MARA LAISA PAKHA NGIACHHI ÂCHHI KAWPA

 Ei kha cha hlano Mara pazyta Olyu ama sa dâh hmô awhpa ei khopa vâta nata ei viasa nô Music Video ataopa Shooting khei awhpata Zyhno nata Ahmypi likawh liata MADC ta Typical Village apaduapa lâ cha sie pita, Shooting zy liasa eima hnei khai ha ta tawhta zâlâ Daw 4:00 pa ta Typical Village cha puasaipa ta khihlâ sie awhpata avaw thao pita, Tipa eima vaw tlôpa cha azoh hapa vâta Tipa liata eima rie haw.

                    Amylâ mydipa ta eima khih Saikao lâ cha keidei ta ta phei ta za sie lyma na ta, eima khih cha my daw 8:30 pa ta ei za tlô. Ei zasiena eina khaobâ kawpa vâta cha noh cha noh y ta o liata y pa ta rakhô liata ei pazawh thlâh no ta Ulia tlai cha eima o kathi Avyh kô liata sâ ngâ kaw ta, Ulia sâpa ei theipa cha ei palôh thata na palie ta, Hmo totie patuapaluana eina pahneisa.

          Nochhôh Daw 12:00 pa ta rakhô tawhta thyu na ta ei dâphi kawpa vâta thopi saipa cha pa eihpa ta thopi saipa nata thobiapa cha ahmie na ta, thopizy liasa ei do khai ha tawhta ei yrupa papai s’awpa nata eima râh thatihzy pahno awhpa ei khopa vâta FB chhôhkha lâ cha ei charei syulyu haw.

                 Cha nota FB tlai cha laisa pakha ngiachhie âchhi kawpa thatih tlai cha eina vaw chho cha maw! laisa moh nata athatih sianôpa ei vaw hiahrih laihpa cha Mara Laisa hmipha ngaita kawpa nata kho âpao ngâsâpa, apôrao chhao chi hropa hmiakô lia chhaota zakhei âchhi leipa apalaikhei âchhi kawpa châ ta, a moh dopa deikua eima reih khiahta cha chhôhkha palôhpasa thei awhpa a châpa vâta DIZUA tlâh ei vaw tah aw..

                 He laisa he pilâhpa pano hneipa châ ta, narô pakha nata rilâhpa pakha a hnei. chhôhkha nalawh  kawpa châ ei ta, a pihlâhpa zydua hry liata apih patlua chaipa nata asovâh chaipa chhao a châ. Apaw nata nô hleikhôta apihlâhpa zydua chhaota ama palaikhei kawpa nata ochhôh rai chhao pahriasa awhpa ama kholeipa a châ.

          Achhithai kawpa vâta ama khih mo zy chhaota vâ-ia ngaita kaw ei ta, Satlia hlupi cha ano buakheipa ta daihti ama hmâ. Ama khisa duasu zy âchu tu leipa vâta Satlia kei, âtahpa zyta ama vaw khopa chhaota ano hlâta khisa thei viapa nata a tao thei viapa zy cha tlaichhai hleileipa ta, ano hawhta chyhsa rietheipa zy cha tlao âtly via tyh.

         Ei kha cha KTP tlârai hriana daihti liata Satlia pakha a siavo kawpa nata â pie dala kawpa Râhsâ heta a kiapâh liata ypa ta a pakyhpasia ta, Dizua chhaota Râhsâ cha apha kawpata a pakyhpasia hra ta, cha zâh tawhta cha Râhsâ chhôhso liata Dizua kyhpachâna cha ahlo hawhta avaw chhô pathao haw.

         Châhrasala Râhsâ chata Dizua cha a chhôhmaru liata kyhpachâ kaw hrasala a hmisâ âchu hraleipa vâta Dizua cha kyhpachâna lyubie thlai hlâ ngâ vei. Thlakha tlai a charei tawhta noh kha cha kyhpachâna lyubie hlâ awhpa a khopa vâta thophao awhpata hrua ha ta, Dizua chhaota Râhsâ ta thophao a hruapa cha paryhsapa ta thophaona lâ cha ama sie haw.

         Râh hmâpa ama tlôna ta Râhsâ chata Dizua nata ano châta thophao awhpa zydua cha liasa apakhi khai ha a tah tawhta buakha a pahâpa ta ama thlai zy cha liasa a pahi ta, a tha liasa a dâh khai tawhta Dizua hnohta hmo rei awhpa zydua cha rei pathao lymâ ha ta, kyhpachâna bie chhao cha a chho haw.

         Chahrasala Dizua chata Râhsâ hrozie nôchâ siapa a pahnopasia mâhleipa vâta ei khapita âryh tah awhpa cha a châ thaipa ta a pahno leipa vâta ama chhôhkha duasu nata achhichâna zydua cha Râhsâ hnota a chho haw hra.

          Râhsâ leipata Satlia pakha hlao hneipa saw a siavo kawpa Lailai heta cha vaw tlaichhai ngaita kaw hra ta, aru lâta Dizua cha kheita ma eina kho thei awh tahpa pachâpa ta athatih zy cha thata avaw chu haw hra.

