah haw.

Siaramaidi : Lôdu, kho leipa lâta nata hmo anoleipa lâta rie na pachâ leipa la he hmo vâta eima likah viasa chhao rao leipa sala tahpa ei châ haw.

  Ei kha cha LYUVA KU daihti liata Awkhy Lâ pamosa awpa a châpa vâta zâhchareih ta Awkhy Lâ cha a chu tyh ei ta, He, Lâ amâ chu lichino heta Satlia hluhpi Siaramaidi vaw tlaichhaipa ta avaw chariacharâ chili ei ta, cha nota khitlâh liata châthaipa pakha Lôvah heta Siaramaidi cha a hmisâ hleikhô ta a chyhsa châna sia tahpa ta avaw khoh haw hra. Siaramai chhaota dao thei kawpa ta satliazy ta bie amâ vaw chhopa cha pahnei silina chôta thleilei hnei leipa ta bie pha kawpazy ta vaw palie lymâ hra ta, a chhôso liata deikua Lôdu cha thi thei vei.

Liahsa amâ chu khai tawhta Lôdu ta Siaramaidi cha o lâ pathlie ta, o liata chareipâ ha ta. O liata a mâ charei nota Lôdu chata chaheihpa ta Siaramaidi cha kyhpachâna bie a chho haw.

Lôdu : Siaramai, “ Zâhnia ei ramâh lia tlai cha Sadô sâkha liata Pawpi ângia ei tah ngaita kawpa nata ei mo na khuah kawpa y ta, khôsai thei leipa ta a Pawh cha sâkha ta thlie ta a roh pahnâ’pa khoh kaw na ta, kei thlie awpa ei chhuahpa cha chyhsa pakha ta chyhsa sadô liata Pawpi châ ta thlie awpa pasai v’ei tahpa ta ei nâ vaw chhy thlâh ha bao” kha Pawpi kha atano taita hmôpachhipa ta ei chhôso liata a châh ngâthlâh ha cha maw.! Kheita ma tao sala eima sadô liata ei chhei hr’aw tly tahpa ta thlai a chho.

Siaramaidi : Aw.! A châ sy châ.! cha tlu ta Pawpi ângiapa cha khâpa Pawpi rimâ maw? Khazia a hneituh penawh a phata ta chho la tlâ na hiah vei cha.

Lôdu :  Thokô sâkha liata Maitô pawh, pawh chaimâh ta, a roh a pahâhpa hleikhô ta, a pawh dâh kha nai zualuahtu ha ta, ei mo ei nakhuahpa hleikhôta ei palôh ei na chakhei kaw. Tlaichuh.! .hiah awpa cha khoh kaw taraw na ta anodeikua ama tlyhmia lia khata Pawpi hropa y leipa ta Maitô Pawh ngâlâh y ta, hiah sala na pie khoh leipa sala hmiechhie ei la tlahmaw aw” tahpa ei chitu ha hnaita ei hiah ngâh vei e.

Siaramaidi : Aw.! Lôdu, cha hawhta t’awpa châ vei, hmo na khopasa kawpa cha a hneituhpazy hnota ngiachhiena ahawpa ta na hiah khiah, cha pie leipa ta y beih aw v’ei. Ama chapie leipa chhaota hmiachhietu muarua awpa châ bao vei. Hiah hlâh ha tyh. tahpa ta thlai â chhy ha heih hra.

Lôdu : Siaramai.! He hawhta pachâ na ta, Maitô Pawpi ngia ngaita kawpa nata rohpahâh kawpa kha nâma he châ chi ta, atano taita na rohpahâhna nata nâ ngiana heta ei palôh na pakeichheih ta ei mo ei na khuah ngaita kaw tyh. Nâma dei he chanô ama cha hneichhôhpa châ chi ta, nâma nata  na nôpaw heta kheihta lôhpi ama phao sualuah aw tly? 

     kô hluhpi cha vaw pazipa ta kyh ch’aw pachâ na ta, kyh ei cha pachâna he palôh liata a keichhei thlâh hapa vâta tloh leina chôta kyhpachâna lyuhbie ei ch’aw hlâ chanei heih hih. Ngiachhiepa ta na chhôso ochhi kei châta rie na pahypa thei la ei châly kaw aw. Tahpa ta Siaramaidi hmia chhao mo ngâh leipa ta kyhpachâna lyubie cha a chho.

Siaramaidi : Lôdu, na kyhpachâna he kei châtala sôh kaw ta, a phuh va na, anodeikua he hawhpa khopa lâchhâ he hnei beih leipa na ta, pachâ n’awpa chhao pahnothai va na. Cha hleikhôta ei Nâ nata ei Pâ-zy ta miah vaw pahno ei sala  tahpa riahzy ei chi kaw e.

   

Lôdu :  A mothlih byh cha khataih lia a y tahpa pahno leipa ta ei khapi ta a raithlih cha za zô ta, Siaramaidi  ku cha thlai kei patu ta, Siaramai, na reipa zydua ei châ pyh khai anodeikua nâma chhâta eina paryhsa thei vei khiah chita la khizaw noh khaihpa chhao hmô ngâh leipa ta khizaw he pachârôh-na ta ei hmâh aw.. ngiachhiepa ta ei hawna he rie na paryhsa kaw tyh.

Siaramaidi : Lôdu a mothlih avaw pathla ha nahta cha Lôdu duasu sai thai kawna chôta a palôh cha vaw keichheih ha hra ta, Lôdu, khiahtala keima padisaihpa tlai, he hawhta kyh ei na pachâ khiah chita cha â rypa hawhta na pachâ la, anodeikua ei Nâ nata Ei Pâ zy miah pahno’pa a vaih ei sih la, nâ chhaota hrochhôh châta kyh ei na pachâ awpa chita ei khoh. tahpa ta thlai a chhy ta..

     Zâ-zy avaw rei laih hapa vâta Lôdu cha alynabie dei reih ta â di ha hra.

Chatanachata LYUVA KU ahmâna daihti cha vaw tlô ha ta, Satlia nata laisazy ta Awkhy Lâ ama vaw pathaopa cha Khydi nata Pawmaihdi zydua ama thapha ngaita  ta, he nota “Alia liata alâ Paw cha la,  Pahmôpi litopa na alyu e” tahpa hla ama vaw pathaopa tawh nahta Lôdu cha achy ta aviavôpâpa ta Pahmôpi hawh litopa ta Siaramaidi cha thlai avaw pathyu.  Siaramaidi chhaota nai zualuah kawpa ta Lôdu bâhkalie ry liana chata bâh pazawhpa ta thlai avaw lâ lymâ ha hra. Mohropazy chhao ama lâ khoh thlâh ha tarawpa ta Lôdu nata Siaramaidi ama lâ khohpa he cha zawpi palôh vaw panano khai ha ta, Satlia hluhpi cha Lôdu isina ama hnei. 

      Zâ vaw châ heih ta, thyutliapazy châta huasua daihti hmâh heih awpa a châpa vâta Zâ Daw 7:00 rachhôh liana chata Lôdu cha pua khoh awpa ta Siaramaidi cha kei hrua ha heih ta, zawpizy ama vaw pôhziah mâh leipa vâta amâ chhaina su kiah  liata thokô sâkha ry liana chata Lôdu ta Siaramaidi cha buakha atyu khoh ta bielôhawhpazy reih khoh awpa ta thlai a hrua haw. Siaramaidi chhao cha Lôdu hruana hawhta thokô sâkha ry liana chata bielôhawhpa reih khohna daihti cha hmâh ei ta, cha zâ hra cha thlâpâ vaw ngaita kaw ta, Ngâhchhina lyubie ti pasoh ngaita kawpa cha do khohpa ta he hawhta lyubie amâ hlâ heih. 

Lôdu :  Siaramai, atazâ hâzoh Bei nô khaipa khi nâma nata keima châta châ sala tahpa pachâpa ta thata aly na ta, Awsi ngia ngaita kawpa thokha a patlâh khohpa ta a chhipazy khi nâma nata keima châ sih la tahpa ta thata ei rohpadyh cha maw!

Siaramaidi :   Tlaichuh, Lôdu, anodeikua na biereipa dia ma â nano kaw tyh e, atazâ thlâpâ vaw na ry liata bielôhawhpazy eima reih khoh thlâh hapa cha nâma nata keima châta a châ tlai he zaw! Ahy e miah pakhâpadie. Deiva Awsi hawhta a patlâhpa ta eimâ tyu khoh thlâh ha he zaw. tahpa ta a chhy heih ta.

Lôdu :  Siaramai, cha khiahta la Pivaw thatih ama reipa he na pahno beih hra ma.? Pavaw hry liata â nano patlua kawpa cha Pivaw he châ ta, Pivaw baokha y khoh tyh penawh he a chanôpa/a chapawpa tlyma y leipa sala sâkha rairie cha ama yru ngaita kaw ta, palôh pasana vâta ama laozy chhao nie khao leipa ta a chhâna lâ cha ama thi thlâh ha tyh. Cha hleikhôta Kaongâ chanôpa he a Chapawpa ta alao pie tyh ta, a chapawpa cha chyhsa ta Meithei ta ama vaw ka ha khiahta cha a chanôpa chhao thlai a thi ha tyh. Cha tlu ta Pavaw kyh â pachâpa na ama châ.

Siaramaidi : Chuah.! Lôdu vaw pahno beih va.!. cha tlu ngâsâ cha ma ama kyhpachâna cha a vaw châ. Keimo chyhsapa hlâ chhaota ama kyhpachâna cha â icha via syulyu sy cha.. ei kha ei pahno na a châ.

Lôdu :  Siaramai nâma nata keima chhao a khoh thlâthlipa châ leipa ta Pivaw hawh heta kyh a pachâ rairiepa ta laih-na opizy paryh khoh ei sih la, hrochhôh châta a kao ei si,nâma he vaw y khao leipa châ la, Pivaw hawhta lôhpasapa ta ei hrona taita ei pahlei thlâh ha aw.

Siaramaidi :  Lôdu.! tahpa dei a ao kaw papua ta, a raithli cha ei khapi ta za zô ha hra ta. Lôdu ku cha thlai avaw patu ha hra.

Chatawh cha zawpi cha avaw pôhpakhy laihpa ta ahmâna cha vaw pathao laih bâh ei ta.. Daihti nata nohzy vaw sie lymâ ta, kyh amâ pachânazy vaw pasa via lymâ ta, chahrasala Siaramaidi Nô nata Paw heta ama sawchanô hnei chhôhpa cha Lôdu a khoh tahpa raita vaw pahno mâh leipa ei ta, ama sawchanô cha  Khi kha liata khihsa thei viapa tlyma, Pho âlâluah viapa Chapaw hnohta dyh pachâ awpa he khâ vaw saduthliekhei tyh ei ta, Satlia vaw chareipa maihta amâ di khôlâ ta anô ta Nunu, na khopa a châ ma tahpa ta avaw hiahri tyh hra. 

    Châhrasala, Siaramaidi ta Lôdu nata amâ khopa cha charâ ta anô nata Paw vaw chho ngâh leipa ta, a ku khotô, amo riahvai tahpa ta Lôdu cha kyh avaw pachâ lylia. He amâ kho chhôh zydua  he Lôdu ta lôhrâh tlô kawpa ta charei awpa achhuah tyh ta, chahrasala rei chiehpa hawhta Siaramaidi cha o chareipa ahnei hluh kaw tyhpa vâta a khona hawhta lôhrâh tlôpa ta charei thei tyh leipa ta, Siaramaidi hra Satlia nata Laisa ahmâna kheihawhpa tlyma a yleipa cha khôtho apuatu leipa a châ.

Zâkha cha Lyuva Khutla châta Lâ amâ chu nota Satlia pakha châthaipa nata hmisa chhao dua leipa Lôva heta Siaramaidi cha vaw charei hra ta, a hmipha a tah zie nata a palôh liata a paveih zie cha chho ta, bie lôhawhpazy a reikhei lymâ ha hra.

