KYHPACHÂ PASANA HELA AW!!!

KYHPACHÂNA TLAI HE LA AW!!

Story Image : Laihsa Daorili, Siaha

Chyhsa zydua pi heta kyhpachâna pikhei leipa nata hnei leipa eima y nahta pangiasa a chhih vei. He kyhpachâna vâna heta Khizaw liata chyhsa moh pathâhpa nata rôhnapazy chhao thata ama vaw bua ha hrapa a châ.

He khizaw liata chyhsa apihpazy hry liata piehpie-aohraoh chaipa ta ama rei tyhpa Russian Dictator Joseph Stalin chhao kha he kyhpachâna heta a pahnie ngâsâ. Kha hawhta ahro chhie kawpa nata piehpie aohraohna ta a biena chhâpa kha a kyhpachâ kawpa, a lahpinô Catherine Svanidje ta a thisai patoh tu hapa vâta na a châ a tah chamaw!

Kô 1907 liata a lahpinô ta a thisai no khata Stalin chata, “Ei pathipalôrupa lôtô hawhta achâpa panai theituhpa ychhôpa, kyh ei pachâ ngaita kawpa ei pahlei. Keima châta he chhaolei ta eina piepa hmopha chaipa nata sôh chaipa a leidia raohpa ta ei chyhsaheihzy kyh ei pachâna nata ngiachhiena palôhrupa ei hneipa zydua chhao tlokhuh a leidia khai ha hra’’, a tah chamaw!

Italy Dictator, Benito Mussolini cha lahpinô hnei thlâh hana chôta kyhpachâ hropa hnei ta. A hro ta a buakhei ngâsâ ha hra. A kyhpachâpa Petacci hnohta, “He khizaw liana heta nâma hleikhôpa la apahnieh n’awpa hropa hnei va na’’, tahpa ta châpaphaopa thlôh kawpa taihta a chapaipa kha a châ.

            Kha daihti no khata zawpi sawkhâ liata palôhtlâh leina nata adyuhna vâta Italy râh kha bua ngâsâ ha ta. Mussolini duahmo chhao duahmo chichhihpa liata a duah ta, chatana chô chata Petacci chôchâh hetana heta a reih, “A kiahpâh liata ei y no ngâlâh he na ei hu ei so tyh’’, tahpa ta. A daihti chhâna lâchhâh chhochhi kha cha a kyhpachâ chaipa kiah liata a daihti a hmâh.

A hmeiseihpa ta cha Abraham Licoln chhao kha, kha hawhta lahpinô achipa ‘thaibawih’ tahpa ta pahnopa a châna chhâpa cha a kyhpachâ chaipa lahpinô châta a hnei thei leipa vâ nata lahpinô â tlyh chheipa vâta châ vei ma khâ!?

Adolf  Hiltler, khizaw chyhsazy ta, “He paw pathipalôh liana heta sâbu tie chhao kyhpachâna y vei”, ama tahpa chhao kha, cha hawh ngâsâ ta kyhpachâna ahnei leipa la vaw châ vei. Kaolâh hluhpi hnei ta, â kaolâhzy hry liata pakha Eva Braun nahta ama chhâna cha Mussolini zy chhâ dâh nata â lyu kaw.

Copy and paste this code on your site.

Anodeikua Eva Braun nata amâ khoh nona heta Hitler heta Unity Mitfold zy, Winifred Wagner zy, Leni Lifenstall zy a pakaoh thlâh ha pyly. Hezy a pahnopa vâ heta Eva palôhru pasapa cha Pistol ta akasao a chhuah taraw ta, vâhneichhih kawpa ta pachha hmâpa a châ. He dei châ vei, ei hluhpi anosasy ta athie achhuahpa ta tei tyh ta, ama pachha hmâ ha tyh. He daihti liata Hitler ta Eva hnohta bie a reipa cha, “Eva, ei cha pahlei daihmâ ha cha zaw!! Khazohpa moh ta he hawhpa hmo he tao khao khah y. Eva, he chhaolei chô liana heta nâ châ khotuhpa rai y veih ei. Cha pahlei thei awpa châ chacheita va na”, tahpa ta a kyhpachâpa ku patuna chôta mothlih chhaota a reipa kha a châ.

Billy Graham chhao he kyhpachâna he khôkhâh pyly hra vei. Châ â chu daihti nota a kyhpachâ kawpa cha kyh a pachâ zie palâsa n’awpa ta mohropazy ta amâ pie tyhpa hlâta pha viapa nata angia viapa cha chalei ta. Cha pawpi cha a kyhpachâ kawpa pie awpa â chhuahpa cha vaw la khoh vei. Billy Graham palôh pasapa nata hiehâhpa chata cha pawpi cha tihrykyh liata thy ha ta. A viasa pha chaipa Wendell cha he hawhna heta thlai châ paphao pâ ta.

            “Kei chyulei rairao paw châta la awhsi ngiana zydua khi, â ngiana chei-ô zydua chhaota a lei khai haw! Hro ly n’awpa hnei khao va na”, tahpa ta. A viasa paw chata Rom 2:28 bie hmâpa ta pangâ achhuah taraw hrasala yzie rai hnei thei vei. Daihti reipi cha Billy he hro riethei kawpa ta a daihti a vaw hmâh tyh.

            He dei châ vei, chârohtuh rônahpa George Barnard Show chhao kha kyhpachâna tilaipi liata apachiepa ta, cha tawhta a hmo atyhpa tawhta a saduthliena phôhpa rônah kawpa Antony & Cleopatra zy rohpa ta a Film ta taihta eima mo theipa a châ.

Kô 1962 pa liata Actress hmipha kawpa Marilyn Manroe anosasyh ta â thiena chhâpa chhao kha a kyhpachâpa John F. Kennedy ta a hnei khoh leipa vâta palôhru pasapa ta athiepa hawhta pachâpa a châ hra.

Mao va chi, mao va na. Amoh rai rai chhao he KYHPACHÂNA na a châ ha! Kyh eima pachâ kawpazy ta maniah ama vaw uasa lei châhta Sâhti eima vaw palâ pâ tyhpa zy, luh pahiahna chôta Top Up ta maniah â daih lei ngâna taihta ‘keidao’ eima vaw tah tyhpazy he mao tiarâh ma pi. Satlia L.Beimokhâi ta hla phi ta, he hawhna heta Ruby ta angia kawpa ta a sapa “Kei einâ chhaihpa chi heta, na hro lia khâpa athôhna a tlôkhei” tahpa ta a za phi. He hla phituhpa heta a kyhpachâ kawpa ta lôh hro a phaosai hapa vâta George Bernard Show hawhta a saduthliena tawhta a phipa a châ thlyu aw.