      Chatanachata vâhneichhih kawpata Lailai cha 10+2  pha kawpata hlaotlohna vaw hnei ta, zâkha cha ama vaih MTP zyta alykheina hnei ei ta, cha zâ liata DIZUA chhao cha puapa ta Lailai alykheina lâ cha ahlao hra.

        Lailai he âchu haipa a châna hawhta khitlâh châta chyhsa phahnai ângiah kawpa nata hmâtlâh châ kawpa, chyhsa nôhtly kawpa a châ nota, anô nata Paw deikua chata Lailai lapinô awhpa châta ama saduthliepa cha hmih nata sâ phapa hleikhôta palôh kawhhloh kawpa nata khisana kyh lia chhaota âhnai tuleipa ama khokhei.

        Daihti zy liasa ama hmâ khai tawhta olâ adi awhpa avaw daih ha ta, anodeikua Lailai na o cha pathaipahâh awhpa zy abyuhpa vâta chhithatuhpa zy ta laisa pakha pano nata satlia pakha pano cha y patlua awhpata ama chhopa hawhta DIZUA chhao cha ypatlua awhpa liata ahlao ha hra.

            He nota Râhsâ cha DIZUA pathlie awhpata aru lâta vaw hâ thlâh ha ta, Lailai chhao cha DIZUA cha pathlie awhpata âchhua ha hra. Chatawcha Satlia pano Râhsâ nata Lailai chata DIZUA cha kyhpachâpa ta ama vaw kho rairie haw.

(Satlia pano Râhsâ nata Lailai ta Dizua kyh ama pachâna thatih siapa deikua he châbu liata palâsapa châ mawsala boh 1 chhôh liata tlô awhpata cha pasi kaw awhpa a châpa vâta mylâ hâno a Film ta tao awhpa khona vâta vaw chakâ chypa ta Dizua ngiachhi âchhih zie tlao eima vaw palâsa chy awh. A rei tuhpa zydua nama pachâthaina eima haw hmeiseih.)

          Dizua chhôhkha he ama khisana kyh liata adaikhyh/adôkhâ tuleipa ama châ. Ei kha cha ‘D’ Zua he ano byuchhiahpa ta khitlyna lâ sie ta, Tly awhpata achhuana khih atlô na ta otlô cha zyh lyma ta, Nôvah baokha saw a hneileipa khisa thei kaw penawh ENGA nata ENGI chhôhkha liana chata otlô cha apary haw. He Dizua tlôna Nôvah he Mara râh liata kô hlupi ama y hapa vâta ama nôvah ta Mara reih thai kawpa châ ei ta, anodeikua chi hropa chyhsa châ ei ta, ama chhichâna pachâpahrei leipa châta cha ama reih cheipa tawhta Marapa tlai khiahma tah thei awhpa ama châ.

       Chatanachata atlôna liata a pathai-pahâpa ta angai zy cha liasa asi khai tawhta atlôna penawh cha saw ama hnei leipa vâta daodo ngâsâ eita, nie thei awhpa hmo ypa maihta cha Dizua ngiaryh n’awpa pachâpa ta ama pie lyma hra. Dizua chhaota ochhôh hmo byuhpazy cha taopa lyma ta, noh no noh thôh cha, khih lia achâh tawhta ‘D’ zua cha khih lâ sie awhpa adaih hapa vâta amylâ Pachynoh cha sie awhpa achhuahna a hnei haw.

            Chahrasala Enga nata Engi nôvah zy chata ‘D’ zua cha kho âpao kawpa vâta nata ama tlaichhai kawpa vâta Pahânoh hmâ awhpata thlyu ha ei ta, Dizua chhaota atlôna nôvah zyta ama thlyuna ao cha dytha ngâ leipata Pahânoh cha hmâ awhpa achhua ha hra.

            Chatawcha Pahânoh my cha vaw chhi ha ta, apakhypazi awhpazy ama khopa vâta Pati nie hlâna chata chhôhkha pawhrâpa Enga chata chhôhkha chakaona hneipa ta Khazohpa biezy cha Biehrai tawhta lapa ta pasyuna hnei ta, cha liata abiereipa cha ‘D’ zua hnota keimo nôvah he saw hnei theileipa pita, nâma he Khazopa tawhta sawchanô pha ngâsâpa maniah piepa hawhta pachâ pita saw châta rie eima châ la aw tahpa achho haw.

            DIZUA chhaota khodâh hawhta niethei do thei awhpa saita pachâna ahneipa vâta apalôhruh liahmarihpa ta cha kho kaw ta, anodeikua apaw nata nô hnohta chho tua leipata aryh tah thlâh h’awpa cha akholeipa vâta he hawhta a reih. “Ei pâ, nama veilâ hmahta châhrasala saw châta nâ la awhpa nama khona thatih he khih ei tlô tawhta ei pâ nata ei nâ hleikhôta ei pihlâhpa zychhao ei vaw saohia tua awh” tahpata achhyna a tao. 