Lôhvâ : Siaramai, tahmâhlâ la chyhsa pakha he ei palôh lia a hlo hawhta na chhô thlâh ha ta, khâpa hmo rai ei taopa chhaota cha chyhsa sai chata ei palôh lia a châh thlâh ha cha maw.!

Siaramaidi : Veiseih kawpa nata pahnei silipâna chôta Lôvah, ahy rimâ ma cha tlu cha na palôh liata a châh thlâh hapa a châ e, chhiena kyh ma phana lâ kyh maw?

Lôhva :  A moh la cha chho mâh aw va na, nohkhihzy vaw rei via tua sala ei cha chho aw. Tahmâno la a daihti châ mâh vei. A phana lâchhâh bao na, laisa châ ta, a hmisâ nata â pielyu zie ei na pahnie ngaita.

Siaramaidi : Chuah.! Cha tlai cha rei thlâh ha bao. Pei na a y tu aw ma? Cha hawhta a cha pahnie kaw khiah cha a riarôzy a zi la kyhpachâna bie chho hlâh ha bao.

Lôhvâ : Tahmâ no la ei rei khiah châ thai vei, na khoh leipa chhao y thei ta, noza â chhi. Cha laisa hra cha chyhsa veiseih kawpa nata za âchhih kawpa châ tlôh ta, tahmâ no tawhta ei teikhâ hnolo lymâ chy aw.

Siaramaidi :  Lôhvâ, cha khiahta la mylâ hânoh nama thatih a sia tita na chho ma y. kei la a hy hno hmahta reipapua aw va na. Viasa phapa hawhta na pachâ tyh.

Chatawh cha zâzy avaw rei laihpa vâta Lôvah cha â di ha hra.

Chatanachata Lôdu nata Siaramaidi cha hrochhôh kaolâh ta vati hrialâh awpa, lahpinô châta avaw saduthliepa hawhta, Anô nata Paw hnota atlôkhei haw.

Lôdu : Ei nâ, Laisa Siaramaidi he kyhpachâ kaw na ta, ano chhaota ei duasuzy hmôkheipa ta kyh na pachâ thlâh ha hra ta lahpinô châta na hiapa teh u.

Lôdu Nô :  Ei saw, Lôdu, keimozy hawhpa ochakichabâpa sawzy tlaita Siaramaidi ta a cha vaw khoh thlâhpa cha dia ly’pa châ kaw.! Anodeikua “Pâpâ, liahsa pachâpasiatua la bie rei teh! Eima khihsazy alyu leipa ta Siaramaidi Nôpawzy ta keimozy hawhpa machhie-mahrupazy la maniah khoh hmeiseih bao v’ei, khitlâh pahneiparâsao ta eima y bao na”

Lôdu :  Ei nâ, na reipa he â do kaw nota zâkhanoh Lâ eimâ chu nota Siaramaidi cha hmo totie chhopa ta hrochhôh châta lyubie a paryh pi ta, ano chhaota mothlih chhaota hrochhôh kaolâh awpa ta a paryhsa ha hra.

Lôdu Nô :  Pâpâ Lôdu, cha hawhta na khoh kaw khiahta cha na Paw chhao duah a saohiahpa ta chhôkha a ki chaina daihti liata eima reipahmao tua khawh.!

A Nô nata Paw chhaota ama paryhsa thlâh ha aw tahpa hnabeiseina khâchâ ahneipa vâta lahpinô châta akhona thatih cha chho awpa achhuah tyh ta, chahrasala daihti ruapa rai hmô thei mâh leipa ta, daihti ruapa avaw hâ hnolo lyma. Zâkha cha mao-oh thei khao leipa ta lahpinô châta a khopasana zydua chho awpa ta Lôdu cha Siaramaidi charei awpa ta pua/athao ha ta, nohroh pyly hawhta Siaramaidi cha Satlia pano pathô o charei vaw hnei hlâh ha heih ta, Lôvâh chhao cha avaw y thlâh ha hra.

Chahrasala Lôdu cha apalôh liata Siaramaidi kyhpachâna saita abiepa vâta a papeipahliasa leipa ta apha kawpa ta aviasazy cha bie achho lylia ta, buakha â tyu tawhta Siaramaidi ta thopi pahâh kawpazy cha pa-eihpa ta satliazy cha raih laih ta, Lôdu a pie awpa no deikua chata reikah zyh kawpa ta charei patlua awpa ta a chho haw. Zâ daw 9:30 khophie avaw paro hapa vâta a charei tua penawh Satliazy cha a di ha ei ta, he nota Lôvâh chata Lôduh â tyupatluapa cha a palôh hroh ha hra ta, Lôdu deikua cha amâ di khôlâ liata Siaramaidi Lyuhbie hlâ awpa cha angiatiah vei.

Lôdu nata Siaramaidi-zy kyhpachâna chavah pasohpa chaka pathaopa  ta lyubie amâ hlâ na.

Lôdu : Nama hmo hneipa liata hmo miakha ei kho kawpa y ta, nâma nata na Nôpawzy ta pasaih thei ei sala na pie thei la tahpa ei khoh kaw.

Siaramaidi : Lôdu, Khâpa hmo rimâ maw.? Ei Nâ nata Ei Pâ pahno leipa ta piepa chi a châ khiah kei ta ei cha pie thlâh h’aw kha maw. Diah rei tua bao.!

Lôdu :  Siaramai, Hmeiseihta la Ei Nôpaw hnota kyh ei cha pachâna thatih zydua he chhopa ta eima ochhôh miah pasopakâ ta a to miah pachu awpa nata Pivaw baokha hawhta hrochhôh vati hrialâh ta  opi paryh khoh’pa he khoh kaw na ta,  rie na hiapa t’u tahpa ta chho ei na ta, a ly ngaita kaw ei ta, anodeikua keimo o chakichabâpa sawzy heta na nôpaw ta miah khoh v’ei tahpa deikua ama chi kaw.

Siaramaidi :  Lôdu, chyhsa kâzô na na pachhie kaw.! Kei padisaihpa heta nama chhôkha, cha pasopakâ awpa chi châ bao va na, nâmo ta tlao ei na pasopakâ awpa ei chi a châ. Lôdu keima liata la a ryh leina sâkha hmah hnei va na. Ei Nôpawzy chhao Lyuhchâpa tuahpa ta a phata ta ama chho khiahta la ama paryhsa bao na. keima chhao na vaw hiahri aw ei ta, kyh ei cha pachâna he a phata ta ei vaw chho hr’aw ei..kheita ma nâmozy hawhpa satlia siapazy he ama cha dytha ngâh aw tly.!

Noh 2 a sie khôlâ liana chata Lôdu cha ama chhôkha ngâlâh ta reipahmaona hnei ei ta, ama bie rei tlâhpipa cha he hawhta a châ.

Lôdu Nô : Eima Paw, kheita ma Lôdu cha a châ aw.Siaramaidi chhaota vaw tlaichhai chheih ha ta, Lahpinô châta tlâ eima hiap’aw ma? Kheita na pachâ?

Disôh (Lôdu sietanô) :  Ei Nâ, Siaramai ta â u Lôdu kâh ta avaw khoh khiahta cha a pha kaw tlai maw khitlâh hmotaona liata a sia vovâ kawpa nata chyhsa nôchâ pha kawpa a châpa hleikhôta a riarô patlâh patlô kawpa châ ta, hiapa thlâh ha bao u.

Lôdu Paw : Nôhpi, a phata ta pachâ tua tu u, khitlâh pahneiparâsaopa eima châ pathlei lah y, Lôdu, nâma chhao eima duasu na hmôpa hawhta a Nôpawzy ta khâsawta miah reileipa ta miah ama dytha pathlei khiah khitlâh hmia kha khao aw ma pi. Cha leipa chhaota Siaramaidi he pakha deipa a châpa vâta Mâ nata chhaozy eima pahnieh lei awpa ta vaw haw pathlei ei sala chhôhkhazy hnei tlôh leipa pi ta, noza hmiachhie deita eimâ la aw.

Lôdu :  Ei pâ, na reipa he â do kaw. Anodeikua zâkhahnia kha ama olâ chareipa ta Siaramai chhaota lyuh nama vaw châ tita kei chhaota a phata ta vaw chho aw ei na ta, âryh thlâh ha aw ei na tah taraw khazaw. Anodeikua Mâ lâchhâh la reikhei va na.

Lôdu Paw : Cha khiahta la noh nata daihtizy diah vaw sie laih tua sala keimo cha chhôkha sanawh-rinôzy eima hneitu leipa vâta opalyuhri nata Awnanopa liata Nôpaw eima tah viapazy a saohia tuah pi ta, ryhpaona cha eima tlua khawh. Nôkyhzy la a paraparôpa ta taopa chi châ vei. Pâpâ!

Lôdu Nô : Tlaichuh.! Pâpâ nâ, na paw reipa hawhta daihti nata nohzy vaw sie laih tua sala Siaramai Nô nata Paw-zy chhao diah a chareikâ via tua sih la, ryhpaona pachâ lah vâ pi.!

Lôdu sietanô : Â u, Ei Nâ nata ei Pâ ama reipa cha a pyh hlâh ha tyh..hmo hluhpi chhao patopatia’pa byuh ta eima chhôkha duasu hra he hawhta châ thlâh ha tlôh ta, yh, tah thlâh ha tyh.

Lôdu : Aw, cha hawhta ei Nôpaw chaipa ta nama tah khiahta cha nama ryh-raona zydua ei pyh khai thlâh haw. Anodeikua kô chhâ hlâta châ thei sala tahpa ei khoh kaw tahpa ta a rei khaipa ta nahta viasa zy ta charei awpa ta ama vaw hrua haw.

He hawhta Lôdu nata Siaramaidi ama ziza a pha lichi ta Satlia pakha viapa Lôvâh chata Siaramaidi nah o cha vaw chitlaih lymâ ta, Siaramai hleikhôta Siaramaidi Nô nata Paw cha a pakypasiah tyh ta, Laisa pakha he Lôvah ta ano taokhei awpa ta â saohiah ha hra. 

Nohkha cha Pahânoh heta Lôhvâ ta Siaramaidi taokhei awpa ta â saohiahpa Thleizi ta Siaramaidi cha a pakhy awpa nata pakhy bâh tawhta ama o lâ theilâthaopazy nie awpa ta a hrua haw. Siaramai chhao chata a viasanô hruana hawh chata a pakhy ei ta, pakhy ama bâh tawhta Thleizi nah o lâ cha chareipâ ha ta, theilâthaozy ama nie khai tawhta o liata ama bielôhawhpa reipa cha he hawhta a châ.

Thleizi :  Ei Narô, zâkhanoh Lyuvaku nota na lâpa khawh na thai ngâsâ, ei pachâna hlâta na lâ thai via syulyu, Satlia pakha chhochhi la a mo pathla leipa ta a cha moh ngâthlâh haw.

Siaramaidi : Chuah! Chata mâ.? Ei zi. Kha no khawh! ei kâchhie ngâsâ Lôdu ta ei na vaw pathyu hapa hnaita ngâh leina chôta na ei lâ e. ei na pahneisao hôlô ei nahta ei pangiasa tlai maw.

Thleizi :  Ei Sia , tiarâh chala! na lâ thai ngâsâ, kha liata satlia hluhpi chhochhi cha nâma cha moh ei ta, a chaneichanâ awpa taita my ei ta, Lôvah chhochhi cha a mo pha cha tahtu hata Lôdu nata nama lâ khoh ngâ no khata vaw lâ hr’awpa khoh kaw ta, â thlachhie ha.

Siaramaidi : Ei zi, saosawta khiah ma  ei na taopâ chi keima sasyh hmahta o ei di tawhta thata pachâ na ta keima tlaita kha tlupota ei lâpa kha ei no-âh ta kyhkha lâta keima sasyh hmahta a lôh va na, Lôvah chhao rai cha tlao vaw lâpâ ha sala a pha via heih’pa tlai.

  Zâ kha cha Siaramaidi-zy chhôkha heta Pati nie daihti liata bielôhawhpazy cha ama reih.

Siaramaidi Nô : Nunu Siaramai, Lôdu tlai a cha vaw charei ngâthlâh haw viasa ma nama châ ma a cha khoh maw?

Siaramaidi :  He nota cha reih ngâh leipa ta, Ei Nâ, Viasa na eima châ e. Lôdu he siavo kaw ta kheihawhpa hmo rai ei taopa chhaota na zi lymâ ta, a zo chhao eima olâ na vaw pathlie tyh ta, chapaw nôtlyh kawpa nata â reisi kawpa, chyhsa palôh pachhie awpa riah chi kawpa a châ.

Kholai (Siaramai rilâhpa)  :  Â u, cha zo va na.! khiliah biethâh ei theina liata â khohpa hawh sai ta ei thei. Na palôh â hnai kaw, Lôdu zy tlaita na khoh thlâhpa he â nano ei tah kaw. A no hlâta Lôvah he pha ei tah via.

Siaramaidi Paw : Nunu, na nawta Kholai a reipa he â do thlâh ha khiah maw a phata ta rei thlâh ha bao.? Khopa nama hnei khiahta cha a pathaih kawpa ta nama hnei awpa châ ta, cha hleikhôta chapaw he sothai kaw ei ta, avaih thai kaw’pa abyuh lah y. a thei sala nama hnei leipa he a pha chai.

Siaramaidi :  Ei Pâ, na reipa he â do kaw, anodeikua khopazy eima hnei tua vei khiah ei khapi ta miah ama hia thai aw ma? Nâma nata ei Nâ chhao namâ kho tua leipa ta namâ hnei rai ma? Kholai, na bie theipa cha a doh vei, â vaw dopa chhao rai cha châsala khâpa e a pei. Nâma chhao Lôdu hawhta chyhsa hmâtlâhpa châ awpa ta a chhua hra tyh.

Siaramaidi Nô : Nunu, na y dâh nata na bierei dâh he cha moh chaimâh na ta Lôdu nata namâ khohpa ta khâchâ ei pahno. Chanô pakha deipa châ chi ta, na hmialâ daihti he a phata ta pachâ ma y.

Siaramaidi cha a pybiepa hawhta pati a niepa cha thlai tyh ha ta, cha nota a Paw deikua chata a sawchanô ei khapi ta hnabei pady awpa ta khoh leipa ta a lahpinô Siaramaidi Nô hnota Nôhpi, Nunu, Siaramai reipa kha pachâ hôhiah leipa na ta tlao â do kaw. Nâma nata keima chhao he vâ ia rairiepa ta kô hluhpi eimâ khoh khôlâ ta â hneipa eima châ.  Ama zydua ta Pati cha tyh khai ha ei ta. Noh 3 khôlâ ta Lôvâh nata Thleizi cha a pakyh-na hneipa ta Siaramai teikhâ n’awpa dâh cha ama reih khoh ha hra.

Lôhvâ : Thleizi, kheita na hmô Siaramai he, ei na khoh thei aw ma?. Zâkhanoh namâ pakypasiah-nazy khâpa a lyu?

Thleizi : Lôvah, a bierei kathlâh tawhta cha siavo kaw ta Awkhy lâ nama lâ notapa thatihzy kha reih khoh pi ta, laisa veiseih kawpa a châ. Ano tawhta a chu awpa hluhpi ei hneipa ta ei pahno.

Lôhvâ : Ei Thlei, Mylâ cha bâh charei la kyhpachâna bie na vaw chhopa thlâh ha tua bao, keima ta chho awpa cha dia ma ei vaw ngiaroh kaw e. Eima hawtu khiah Lôdu hra kha â phuaphia leipa ta Siaramaidi kha vaw pazipazâ ngâthlâh ha tlôh ta tao para abyuh khiah maw?

Thleizi : Lôhvâ, na chapawsaw vei dia maw!, chanôzy pi la hmiachhyta chapaw ta kyhpachâna bie miah ama chhopa he eima khona dâh a châ. Chyhsa ta miah ama chhopa cha khâsaw ta reileipa hawhta eima pachâ. Na ydâh he ei cha palyusapa la Chakei hmâchhâh ta sa taih ngâh leipa ta Zôhri keichho ta taih awpa a ngâh viapa tlao ei palyusa.

Lôhvâ : Cha khiahta cha nâma ta bie na vaw papyu va aw chi ta, a no ta a châ chhyna nata âhnawna hawhta tlâ a châ kha zaw!! Kei cha a pakypasiah hluh leipa na ta ei khapi ta kyhpachâna bie chho awpa cha ei ngiaroh kaw.

Thleizi : Lôvah, cha khiahta cha mylâ he avaw pakypasiah tua sala ano ytu-khihsa tawhta tlâ a châ khawh. Lôvah cha Thleizi nah o tawhta â di ha hra.

     A mylâpa chata Thleizi cha Lôvah châta Siaramaidi cha kyhpachâna bie chho awpa ta a charei haw.

Thleizi :  Ei Narô, tahmâhlâ la Lôvah ta eima olâ vaw charei tyh ta na thatih saita a cha reih thlâh ha. Nâma he Lôvah liata la Kheihti hawhta na vaw thlôh kaw, Pawpi rohpahâhpa hawh na châpa ta ei pahno.

Siaramaidi :  Ei narô, cha zo hra va na a chhiena lâchhâhzy na tlâ ei na reih bao aw, keimozy padisaihpa heta sikhôh bie dei leipa ta a phana lâta a hy hmahta miah rei awpa y bao v’ei. Keima hlâta cha nâma he tlao na thlôh via.

Thleizi : Ei Narô, Siaramai, a hmeseihpa tlai maw, zâhnia cha eima olâ vaw charei ta a no-noh-y ta hmipha a cha tah zie nata na nôchâ hrozie pha a cha tah ziezy thata eina chho.

Siaramaidi :  Chata ma? Ei ly kaw na, na vaw tahpa ma y, Lôvah zy cha châthaipa nata khihsa theipa châ ei ta keimozy thatih chala a reipa chhaota a veilâh deita na tlâ châ bao aw.

Thleizi : Siaramai, keima cha hmo totie cha chho tyh na ta, ei narô sipa hawhta cha hmôpa ta a chhie a pha keima thatih taita ei cha chho tyh. Lôvah he ei cha khokhei kaw. He nota Thleizi palôh deikua Siaramaidi heta Lôvah he vaw khoh leipa sala Lôvâh ta a no he vaw khoh sala tahpa palôh tlao phaoh ta, Lôvâh deikua Thleizi cha khoh tiarâh hra vei. Hmeiseihta la e, ei Narô, Siaramai, Lôhvâ heta kyh cha pachâ kaw ta, nohchareih nata zâhchareih heta na thatih sai na chho ta, ano ta cha vaw chho awpa ta na hmia a cha hmô nahta a nozatu ha hnaita rie na vaw chhopa la ei na tah. Rie paryhsa thei la tahpa viasa eima châna tawhta ei châ haw.

Siaramaidi : Zizi, chyhsa sadô liata Pawpi ângia na tah kawpa he khoh ngâsâ la nâma ta hiah leipa ta chyhsa pahiasa ha la, a hneituh penawh ta kheita ama cha pachâ aw tly.! Cha hleikhôta Lôvah zy cha keimozy ta a phuh ma pi.

Thleizi : Ei Narô, na reipa cha â do kaw nota Lôvah deikua chyhsa hmo hiapa he a chyhsa châna ta ngâh tyh leipa ta nâ nata kei eimâ viasa kawpa a pahnopa hnaita keima hnota rie na vaw chhopa ma y ei na tah.  Ano na khoh nata na khoh lei cha kyhkha châ sala viasa eima châna pa-i n’awpa chhao raita rie paryhsa kaw hlâh ha tyh.

Siaramaidi : Ei Narô Zizi, keimo lâ Pawpi he cha a lei a phatu khiahta cha pawh parei thei leipa ta thlai a thi ha tyh. Chavâta,  rie na pachâthai kaw ma y. Anodeikua, he hmo vâta nâma nata keima likah narô châna deikua a phie/parao awpa pasaih chachei va na. Ei Narô, mylâ hânoh daihti ryhpaopazy a y bao na; châ thai mâh vei na tahpa ta a nai kawpa ta rie vaw chho thlâh ha ma y.

        He nota Lôdu cha khihliah â khie nota â chhyh chhopa vâta Siaramaidi nah o tlailai (Veranda) tawhta Thleizi chata hmô ta thlai aw ta, Lôdu chhao cha kâchhie-zôchhie kawna chôta Siaramaidi nah o lâ cha thlai kiahpa ta Siaramaidi nata Thleizi hnoh na chata â pahly ha hra ta.

      Cha nota Siaramaidi Nô nata Paw chhao cha opa tawhta avaw di hra ei ta, Thleizi a y thlâh hapa vâta ama sawchanô cha thopizy pa ei ta doh awpa ta chho ta, Siaramaidi chhao chata a Nôpaw nata a viasa pano châ chata thopizy cha a tao ha hra.

       Thopizy liahsa ama do khai tawhta Lôdu nata Thleizi cha olâ adi awpa a chhuah ei ta, cha nota Siaramaidi ta Lôdu cha charei chy awpa ta a ru lâta a chho haw. Lôdu chhaota a viasa nô Thleizi hnohta Ei Thlei, “ Kei cha buakha vaw y sala ei vaw di aw Pahânoh châ ta, tao awpa cha hawhta hnei pyly vana, nâma vâ di chhielie chy ma y tahpa ta achho ha hra.Siaramaidi Nôpawzy cha chhôpadâhpa liata ama nôvah ta buakha a pazawh ha ei ta.

        Lôdu nata Siaramaidi a pakyhna.

Lôdu : Siaramai, Thleizi kha tlai, tahmâhlâ châ pakypasiah ngâthlâh ha ta, khâpa thlihua cha ma avaw pathlisa ha tly? Chô Bydi nô hawhta lyuhchâpa rai hriapazy ei palyusa kaw cha maw?

Siaramaidi : Lôdu, Khâpa thlihua hmahta vaw phaoh va hlâ maw, mosaw tahmâhlâ la Kali hawh yru ta ama olâzy charei tyh hra na ta, ano chhao vaw chareipa ta hmo sisaw leipazy tlâ eima rei tyh. Chô Bydi hawhta lyuhchâpa rai hria mawh sala keima kô daih  leipa ta laisa hropa hmipha viapazy kô a daih ha aw.

Lôdu : Siaramai, Lôvâpa chitozy heta Pawpi maihta by leipa ei ta, a pawh rohpahâh viapa nata kho â chhih viapazy he byh khoh via tyh ei ta, Pavaw-zy chhaota tho thei hmoh viapa nata pahâh viapazy chhao ama nie khoh via tyh. Ngiachhiepa ta keima kyh ei cha pachâpa hawhta nâma chhaota kyh ei na pachâ khiah chita cha hmo siapa rie na chho la Ei Thlei heta khâpa thlihua tlai ma a vaw phaoh e  na chho thlâh ha tyh.

Siaramaidi : Aw!! Lôdu, eima likah sikhôh a pameih aw tahpa riah ei chitu na vâta ei ch’aw chho ngâh vei.  Lôvah ta ei Narô he bydi lyuhchâpa rai avaw pahriasa he maw.  Anodeikua, ei sapa he pasanazy ta na vaw by tyh hrasala ei chhôso liata kyhpachâna hnie pahno hapa deikua khâpa chhaichhi hmahta phie thei rimâ’pa châ khao vei.

Lôdu : Chata mâ? Cha biethâh ei vaw theipa chala ei palôh nata ei pôhpa zydua heta alyna ta bie ta, ei lyna vâta ei raithli byh cha cysia dâkaniepa hawhta avaw pahna khai ha chuh! Lôvâh zy cha viapachâdi a thaipa hleikhô ta pih-lâhpa nata sietanô hnei leipa a khopa maih nie thei do theipa hnaita khihchhôh laisazy chhaota ama khoh kaw sai.

Siaramaidi : Lôdu, Kyhpachâna sadô liata cha Rietheipa nata hneirôpazy, hmiphapa nata hmichhiepazy, a hrupa nata a sopazy chhao hmaokhata ama charei khoh tyh. Kyhpachâna ta thleilei hnei leipa ta khizaw hneirôna nata hmiphana heta kyhpachâna he paraopakei thei vei.

Lôdu :  Siaramai, Hlichhy nata Hly-â ama reipa hawhta eima châ pathlei aw tahpa riah ei vaw chi kaw nota ei phu leipa biethâh thlihua na vaw pathlisapa chala alyna ta ei chhôso a bie khai haw.

Siaramaidi : Hlichhy nata Hly-â hawhta cha tlao pha kaw vei ma? Kyh amâ pachâ rairie zie nata hmohropa ta ama kyhpachâna a parao thei lei zie ei Pâ ta ei na chho tyh.

Lôdu : Siaramai, Hlichhy nata Hly-â cha kyh a pachâ ngaita ei ta, anodeikua Hlichhy kha keima hawhta opazu pachasapa a châpa hnaita Hly-â Mâ awpa dâdei hnei leipa ta ama kyhpachâna cha palôhpasa kawpa ta amâ phie hawpa kha.

Siaramaidi : Chuah.! Chata mâ? Cha khiahtala,  na reina yzie tawhta ahnei thei aw mapi tahna ma a châ? Kei ta palôh tlokhu ta kyh cha pachâpa ta na châta ei parua khai ha tawh cha nâma chhaota kyh ei na pachâ thlâh khiah chita cha a hnei thei lei n’awpa a y rai ma? Lôdu!

Lôdu : Lyuhchâpa tuapa ta na Nôhpi Thlôchho kô vaw daih mawh sih la, pakha deipa châ chi ta, nâma na pachâ dâh a châ leipa chhaota na Paw ta Mâ hluhpi miah vaw haw sala tahpazy pachâ tyh na ta ei chhôso vâpi dei a cho thlâh ha tyh.

Siaramaidi : Lôdu, Awh thie dâh chikha dei y vei ama tahpa khâ. Cha hleikhôta thokô liata theilâpa cha eima lyu thei leipa chhaota, Ratlyh ta chakhei aw pi ta, Ratlyh ta âpha heih vei khiahta cha a kô taihta ama thlu tyhpa hawhta adaihti nata noh ta achhopasia aw.

Lôdu : Siaramai, Khaotlô âthupi tawhta na thaopapuapa hawhta pachâ na ta, ei ly ngaita, ei palôh phaohri zydua chhao ahua ta, kei cha palôh tlokhu ta kyh ei cha pachâ. Nâma leipa ta khizaw zasâh hry liata kyh ei pachâpa he pih chanei khao aw v’ei. Kheihawhpa chhaichhi hiahbâh hmahta ei palôh ochhi he chakhyh hrasala pahy thei khao va na.

Noh 3 a sie tawhta Siaramaidi Nôpawzy ta Siaramaidi viasa Nô Thleizi cha o charei hruapa ta ama sawchanô thatih cha ama hiahri.

Siaraimaidi Paw : Thleizi, Nunu Siaramai he nâma hleikhôta a khysia hropa hnei leipa ta nâma la hmoto na pahno thlyu aw. Nunu he khopa a hnei ma tahpa miah chho tua.

Thleizi : Paw paw, pahno vana, Siaramai he akhysia kaw taraw pi ta, he hawhpa lâchhâh deikua ei kha hmahta na chho beih vei. Satlia pakha Lôvah deikua ta cha tlaichhai ngaita kaw ta, châhrasala ei Narô heta khoh vei. A thei sala Lôvah he ei khokhei ngaita kaw.

Siaramaidi Nô : Cha khiah, Lôdu nata heta zaw? Âmo he ama hawtino tawhta â khysia kawpa châ ei ta, amâ khoh tahpa thâ na thei beih ma?

Thleizi  : Ei nâ, pahno va hlâ maw.! MTP nata KTP Prokra (Programme)  ahmâna liata cha khâ a pazipa ta Lôdu ta ei Narô he khâsia ta o â dina taita avaw pathlie tyh, Viasa kyhpachâna ma vâ iapa ta kyh â pachâpa ma ama châ tahpa deikua pahno va na.

Siaramaidi paw : Chuah.! Zizi, Nunu ta Lôvâh cha khoh vei ma? Cha hawhta châthaipazy hnabei padypa cha pha vei, keimozy hawhpa taopa chi châ vei. Tawhta Zizi, laisazy ei chita cha nama so kaw awpa abyuh Satliazy chhao biechhiepa nama hlâ awpa châ vei. Moto chô liata veiseih ula, Satlia khoh dâh nata kho lei dâh chhao nama thai kaw awpa abyuh, Chanô la zâkha ta mohchhie âla theipa nama châ hih.

Thleizi : Ei Pâ, na reipa he âdo ngaita, nama sawchanô ei Narô deikua, he hawhpa kyh liata cha sia ngaita ta atlu tyh va na. cha hleikhô ta, Lôvâh cha a khoh leipa vâta ma a châ ma khopa hnei awpa akhoh lei vâta ma pahno vana. Lôvah heta keima lia khâ na chho tyh ta, Ei Narô hnota tlôkheipa ta hmo a châ thai lei zie ei na chho.  

bielôhawhpa ama rei nota Siaramai cha â vaw di ha hra.

Siaramaidi : Chuah! Ei Narô, khâpa rimâ e, na vaw tah? Ei y lei chhôhta eima chhôkhazy hnohta vaw charei chi ta khâpa biethâh rimâ e nama vaw pathlisa?

Thleizi : Ei Narô, hmo byuhpa vâta buakha avaw khie na ta, ei cha vaw chapia, nâma na ylei tarawpa ta na Nôpaw ta ei hro lâthlô châta PHEIBU (chhâchabi) thiehpa na reipa ei ta ei ly ngai ta. Khiahtala olâ hmotao’pa zy byuh ta, ei di chy tua aw. Thleizi cha a di ha ta.

Siaramaidi nata a Nôpawzy a pakyh-na.

Siaramaidi : Ei Nâ, ei Pâ, Thleizi kha khâpa rimâ e a cha vaw tlôkhei ei. Nohroh ei y leipa ta vaw kiah beih tlôh va, khâpa hmo rimâ ma nama vaw rei khoh?

Siaramaidi Paw : Ei Sawchanô, a hmialâ daihti awpazy na tlâ eimâ vaw chhosie bao.! Chanôzy he vahpa hnei lei thai’pa nama châ leipa vâta vahpazy atlyh pasu kaw awpa abyuh tahpa thatihzy na tlâ eima vaw rei khoh bao.

Siaramaidi Nô : Nunu, Na paw reipa he â do kaw, chanôzy cha ei kha mohchhie eimâ lâ khiah hrochhôh a daih thlâh ha ta, Vahpazy chhao atlyh thai kaw awpa abyuh ngaita. Lôvâh zy hawhpa châthaipa nata siavo kawpa chyhsa he vahpa châta ama pha kaw aw.

Siaramaidi : Ei Nâ, ei Pâ, nama hmo reipa he â do ngaita, anodeikua Chysia mâru kawpa he na chaleipa ula nâ hmie tlôh vei sala a mâruna kha phahnai leipa aw ta, ei kyh khoh vei chhochhi khiahta cha  â ngiana alâ leipa aw ta, phahnai aw vei.

Siaramaidi Paw : Nunu, khizaw liata hmo sôh chaipa cha saiheina he a châ. Chyhsa ahyrai ta eima chô liata hmopha ama vaw tao khiahta cha aly kawpa ta eima dao awpa a châ, hnabei pady awpa châ vei. Cha hleikhôta, O paroh kawpa he hlyuzy eima vaw thu nahta cha othiehpa hawhta a châ ha tyh.

Siaramaidi : Ei Pâ, O he khatluta hmah thieh hrasala tlyma, a chhôh liata hmo sôhpa hluhpi y hrasala eima ngiaryhpa o a châ vei khiahta cha Lyu liata Chapu hlâta phahnaina a hnei lei via.

He nota ama sawchapaw Kholai cha avaw di hra ta.

Kholai : Â u, atano la, khiliah ei chareina liata chyhsa hluhpi ta Lôdu nata namâ khoh tahpa nata amâ hnei thlâh thlyu na tahpa biethâh ei thei hluh kaw chamaw.!

Siaramaidi : Kholai, ahy e cha hawhta ei thâtih a reih, ei khoh khiah Lôdu cha tlâ ei khoh tlai chyhsa thatih diah ama pachâ kaw.

Siaramaidi Nô : Nunu, Lôdu he na khoh tlaipa a châ thlyu aw, cha hawhta khiliah lia taihta na thâ a pathâpa cha a pei kaw dia, a sosih la, a thei khiah a chhaih hala apha aw. Lôvâh ta a cha tlaichhai kawpa tlai khazia e, na dytha?

Siaramaidi Paw : Nunu, Pavaw taw he a panô ta a bu liata a y nota thothei hmohpha viapa nata pahâh viapazy nie’pa pie tyh ta, a mathlaw liahsa avaw châ ha nahta deikua ano kho ta â tlua tyh.

Siaramaidi : Ei Pâ, Pavaw cha thothei hmoh viapa nata pahâh viapa tlua hrasala a nie tyhpa thothei a châ thlâh ha khiahta cha a miema-u pa chhao a py âpabie thei thlâh ha pyly,Ei Nâ, Lôvâh ei na khokheina chi he sôh kaw ta a phuh va na, anodeikua Lôdu hawhta kyh nâ pachâtuhpa he a tyh khao aw va na. khizaw hneirôna nata thainasona heta ei palôh ochhi he pahy thei khao aw vei.

Siaramaidi Nô : Nunu, mylâ hânoh keimo eima vaw thi khôlâ liata na lâthlô awpa he apha vei khiah palôruh rietheipa ta na y aw tahpa he na nôpaw ta pachâ pi ta, riethei tuna vâta kyhpachâna he a lei theipa a châ. Siaramaidi Paw deikua cha a sawchanô he âlâhâhpa ta hnabei pady hlei leipa ta Lôdu ta avaw hiah tita Mâ hluhpi haw aw pi ta, miah mâ thei aw vei ei a tahpa vâta he hawhta a sawchanô cha a chho.

  Nunu, chakhiahta cha nâma ta chyhsa na khopa liata dyhchâ aw chi ta, kheihawhpa duasu lia raita nâ vaw duapa chhaota keimo na Nôpaw ta a maoh to aw ma pi.

Siaramaidi Nô : Eima Paw, nâma he na Nunu he palao khai chi, a chyhta tawhta keima ta avaw aongie khei lymâ na ta, cha hawhta khazia na tah thlâh haw, Sawzy cha Nôpaw khona hawhta ama y awpa a châ.

Siaramaidi : Ei Nâ, na biereipa he â do kaw, Nôpawzy cha nama bie eima zyh awpa tlai a châ, anodeikua nâma heta ei pâ he kyh vaw pachâ chi ta, na nôpaw ta chyhsa hropa cha pahneisa ei sala na hrochhôh daihti kheita na hmâh aw tly? 

    Siaramaidi cha chhôhpadâhpa lâ â ngia syulyu haw. He rakha tawhta cha Lôdu nata Siaramaidi likah cha sikhôh avaw pameih pathao lymâ haw.

Noh 3 a sie tawhta Lôvah ta Siaramaidi cha kyhpachâna lyuhbie hlâ hr’awpa a khohpa vâta zâkha cha ano dei tlai ta Siaramaidi cha charei ha hra ta, Lôvâh ta Siaramai a chareipa cha Siaramaidi Nôpawzy ta chyhsa rônah kawpa o chareipa hawhta ama sawchanô cha Lôvâh châta thopi pahâh kawpazy taopa awpa ta ama chho.

                  

Lôvâh nata Siaramaidi a pakyhna.

Lôhvâ : Siaramai, Lyuvaku daihti ta na lâpa kha atano taihta ei mothlaw liata hmôpachhi tyh na ta, lyuvaku daihtizy vaw tlô heih sala ei tah kaw.

Siaramaidi : Lôvâh, Lâ awpa ei chhuah taraw leipa ta Lôdu ta khâchâ ei na vaw pathyu ha hnaita lâh vei mawh la viasazy pachâ dâh â nano aw ei tah vâta tlâ ei lâ chakhyh hra khawh. A ru lâta ei na pahneisao hôlô ei chi nahta ei pangiasa.

Lôhvâ : Lôdu nata nama lâ khohpa kha namâ hmie pachaih. Lôdu chhao rai kha nâma cheingei a cha vaw pathyu hra kha maw.! A palôh liata a cha rie kawpa na châ thlyu aw.!

Siaramaidi : Lôvâh, cha hawhpa châ bao vei. Mohropa a pathyu ngâh leipa vâta na keima he a viasa âpakyh tyhpa ei châpa vâta tlao ei na vaw pathyu.

Lôhvâ : Kha no khata keima chhao thlai thyu ta cha vaw lâkhei awpa kha khoh kaw taraw na ta ei kâchhiepa hleikhôta ei na dytha aw chi tahpa china vâta vaw lâh tua ngâh leipa ta Lôdu ta tlao a cha vaw pathyu tua ha.

Siaramaidi : Lôhvâ, Ahyrai ta miah ama pathyu ha tawhta cha lâh leipa ta y awpa kha noza âchhi ta, â papiparysa kawpazy eima lyu pathlei aw. Lôdu a châ pachaih vâta ei lâpa chhao châ hlei vei.

Lôhvâ : Siaramai, Lôdu nata nama likah liata biethâhzy a ypâ rai khiah maw? Khiliah nama ziza hiahza tlai apha kaw cha maw?

Siaramaidi : Lôhvâ, khâpa biethâh rimâ e? Lôdu zy cha satlia sia kawpa khitlâh liata ama hmâh chaipa, veiseihpalôhâh kawpa châ ta, keimozy cha viasa châta tlâ ei nâ pakyh tyh bao, keimozy padisaihpa hela na khoh tiarâh bao vei.

Lôhvâ : Siaramai, tahmâhlâ la o chheipâh liata thothei pavaw ta a nie kawpa y ta, a byh awpa ei chhuahpa cha chyhsa hluhpi ta avaw byh tyh ei ta, cha hryh liata chyhsa pakha chhochhi a myzâ a byh thlâh ha ta alyupa cha ama o sadôh liata Pavaw la a palyusa cha maw!.

Siaramaidi : Lôhvâ, cha paw hnoh chata a byh thlâh hra bao. Pavaw a siah pathlapa thai viapa maih tlâ châ vei ma, cha paw chhao chata Pavaw cha a no-eih châ hlei leipa ta ahiehâ bao’vei. Viasa cha Pavaw amâ byh khoh tyh thlâh ha vei mâ?   He nota Lôvâh cha a viasazy tawhta Mobile ta ama vaw call pa vâta buakha a tyu ta, â di haw.

Lôdu nata Siaramaidi cha Kô 2 daihmâ amâ  khoh tawhta kô 2 na Phiapi thla thaopa liana chata Lôdu Paw chhôkha lâ tawhta Lôdu châta Siaramaidi cha Lyuhchâpa tuapa ta ama hia haw…

Siaramaidi Nô nata Paw-zy chata ama sawchanô pakha deipa amâ palaikhei zie cha avaw lâpathao lymâ haw ta, bie ngiapa tluapa ta lyuhchâpazy hnohta Nunu he ano dei chanô eima hneichhôhpa châ ta, atahmâ nota dyhchâ awpa ta cha pasai mâh mapi. Keimo chhôkha saita avaw pachia via aw pi ta ano chhao duah eima vaw hiahri tua aw tahpa ta amâ chhy.

  He nota Siaramaidi cha a Nô nata Paw biereipa cha angiapathli hlâh ha ta, lyuhchâpa amâ di khô lâta apalôh pasapa ta rakhô liata cha palôh keichheipa ta â môpakhei haw.

A mylâpa chata my laobei chhopa cha rei leipa ta pati nie dâdei awpa chhao cha achhuah leipa ta apalôh cha vâpi dei chota ahmia cha hiehâna nata pachârôh-na saita aphaoh. Pati nie â dai hapa vâta a Nô ta a za pathyu ngâpa chhao cha thyu leipa ta a nô hnota, 

“Ei Nâ, Khizaw liata chyhsazy he alyna daihti ei thôh Pih-noh, Thihnoh, Ahnei noh, hnei pi ta, miakhapa A hnei noh deikua cha nâmo ta, ei lâthlôh nama khaw haw”

Siaramaidi Nô : Nunu, a thei sala dyh na châh noh ta cha eima theina zydua cha palyupalih ta na khotlâpa maih cha taop’awpa he Na Paw ta akho chaipa nata â chhuah chaipa a châ.

Siaramaidi ; Khazia cha hawhta nama khoh tlôh khiahta cha zâhnia lyuhchâ penawh kha nama dytha e, kei la heihzy hnota apahlao awpa chhao ngâh khaoh va na. Lôdu hmia chhao kheita ei kha khao aw.!

Siaramaidi Paw : Nunu, dytha chachei ma pi, kôzy lâlaotu ha ta, tahmâ nota dyh na châ awpa he na Nô nata keima ta eima pasaih thei vei. Lôdu he, cha tlu ngâsâ chama kyh na pachâ haw.

Siaramaidi : Ei Pâ, Ei Nâ, Khizaw chyhsa zydua he pakha châta pihpa sai châ pi ta, cha nota hrochhôh châta kyh eima pachâpa deikua a nano khai ha ta, cha eimâ tlyhpa lia chata khizaw hneina sôh heta palôh parao thei vei. Lôdu he ano ta kyh ei na pachâpa hawhta kei chhaota kyh ei pachâ.

Siaramaidi Nô : Nunu, Lôdu cha ochhôh hmo zydua uhthei chaipa a châna hawhta ano ku lia saita y ta, cha liata nôhrâh chaipa duasu liata nâ dua awpa cha namâ vaw tivy vei khiah mohchhie hlahchhie dei nâ la aw. Rai hra hria beih chi va.!

Siaramaidi : Ei Nâ, Lôdu nata avaw hnei sih la hmo chhichâ n’awpa dâh chhao ei pahno khai. Anodeikua kyhpachâna ta la hmoto he akhu khai ha tyh. Chavâta, Vahpa hnei na kyh liata cha keima khotlâpa tlai rie na pahneisa t’u.

Siaramaidi Paw : Nunu, Pakha deipa châ chi ta, na kho leipa hmo he cha pataosa awpa a chhuah chachei ma pi, na duasu awpa eima cha saikhei vâta dei a châ. Na khoh khiah Lôdu cha hnei lah vâ chi.

  Siaramaidi Paw palôh deikua Lôdu ta ama sawchanô he hnei awpa avaw khoh tlai khiahta cha Mâ hluhpi haw ta rairuna patlôs’awpa he âchhuah chaipa châ ta,Siaramaidi deikua a Paw palôh cha pahno tiarâh leipa ta a Paw ta Lôdu hnei awpa a tahpa cha âly ngai ta. Cha tawhta pati nie cha amâ pachhuapanoh.

Lodu chhôkhazy cha ama palôh avaw nano pathao ha  hra ta, Siaramaidi Nô nata paw tawhta amâ vaw chhy dâh cha mylâ hânoh lyuhchâ penawh he tuachanei awpa nata chanei lei awpa ta amâ pachia ha hra.

Lôdu Nô : Pâpâ, Siaramaidi Paw-zy ta amâ chhyna he reikah ngiapa hawh dei a châ, keimo cha piahpa awpa ta miah khoh hmeiseih aw veih ei.

Lôdu Paw : Ama Nô, Na reipa hawhta kei chhaota ei pachâ cha maw.! Lôdu nâ chhao lôhroh phaohpa ta keimo hawhpa riethei sawzy pazapazi thlâh hala ph’aw vei ma?

Lôdu : Ei Nâ, ei pâ, nama reipa zydua ei pyh khai…anodeikua Siaramaidi heta khâchâ na tlaichhai ha ta, mohropa hnei mawh sala palôhpasapa ta a y awpa he ei ngia na chhie ngaita kaw…

Bie amâ pachia nota lyuhchâpa ama tuapa hryta pakha he avaw ngia ta, he hawhta biereina a hnei. Lyuhchâpa ; Khazia e, ama palôh pahnopasia n’awpa ta ama kahmi cha tlâ eima kiah heih vei..ama bierei kathlâh kha cha hawhta dythana chhao châ leipa ta, hmo â rypaoh mâh leipa vâ deita ta châ ta, Siaramaidi ta Lôdu he a tlaichhai kaw tahpa ei pahno hra.

Lôdu nô ; Siaramaidi Paw zy cha reikah ngiapa dei a châpa ta ei pahno..sawchanô pakha deipa châ ta, keimozy hawhpa liata dyh pachâ awpa la pasai chachei bao veih ei.

Lôdu Paw : Lôdu Nô reipa he â do kawpa ta pahno na ta, anodeikua, Lôdu heta Siaramai he khâchâ ngiachhie ha ta, ei kha cha hmia a pakawhpa ta ama kahmi cha tlâ eima kiah heih ma?

Lyuhchâpa ; Lôh eimâ sa n’awpa chhao raita ei kha cha ama kahmi diah kiah tua pi ta, cheibaina a ytu hlei rai ma? Keimo ku liata miah a pahnieh thlâh ha teh u

       He nota Siaramaidi ta Lôdu cha Message avaw paphao haw..

Siaramaidi : Lôdu, Lyuhchâ penawh amâ di khôlâ khata ei Pâ hnota a hnei awpa ta chho na ta, â ryh a tah zie na chho ta, anodeikua kô chhâ lâchhâ ta a hnei awpa ta ryh-raona eima tao.

Lôdu : Siaramai, Pachâ sualuah tyh na ta, Sadô liata Pawpi chhei awpa ei chhuahpa he eima ohmo leilô ta â zie thlyu vei tahpa ei pachâ tyh.

Siaramaidi : Lôdu, khazia cha hawhta nâma hmâchhâh lôhpi na phao e, Pawpi cha na mohôh pha khiah a hro thei thlâh pyly aw.

Lôdu : Avaw hroh theipa chhaota Pawpi hropa hawhta a pawhzy pakai pha leipa aw ta, achhichâ apasa kaw aw, cha hleikhôta, eima o heta Pawpi ngia kawpa y awpa ta âhmie leipa ta ei pahno cha maw.

Siaramaidi :  Lôdu, Pawpi heta y n’awpa rao chhieliena hnei beih vei..achheituhpa ta a khona liah maihta chhei tyh ta, a mohôh-na reizie ta a pawh chhao a tah tyh… ngiachhiepa ta ei palôh pasa n’awpa zie ta bie reih khao kha…

     A mylâpa liana chata Lôvah ta ano taokhei awpa ta â saohiapa Thleizi hnohta Siaramai cha charei hrua awpa ta chho ta, Siaramaidi chhao cha a viasanô hruana hawhta a charei ha hra …!

Thleizi nah o ama tlô hlâta su ryhpao kawpa liana chata buakha a pahâpa ta bielôhawhpa ama rei no chata Lôhvâ cha pahno leipa hawh ypa ta Siaramaidi cha thlai vaw awsao ta, Siaramaidi chhaota Lôhvâ cha ama kiapâh lia bielôhawhpa rei hr’awpa ta aw ta, Lôvâh chhao cha avaw pangai ha hra.

  He nota Thleizi cha khataih-lâ ma a chhei n’awpa tlua sala Lôhvâ ta Siaramaidi kyhpachâna lyuhbie zydua ahlâ thei aw tahpa sai ta a pachâ nota, Siaramaidi ta, Zizi, “Na palôh liata hmo pachâna hnei kawpa dia na lyu thlâh haw? Khataih lâ hmahta vaw khah y” tahpa ta a chho.

Lôhvâ chata apachâna avaw nano ta, Siaramai, “Keima kiah liata y awpa he na chi kaw khiah maw?”  tahpa ta thlai kaw reih hra ta. Siaramaidi ta, “Lôhvâ, cha hawhpa châ vei, Zizi y dâh hena palôruh riethei kawpa alyu hlâh hapa hnaita ei ngia na ryh thai leipa ta tlâ ei vaw tah bao, kheita e, ei cha chi thai aw, nâmozy cha châthaipa, khitlâh ta ama cha mothai kawpa na châ cha ma.! Cha hawhpa lâchhâh pachâna raita hnei va na” tahpa ta âchhy haw hra.

   He nota Thleizi chata su hropa lâ achhei mawh sala Siaramaidi ta hmo noleipa lâta  la aw ta, ahiehâ pathlei aw tahpa riah chipa ta, kaleih hryhta dawhchhy cha vaw tu ta, ama olâ cha ryhpao vianazy a y thlyu mawh na tahpa pachâpa ta ama olâ pangai awpa ta viasazy cha chho ta, ama zydua ta Thleizi nah olâ cha ama pangai khai haw.

  O liata bielôhawh buakhata ama reih tawhta Thleizi chata daihti ryhpaopa cha tluapa ta thopi pa eih awpa achhuahpa vâta, Chini ama hnei thlâh hapa cha Chini chalei awpa ta Siaramaidi nata Lôvah hno chata, “Buakha ta, daoh liata chini chalei awpa ta chho ta, Siaramaidi chata Ei Narô, “Thopi pa eih awpa byuh bao vei, thlai ta ei di ha aw, vaw zâlâpâ laih ha ta”, tahpa ta chho ta. Lôvâh chhao chata sothai kawpa ta Zizi, “ Kei chapaw ei y thlâh ha hih, keima chalei lah vâ na,” tahpa ta vaw reih hra ta, châhrasala Thleizi chata ryhpaona hawhta a pachâpa vâta buakhata vaw y chy ula, thlai ta ei vaw lie pakhua ha aw. tahpa ngâlâh reih ta daoh lâ cha a pua haw. 

               

Lôvah nata Siaramaidi apakyh-na

Lôhvâ : Ei sia, thothei miakha liata Pavaw cha chyhsa pakha ta a sia pathla hapa ta pahno na ta, Pawpi ângia ei tah kawpa nata mo na ai leipa chhao chyhsa pakha ta kei thlie ha ta, ei chhôso vâpi dei a cho thlâh ha cha maw.!

Siaramaidi :  Ei Lôh, Na tah lia ma na ramâ maw na rei? Cha Pavaw a siatuhpa cha a myzâ dai leipa ta thothei liata a tyupâ ngâthlâh ha aw ta, Pawpi chhao cha nâma hlâta ano ta a khopasa viapazy na a châ ha bao aw.

Lôhvâ :  Ei sia, Ei tah lia bao na, hmeiseihpa ta cha noh hluhpi kyh cha vaw pachâ na ta, anodeikua na hmiakha leina vâta Zizi kha chô bydi lyuhchâpa ta, vaw tuah na ta, châhrasala â ryh thai leina bie na vaw reih  tarawpa ta ei kyhpachâna deikua tano taihta  theisâ lao ei pôhpa liata ângiapa hawhta a tah tyh cha maw.!

Siaramaidi : Ei Lôh, na kyhpachâna he kei châta cha lôsôhpa hlâta rônah via ta, a sôh via ei tah tyh, anodeikua tahpa reikah vaw hmâh heih sala, Pawpi chiah ama thlie hapa cha pazao thai’pa châ khaoh leipa ta, a paw hropa thliepa he tlao pha via vei ma, a chiah thlie chiehpa cha pazao hraw sih la, a paw kha thlai ta a uah lymâ ha aw.

Lôhvâ : Ei Sia, â do kaw, anodeikua vaw tah ha hraw sala thlie hr’ei sala, a khohtuhpa châta cha a pawh uahpa chhao ahneituhpa châta cha a paw pakaipa hawh dei a châ tyh.

Siaramaidi : Ei Lôh, A pawh tla chiehpa nata ama thliepa pawh hluhpi hlâta a chiah liata â pataopa paw kha he sôh via ta, rohpahâhna chhao a hnei via tyh. A paw tla chiehpa cha ti hluhpi baopa ta mohôh hrei sih la, phahnaina hnei khao leipa ta, achhâna lâ cha thy awpa dei tlao a châ.

Lôhvâ : Ei Sia, Pawpi hluhpi zydua hlâta eima khopa Pawpi sâkha he a sôh viapa hawhta keima châta cha pawpi pawh pakai haipa, ângia kawpa nata rohpahâhpa hawh dei châ chita, ei kyhpachâna he rie nâ pyh thei la tahpa ei châ haw.

Siaramaidi :  Ei Lôh, ei bierei awpa he keima pakah tawhta pua awpa ta cha nozachhihpa hmo châ ta, aphuh hra va na, anodeikua, nâma hlâta hleidy vaw dao tuapa ama y hapa hnaita saikaoh thuhpa lia ei tla tlahmaw aw tahpa riah chipa ta cha hleidy cha ei vaw hli hmâ haw. Na pachâthaina â sâh chaipa ta ei châ haw hmeiseih.

Lôhva chata Ei sia tahpa ngâlâh kaw reih hmâ ta, o hneituhpa Thleizi cha phie â vaw ngiapâ ha ta, thopizy cha pa-eihpa ta liahsa ama do khai tawhta Siaramaidi cha a di ha ta, Lôvah chhao cha buakha ypatluapa ta Thleizi cha hmo yziezy chho ta â di haw hra. He zâh lilaw liana heta Lôdu nah chhôhkhalâ tawhta lyuhchâ penawh cha hmiatlâ Dawbeih cheipa ta Siaramai cha hia awpa ta ama pua haw hra…

  He zâ cha Siaramaidi Pawzy nôvah chhao avaw pahy ngaita kaw ei ta, Thuasoh cha apha kawpa ta ahlâh ei ta, thopi donazy hneipa ta, ama sawchanô Lôdu châta ama pasai zie nata ama chhôkhazy chhao thlai awpakhy ta, mâ nata chhaozy pasiapanô khaipa ta ahnei n’awpa nohzy thlaita raopa châ sala tahpazy liahsa ama rei khai tawhta lyuhchâ penawh cha amâ di ha hra..

  Lôdu nah chhôkha cha mylâ hânoh Siaramai chhôhkhazy ta Mâ hluhpi maniah ama haw aw tahpa lâchhâh pachâna rai hnei leipa ta, ˆaryh ha tahpa lyuhchâ penawhzy ta thlihua ama vaw phaopa cha aly ngaita ei ta, thopi donazy ama hnei.

  A mylâ hânohpa liana chata Siaramaidi nata Lôdu cha aly ngaita kawpa ta su miakha liata ahy vâ angiah leipa ta lôhkhoh biezy cha reih ei ta, daihti ta a sie haipa chhao pahno khao leipa ta a hnei n’awpa daihti amâ ngiatiah lei zie cha noh yta ama reih khoh.

Lôdu : Keima dao ei Sia, zâkhahnia lyuhchâ penawhzy ta sikhôh bie ama vaw phao aw tahpa pachâpa ta, kha zâh cha pasana hneipa hawhta ei palôh cha keichheihpa ta a y.

Siaramaidi : Lôdu, ei dao, keima chhao kha  zâh liana khata ei Nâ nata ei Pâzy heta vâpi a sâh sala lyuhchâ penawh dythapa ta sikhôh bie vaw phaoh mawh ei sala, kei châta khizaw he a ruapa hawh dei a châ aw.

Lôdu : Keima dao thlôpadih, miah na pahno khaipa hawhta eima râh leilô liata Pawpi ângia kawpa ei chhei awpa he ei ly kaw nota a pawngiana deikua a nohâh y aw vei tahpa ei pachâ nahta deikua pei tah tyh na ta, ei palôh he a keichheih tyh.

Siaramaidi : Lôdu, Pawpi heta chyhsapa hawhta he su liata cha ei nohâh y aw vei tahpa pahno leipa aw ta, chyhsapa hawhta ngiaryh leina hnei bao vei..na pachâna dei a châ.

Lôdu :  Thlôpadih Ei Sia, khizaw phasana zydua siesai ngâhpa ta eima kalah chhôh ato a phahlana su liata chhiekhei phakhei ngâhpa ta opi eina paryh khoh awpa chi he ei ly kaw nota cha pasai thei tyh va na.

Siaramaidi : A mothlih cha pua pa-ô khaipa ta, Lôdu, he Khizaw hneirôna zydua ky khai ha hraw sala nâma nata opi eima paryh khoh thlâh ha khiahta cha khizaw zydua hneipa hawhta pachâ na ta, kheihawhpa rietheina rai he na kiah liata tao awpa ta pei tah-na hnei va na.

Lôdu : chhao cha a mothlih vaw pathlapâ ha hra ta, Ei sia dao chai, Keimo chhôkha chhiehru kawpa liata opi paryh khoh ta, ato niedo khoh ta chhiekhoh awpa ta nâ pasaina heta lyna vâta ei palôh he keichheih ta, anodeikua nâma riethei awpa hlâta kei he kheihawhpa rietheina raita ei tao lymâ aw, anodeikua ngiachhiepa ta nâma na tao thei chhôhpa cha ei chhôhkhazy kyhpachâ awpa dei he châ ta, ei chhôhkha zydua chhaota amâ châ pahniehna chai awpa na châ.

Siaramaidi : A mothlih cha za tlapâ ha ta, Lôdu ku cha patupa ta, Lôdu, ei chyhta tawhta ei Nâ nata ei Pâ zyta na vaw  mohôhpa ta tahmâ cha nama o lia ei y h’awpa vâta na Nôpaw cha ei Nôpaw nata na pihlâhpazy cha ei pih-lâh sipazy châ ha ei ta, ei tao thei chhôhpa cha nâma nata na chhôhkhazy kyhpachâ ta nama chhiena liata chhiekhei awpa dei he ei maohphaona hawhta ei pachâ..!

       Lôdu cha chapaw hmahta châ hrasala khâpa bie hmahta reih thei khao leipa ta alyna vâta a palôh cha keichheipa ta a raithli byh liata ti hluhpi â o ha ta, Siaramai ku dei patupa ta reikah leipa ta a y. He nota Siaramaidi cha ama chhôkha tawhta Phone Call dao ta a di awpa ta ama vaw chhopa vâta pasai lei kawna chôta ama chareina su khochhih kawpa tawhta thyusaipa ta amâ di rairie haw.

    Hâta eikha daihti a sie tawhta Siaramaidi Paw chata ama sanawrinôzy cha awpakhypa ta ama sawchanô Mâ nata chhao hleikhôta a hnei n’awpa noh chhao Tari 7 Di thla liata a hnei awpa ta ryh-raona hneipa ta Lôdu Paw nah olâ cha Mâ nata chhao ama hawna zie nata a hnei n’awpa noh taipazy pahnosa awpa ta lyuhchâ penawh cha ama tuah ha hra.

Siaramaidi chhôhkha lâ tawhta Mâ ama vaw hawpa cha mâ chyhpa,diduapa cha rei leipa ta mâ pipa sai hmahta, Dawh khoh lai kawpa sâthô, Meithei hrâhpa pha kawpa sâkha nata hmo hropa hluhpi ama vaw pahripaziahpa ama hmôpa cha Lôdu nata a Nôpawzy ama chhôso  vâpi vaw cho pathao ha ta, ama ochhôh cha meithâh hawh avaw zoh pathao lymâ haw.

   He zâh tawhta  Lôdu cha pasai leina chô nata palôh pasa kawna chôta Siaramaidi cha ahlasaipa ta chhaih-na chhikao angiakhei awpa vaw byuh pathao ha bâ ta, Siaramai cha he hawhta Mobile tawhta Message a paphao haw.

Keima dao, Ei Sia, he bie he kho lei kawna chôta ei vaw roh hih,

Khizaw lia daihti ei vaw hmâ chhôhta,

Ei lyna chaipa nata ei khizaw na vaw châ tyh;

Noly chhiki nah hâzoh chhiki ta sadu ei vaw thlie tyhpa,

Pawpi rohpahâhpa nata ângia chai ei tah chaipa cha,

Kei rairao nawhnaitu na vâta pathlie avaw byuh haw.

Ei tloh leina mo pakhôpa ta nâ pasaina zydua kha,

Pathipalôh liata hawrawh âphie thei khao leipa hawh a châ.

Na phana zydua vâta alynabie ei cha hlâ.

          Siaramaidi cha khâpa thothâh pahno leipa ta ei khapi ta Lôdu Message avaw hmôpa cha no-âh tah ngaita kaw ta, saisopa hawh dei pachâpa ta he hawhta Messge cha âchhypalie ha hra.

Lôdu, khâpa thlihua rimâ e na vaw pathlisa,

Kyhpachâna he saisopa châta hmâh awpa pha vei;

He bie he kei châta thlipi rupa ta,

O chhie kawpa a chaphiechadawhpa hawh a châ.

Lyuhbie eimâ hlâpa zydua kha sikhôhpa ta,

Meithâh hawh a châ aw ma? Châ bao va,

lyuhbie totie eimâ hlâpazy kha Khizaw hmozy ta,

Parao awpa ta pasaih chachei va na,

Chavah ti hawh ei cha lohkhâh lymâ aw.

   Lôdu cha Âmo chhôkha saita a pachia tua ei ta, ama khihsana hra heih hawhta a châ leipa vâta keimo heta khâpa phusâ ta ma Dawhkhoh nata Meithei hrâhpazy cha zua eima chalei thei aw khohlei sôh hawhta a châ zie cha pahno ei ta, lyuhchâ penawh hnota hmo yzie zydua nata ama nôh kyh phie awpa ta lyuhchâ penawh cha aw ei ta ama tua ha hra.

Siaramaidi Pawzy chhaota Lôdu chhôkha lâ tawhta nôhkyh ama vaw phiepa cha nawtawna lâ lapa ta palôh tlâh kawpa ta a pyh ha hra ei ta, he nota Siaramaidi deikua cha khâpa hmah pahno leipa ta a viasa nah o chareina tawhta avaw di ta, a paw ta he hawhta a chho haw, “ Nunu, Lôdu nata a Nôpawzy heta ama cha khoh leipa a châ thlyu aw, a tazâ kha nôhkyh phie awpa ta lyuhchâpazy ama vaw tuah, nâma chhao lôh a sa la, Khazopa ta kaolâh pha kawpa a cha pie thlâh ha aw” tahpa ta achho.

Siaramaidi : Ei Pâ tazâ ta bie ei theipa dia kho achhih leipa ta kei châta a pasa kaw dia, zâkhahnia kha Lôdu nata hmo totie eima rei khoh ha taraw mâ maw.! Khâpa sikhôh bie rimâ ma thlihua nama pathlisa ha heih tly? tahpa ta a mothlih cha pua pa-ô ha ta a reih ha hra.

Siaramaidi Paw ; Nunu, Lôdu Vahpa châta na hnei awpa he châ lykhei pi ta, a rônah thei chaina hawhta cha palyupalih awpa eimâ chhuah nota he hawhpa bie eima vaw dao thlâhpa he no-âh eima tah kaw.

Siaramaidi Nô :  Nunu, “Tlaichuh, na Paw reipa hawhta miah ama khoh vei tawhta cha Thuaso chhao pakua sih la, nâma chhao Lôdu hlâta pha viapa Khazopa ta a cha pie hlâh ha aw lôh a sa ha tyh.

Siaramaidi :  Ei Nâ, chyhsa pakha he khizaw hneirôna zydua paki ha sala, achuna liata paki khai ha heih sala, ahmi cha khizaw liata pha chaipa nata laisa hluhpi amâ chhupa châ hrasala, kyh ei pachâ thei vei khiah phahnaina hnei leipa ta râhpathohpa liata pakha deita pahrâpa hlâta riethei âchhih via aw. Khâpa ma a chhâpa, ngiachhiepa ta rie na chho t’u zo thei va na.

Siaramaidi Paw :  Nunu, khâpa hropa châ bao vei, Mâ nata chhao kyh liata ama pachâdâh a châ leipa vâta nôhkyh âmo ta ama vaw phie kha maw.!

Siaramaidi Nô : Sawchanô pakha deipa châ chita Lôdu chhôhkhazy ta Mâ kyh liata bie ama hnei thei awpa châ vei.ama ochhôh nâ ngia tita ama biehneina ry liata na y aw..!

Siaramaidi cha khâpa hmah reih khao leipa ta ahmia cha chhiena âtyhpa hawhta pachârôhpa nata hiehâna hmia phaohpa ta chhôpadâhpa lâ cha angia syulyu hata a rakhô liana chata palôh keichheihpa ta  y ta, buakhapi tawhta Lôdu cha Message paphao awpa a chhuah heih ta, châ hrasala, Lôdu cha khâpa vâta ma a Mobile cha a off syulyu haw.

      A mylâ my liana chata Siaramaidi cha patiniepa cha rei lei, â ziana rakhôh tawh chata thyu khao leipa ta a palôh cha keichheih thlâh ha ta, kheita ma Lôdu cha hmo siapa ei hiahri thei aw tahpa pachâpa ta âkhudie nota Lôdu chata nochhôh a hmô ta hmo totie zydua chho awpa ta Mobile ta avaw chho haw.

   

Chatanachata My dawh 10:30 liana chata Lôdu ta a hruapa hawhta ama chareina su parohpa liana chata bie totie zydua reih khoh awpa ta  pua ha hra ta, he noh ta Lodu ta a kyhpachâ chaipa chhaina ti panôpa pado awpa cha ngiaroh ngaita kaw ta, a chhôso vâpi dei a cho thlâh haw. 

Anodeikua, Chhaih-na ti panôpa a pado vei khiah ahmialâ daihti liata noza hmiachhiepa nata maophyuhpa ta ei y pathlei aw tahpa pachâna vâta raithlih chhaota a kyhpachâpa chhaih-na noh cha avaw chhi haw.

              Lôdu nata Siaramai lyuhbie chhâna.

Siaramaidi : Ei khapi ta a mothlih cha pathla  ta, Lôdu, khazia he hawhta kyhpachâna he saisona ta na hmâh thlâh haw, hmeseihpa khiah ma tahpa ta khizaw he a ruapa hawhta ei vaw pachâ hmâ haw.

Lôdu : Kei dao, Ei sia, he hmo he keima châta reihpapua awpa ta keima nata ei chhôhkha duasu ta a phuh vei tahpa ei pahno taraw, anodeikua mylâ hânoh nâ ly n’awpa pachâna vâta reih sala, eima ochhôh lia pahrâ awpa ta na hnazô ei sai châta cha pasaih thei va na.

Siaramaidi : Lôdu, ei reih chanei heih aw, khizaw hneirôna he ky khai ha hr’aw sala nâma nata opi eima paryh khoh thlâh ha khiahta cha khizaw zydua hnei khaipa hawhta pachâ na ta, khazia ei na khoh lei awpa tlai chi lôhiah n’awpa ta lyuhbie totie ei n’aw hlâ chi e.

Lôdu : Ei saduthliena hawhta hmo châ hasala tahmâ tlai chhao opi paryh khoh ta, na kiah liata khizaw noh nata daihti hmâpathao awpa he ei lyna chaipa châ ta, nâma vâta khatluta hriapasa awpa chhao he ngiarohna hnei chachei va na.

    

Siaramaidi :  Lôdu, cha khiah khazia, eima likah rairuna y tlôh leipa ta eima nôhkyh kha nama vaw phie hlâh haw? Kei chhaota a hneina chysia Marapa a tobina chito liahsa ei pachâ khai ha tawhta noza hmiachhiepa ta ei na soh aw chi ma?

Lôdu : A mothlih vaw pathlapâ ta, Kei dao, Khatita ma eimâ hnei n’awpa noh achhi aw tahpa pachâpa ta ei ly kaw nota, pakha deipa na châna hawhta na nôpawzy ta mâ ama hnabeiseihpa hawhta eima tloh vei tawh cha chyhsa pha viapazy nata opi paryh khoh ula nâma nata na nôpaw amâ ly via thlyu aw tahpa pachâna vâta kha hawhpa hmo kha eima ch’aw tlôkhei.

Siaramaidi : Lôdu, tahmâ daihti liata mâ nata chhao liata rairuna y khao leipa ta, ei Nâ nata Ei Pâ chhaota na pahnie lei awpa taihta cha ama cha haw aw ma? Keima chhaota hmo totie ei vaw chho aw

Lôdu :  Keima dao, Ei Sia, na Nô nata Paw he maochhie achhih chachei v’ei, keimo chhao châ hr’aw sih la, na Nôpaw hawhta mâ nata chhao he eima haw hr’awpa tlai a châ..! reih lei awpa vaw reih sala Dawh khoh laipa sâthô nata Meithei hrâhpa pachâ n’awpa pahno leipa pi ta, eima râh liata hra hmô awpa sôh ngaita kaw ta, avaw ypa

chhaota keimozy hawhpa saw heta hrochhôh ta eima hnei thei lei awpa a châpa hnaita, ei Nôpawzy chhaota nâma he vahpa pha kawpazy na hnei thei n’awpa pachâpa ta eima zydua ta nôhkyh phie awpa ta ryhraona eima vaw hnei..!

Siaramai :  Lôdu, tahpa dei kaw reih ta, a mothlih cha thlai za pathla ta, olâ adi awpa hlâta ei hrona he a pahlei awpa khoh via na ta, atahmâ he kyh ei na pachâ hmeiseih khiah chita la nama olâ nâ chhipâ thlâh hala, na paryhsa vei khiah he su liata ei vaw laihzaolao aw...

Lôdu : Ei Sia, châ vei, kyh ei cha pachâna deikua cha ahloh chhôpa hawh a châ, anodeikua, Khazopa ta eima likah ryh a rao leipa chhao a châ aw, eima pano ta nama olâ cha adi pi ta ei ch’aw pathlie aw hih..! ahnei mawh sih la, mylâ hânoh rairuna a tyh heih aw pi ta, na nohâh ynazy alei khai aw.!

Siaramaidi : Lôdu eima ochhôh liata rairuna chatôh awpa hlâta na kiah liata rairuna totie chatôh awpa he khoh via na ta, mylâ hânoh ei Nâ nata Ei Pâ tawhta rairuna vaw tlô awpa zydua chhao keima ta tao lah vâ na, cha liata na khoh leipa khiah nâ disai hala, kei deikua khizaw noh he viavipa ta ei vaw hmâh aw hih..!

Lôdu : Ei dao, khâ ei cha chhopa hawhta Vakao nôvah baokha he y ei ta, a chapawpa cha a chyta tawhta a chhichâ apasa hapa vâta achanôpa alao pahâhpa pie awpa a pahnie leipa vâta achhichâ taihta a pasa ha hra…! Khazia ma he tlupota kei nawhnai he kyh ei n’aw pachâ chi e, nâ ngiathai ha ma y, avaw viasa leipa ta, kyhpachâna lyuhbie ei ch’aw hlâ lei’pa tlai. Apalôh vaw keichheihpa ta a mothlih cha pahno hmâ leipa ta avaw pathlapâ ha hra.,

Siaramaidi :  Lôdu, Vakaoh chapawpa chata a chanôpa cha pati pahâhpa pie thei hra vei sala hrolâhpa ta a kiah lia khâ a y thlâh hapa vâta a chanôpa chhao âlyna chaipa a châ, he hawhpa lôhpasana eimâ tyh awpa pahno mawh sala na kyhpchâna ei ch’aw dytha h’awpa tlai, châhrasala na kyhpachâna iadi ta na zai ha ta …nama olâ nâ dikhei awpa na pasaih vei khiah he su liata daihti hmâh aw pi ta, abyuh khiah Pivaw hawhta tlâ chhiekho pha khoh  lah vâpi.

Lôdu :  Siaramai palôh pasasa awpa cha a ngâh leipa hleikhôta Siaramaidi kyhpachâna cha ahlasai awpa a khoh leipa vâta, kheihawhpa rairuna rai avaw tlôpa chhaota tao hnolo lah vâ tahpa pachâna chô ta, Siaramaidi hnoh chata:-

     Ei dao ei Sia, Kheihawhpa thlipih rupa raita eima likah liata avaw pathlipa chhaota nata Chavah tily rupa chakakhei awpa ta eima opivaw ziazi roh kawpa liana chata opi cha paryh khoh lah vâpi” tahpa ta olâ cha âchhi haw…!

        Zâlâ vaw châ ha ta Siaramaidi cha Pati nie â vaw di to leipa vâta Phone ta bie achho awpa a chhuah ei ta, châhrasala Siaramaidi cha a Biechhona (Mobile) cha  Off syulyu ha ta, Lôdu cha Call heih ei ta, Lôdu deikua cha pahno leipa ta achhy awpa âchhuah nota Siaramaidi chata Lôdu Mawbai cha chhu ta, a Off  syulyu ha hra. 

        Buakha angiachhih ei ta, vaw zohpâ ha ta, Siaramaidi cha â vaw di khao leipa vâta ama chhôkha nah cha patluah awpa ta tua awpa amâ chhuanoh haino na chata lyuhchâ penawh cha Siaramaidi nah ochhôh liata amâ vaw ngia haw..! Châhrasala, Siaramai Pawzy nôvah cha athaota nota Lôdu nah chhôkhalâ tawhta nôhkyh ama vaw phiepa cha ama palôh liata a nawtawna lai kawpa ama hneipa vâta lyuhchâ penawh cha bie hluh pareisa leipa ei ta, Dawbeih ama vaw cheipa chhao cha kuakhei ta, ama saw cha vaw chhitha awpa ta chho ei ta, ama vaw chhitha vei khiah âmo tlaita adaophi/parai awpa ta chho ei ta, ama hmia cha hiehâna sai ta bie ei ta, ama palôh cha CHHAOPAMEI/MEISAIHPI hawh âduah.

  Lyuhchâ penawh chhao cha Siaramaidi Pawzy ta ama reina hawhta kua ei ta, Lôdu Nôpaw hnoh chata khâpa bie hmah rei thei ma pi e, eima Sawchanô kha vaw chhitha ula, a khoh vei khiah keimo ta eima vaw parai aw tahpa ta chho ei ta, Lôdu Nô nata Paw chhao chata ama myunô cha reihpha-hlapha hlâpa ta ama olâ adi awpa ta ama chho haw hra.

     Siaramaidi deikua cha a kyhpachâ chaipa Lôdu leipa ta a no dei ta olâ adi awpa hlâta cha sasyh a thietu ro awpa khoh via ta, Lôdu Nô nata Paw hnoh chata Ei Nâ, Ei Pâ, Lôdu, “ Kei dei ta olâ adi awpa he ei Khizaw noh yzie hnei leipa hawh dei a châ” Ei kyhpachâ chaipa ahlao leipa ta cha eima o cha lô o hawhta a châ ha bâ. nâmo biehneina ry liata ei y ha bâ tahpa ta chaheihpa ta a reihpapua haw.

      Lôdu Nô nata Paw-zy chata Nunu ei Sia, he hawhta na y khiah na Nôpawzy palôh tlao pasasa aw pi ta, namâ hnei awpa he pasaih leipa ta ama y pathlei aw, hmozy ama cha hiahri khohpa a châ aw ahyrai ta he hawhpa daihti liata ama Nôpaw ta na khoh hmeiseih tlai ma tahpa ama hiahri tyh.

    Siaramaidi chata, Lôdu, nâma leipa ta eima o kahmi kiah awpa hlâta he o chhao puasaipa ta sahroh hawhta viavi laih awpa he ei tlyh via.

     Lôdu, Ei dao, Na nôpaw ta bie cha hiahri awpa ama châpa vâta keima cha nama kahmi vaw kiah awpa pasaih aw vei ei, cha vaw chhitha aw na ta, nama kahmi deikua kiah thai mâh’pa châ vei..!

    Siaramaidi, Lôdu, ei pôhpa tlokhu, pachâna tlokhu ta nâma liata ahlâ khaipa ta kyh cha pachâ na ta, nâma chhaota palôh tlokhu ta kyh ei na pachâ khiah chita cha ei kiah lia na y chakhai lymâ tyh. Eima o liata na maophyuhna zydua cha keima ta ei tao khai aw..hnôh pazi awpa na khoh vei khiah atano tawhta na o he puasai aw na ta, khizaw noh cha awh hawh viavipa ta ei hmâ ha bâ aw…!

       Siaramaidi nata Lôdu cha olâ a di awpa amâ chhuah no chata Siaramaidi Paw chata achhôkha pakha tuahpa ta Mawtaw ta tlao kei padysa ha ta, Lôdu chhao cha Siaramai pazi awpa ta kaw pua awpa achhuah haw hra ta, châhrasala, lyuhchâpa chata Lôdu cha Siaramai nah o kahmi kiah mâh lei awpa ta nata Siaramai cha bie deita hiahria ta a mylâpa ta chhitha lilaw heih awpa ta achhopa vâta Lôdu cha hmiachhie kawpa ta ahnawh awpa achhuah taraw ta, anodeikua Siaramaidi ta Lôdu khâchâ angiehpa ta aparai hapa vâta Lôdu cha lyuhchâpa hmiakha leina chôta Siaramai cha pazi âchhua haw..!

Siaramaidi paw ta a tuapa chhao chata Siaramai ta Lôdu khâchâ ângieh hapa vâta atao n’awpa pahno leipa ta Mawtaw liana chata kiah ei ta, Siaramaidi nah o cha ama pangai haw.! Siaramai nah o ama tlô tawh chata Siaramaidi ta Lôdu cha khâchâ angieh ta ama o angiakhei lylia âchhuah tarawpa ta Siaramai nô ta Lôdu cha dôveipa ta, Lôdu, “Nâma deikua va kua chy la, atazâ hmozy vaw hiahri tua aw pi ta, mylâ eima vaw chhitha aw” tahpa a chho haw.

    Lôdu chhao cha palôh pha kawpa ta kua awpa âchhuah nota, Siaramaidi chata, Lôdu ku cha patupa ta, Ei Nâ, “Lôdu ta eima ochhôh âvaw ngia vei khiah kei cha khâpa e ei vaw tah aw? He o he ei pahrâ n’awpa châ khao vei, nama bie hiahri awpa cha a no y nota na hiahri teh u” 

Chahrasala, Siaramaidi cha anô ta a bâh cha paraipa ta a sawchanô Siaramaidi cha ochhôh lâ angiakhei ha ta, Lôdu chhao cha palôh keichheipa nata noza hmiachhie kawpa ta ano deita ta ama olâ cha a kua haw hra..

    Noh thô khôlâ liata Lôdu he zâkha cha thlâpâ avaw kawpa vâta a palôh a lie ngaita kaw ta, opy liahsa pahy khaipa ta hnôh lâ zaizyh cha thata ropady ta, Siaramaidi Nô nata Paw vâta a hawti tawhta a palôh â vaw khyh kawpa nata kyh avaw pachâ ngaita kawpa Siaramaidi hnazô âchyuh thei leipa cha a palôh pasa kaw ta he hawhta hla ta avaw phipâ ngâkawpa a châ.

         NÔHPI THLÔCHHO VÂTA MA

Tlâzawh noh ri pasih laih nota hy Rianai,

Khati lôhki ta syhna opi;

Paryh khoh aw tly ei tah nota,

Thlihua dei sikhôh lyuhbie avaw phaoh.

        Rianai kei rairao nawhnai vâta ma,

        Na nôhpi thlôchho zy na sikhôh ei;

        Lôhiah lyuhbie totie zy chhâ ch’aw hlâ mawh sala,

        Chhôso vâsâhna zy apai mawh na.

Hâzo vaw chhi ta opivaw chhôhnoh ry tawh,

Chhôso ta pachâ sili laih na;

Ei ngiah totie hnolâ zaizyh kha,

Rianai kei la my tlaruah aw va na.

Lôdu hnazô chyuh lei vâsâh âchhi bao cha,

Râh lia ulia nô hawh deita na;

Ei rôh tyh lielei noly chhiki,

Na thangiana rai pai thei va hlâ maw.

U uh, achhâ khaws.. a lâlao kaw na tah t’u, Cha rimâ cha.! Keima a rohtuhpa tlai chhao palôh keichheina vâta rohpazao thei khao va na. he tawhta eima pazao heih aw.

He hmo tawhta ei rei khoh kawpa cha Marapazy he mahnô nata mahpaw daihti tawhta eimâ pasôpanana châta Mâ na chhao hluhpi haw tyh pi ta a rônah kaw. Anodeikua khizaw hmahsiena â sâh lymâpa liata Dawh khoh nata hmo sôh kawpa eima haw ngâthlâhpa he bâhsai â daih kaw bâpa ta ei pahno cha maw!

Nô ta saw kyh apachâna vâta ngiarohpa hmo ahnei leipa hawhta

Chyhsapa hro lia heta kyhpachâna heta ngiarohna rai hnei tyh vei.

Chyhsapa hro liata Theisâ lao hlâta pasa viapa nata ahloh hawhta miah achhôpa

Hmazôh pha thai khao leipa cha Kyhpachâna he a châ thlyu aw.

Kyhpachâna vâta Raithlih palo pi ta,

Kyhpachâna vâta eima pahnei heih tyh.

Kyhpachâna vâta moku ramâ khai thei leipa ta y pi ta,

Kyhpachâna vâta moku pahâhnazy hneipa ta mâ phazy eima sa heih tyh.

Kyhpachâna vâta eima hmo kho chaipazy bâhsai pi ta,

Kyhpachâna vâta eima hmo kho leipazy tao’pa avaw byuh heih tyh.

Kyhpachâna vâta hiehâ ruchhô tyh pi ta,

Kyhpachâna vâta nôtlyhpa ta eima y heih tyh.

Kyhpachâna vâta hmiazy ahao tyh pi ta,

Kyhpachâna vâta unawh ta eimâ hmô heih tyh

Kyhpachâna vâta su chichhih chaipa chhao thlalôhna su vaw châ tyh ta,

Kyhpachâna vâta thlalôh chhih chaina su chhao chichhih chaipa avaw châ heih.

Kyhpachâna vâta kei a tahnazy vaw hnei pi ta,

Kyhpachâna vâ pyly ta moto a naoh awpa avaw byuh heih tyh.

Kyhpachâna vâta nielei doleipa ta y thei pi ta,

Kyhpachâna vâta hmo kawhkha niepa chhao pybiena avaw châ heih tyh.

Kyhpachâna vâta su âhla kawpa chhao âhnia chaipa vaw châ ta,

Kyhpachâna vâ pyly ta, su hnia chaipa chhao âhla chaipa avaw châ heih tyh.

Kyhpachâna vâta nozapasôhna miah tlôkhei tyh ta,

Kyhpachâna vâ pyly ta, chahraochatôh lylia’pa a vaw byuh heih tyh.

Kyhpachâna vâta ngâchhihna taihta zuah pi ta,

Kyhpachâna vâta hmo chynawhpa lia chhaota ngâchhihna miah pahneisa heih tyh.

Kyhpachâna vâta eimâ phuh leipa hmozy hnei’pa khoh pi ta,

Kyhpachâna vâta hmopha chaipa chhao ky awpa avaw byuh heih tyh.

    Châhrasala, he tluta Kyhpachâna pasapa nata âthuh ngaita kawpa he Khizaw a châna hawhta sapa khohleikhona nata aohraona vâta chyhsa palôh liata avaw chaphiechadaw tyh chamaw..! Nâ tyh beih hra tly ma?