          Pati ama niepâ cha ta Enga chata Dizua hnota  “aw! Cha hawhta achâ khiahtala myla hriatua noh he na hnota vaw sie hr’aw na ta,  na Paw nata Nô hnohta ei saohia hra tua aw” 

        tahpa ta chho ta, amylâ hriatua my Daw 7 : 00 pa chata Dizua nata Enga cha khihlâ pangai awhpata Sumo liata ama vaw sie haw.

          Dizua pihna khih ama tlô tawhta ENGA cha noh 1 châh ta, Dizua chhôhkha ama ki chaina daihti zâ liana chata ama TV mo ngâpa cha chalihsapa ta biereina ahnei. A biereipa cha, “ Abeipa ta lapinô pha ngâsâpa na pie taraw ta, anodeikua vâchhie kawpata kô 10 tlai eima hnei tawhta tahmâ taihta saw hnei theileipa pita, khihpi lâzy pangaipa ta Dawty nano nanopa zychhao apamosa pita, chahrasala hnei thei pyly mapi. Ngiachhiepa ta nama saw DIZUA he rie na pie ula, eima ryu zydua to khai awhta abyuhna nata ângiahna hawhta Pachhie papha awh pita, nama chhôhkha châta tao theinazy a y khiahtala abyuhna hawhta a deichhy rairie awhpa chhao eima kho” tahpata mothli chhaota biereina hneipa ta thlahchhâna cha a hnei.

              Chatanachata thlahchhâna zy ama hnei khai tawhta Dizua Paw nata Nô zyta he hawhta Enga hnohta achhyna ama tao hra. “ Ei khapita paryhsa thlâh h’awpa duama aru kaw e, na sie tawhta keimo chhôhkha saita avaw hmô tua awh pita, Mawbail tawhta thatihzy eima chho awh” tahpa ama chhy.

                 Enga ta “Ngiachhiepa ta Saw châta pie awhpa nama pasai leipa chhaota maniah pachhie papha awhpata eima hnohta rie y sala, dyh achâna taihta keimo ta ângiahna hawhta eima pachhie-paph hra awh” tahpata ahawna atao lilawh ha heih.

        Chahrasala Dizua Paw nata Nô zy chata a ei-hrâhpa ta Dizua thatih apachiana ama hnei tua leipa cha aryh tah thei vei ei. Dizua Paw chata Enga hnota “Enga, tazâ la moku pahâh ngâsâpa ta a môthlâh ha tua la, myla na siepa tawh na ta keimo chhôhkhazy avaw pachia awh pita thlaita thatih eima cha vaw chho awh.

          Enga asie tawhta zâkha cha ama ki chaina daihti liata Dizua chhôhkhazy cha apachia ei ta, ama pachânazy ama rei hlâta Dizua palôh phaozie cha hiahrina ama hnei. Dizua chata he hawhta biereina ahnei. “Ei Nâ, ei pâ nata ei unawhzy sai u, kha khichhipa kha zahniata ei khitlyna liata ama o liata tlô na ta, na daodo ngâsâ ei ta, hmo totie nie awhpazy chhao i-ôh leipata eina pie ei. Ama nô Engi chhao sia kaw ta, anodeikua saw ama hnei theileipa deikua pei tah eita, ama palôh apasa ngasâ. Awnanopa liata chyhsa phahnai ângiah kawpa châ ei ta, ama khisa tôtuna zychhao ama khi liata a phasa viapa na ama châ e” tahpa thlai a rei haw.

            Dizua chhôhkhazy hra cha khizaw hneirôna saita pachâna ama hneipa vâta ama saw hry liata kho âpao chaipa Dizua cha Enga Saw châta pie hmeiseih awhpa ama kho taraw leipata ama thi hlâlei ama hnohta y awhpata bietluna cha ama tao haw hra.

            Apihlâhpazy hra cha khâpa thothâh pachâna hnei leipata ama nô nata paw hnota “ Ei pâ, ei nâ, Dizua he Enga nata Engi hnota hrochhôh y awhpata eima paryhsa ha tawh tly cha Enga  nôvahzy heta palôh tlokhu ta kyh ama pachâ thei n’awpata a ynapa Enga pho Sailo ahly thlâh ha sala khâpama a pei, a yna pho âhlypa heta ano ta kyh miah a pachâna nata keimo ta tha eima pasana he eima my ha aw tahna châ hlei va” tahpa ta bie lôhawhpazy cha ama reipa cha Dizua nô nata Paw heih hra cha ama sawnah biereipa cha ama pyh ha hra..

            Bietlunazy liasa ama tao khai tawhta ama saw hry liata ama kho chaipa Enga nata Engi zy saw châta pie awhpa Mawbail ta chho thlâh h’awpa cha a phathaipa ta ama pahno leipa vâta hâta ei 1 khôlâ liata ENGA nata ENGI cha ama nôvah ta ama khihlâ vaw tly awhpata chho haw.

         ENGA zy nôvah chhaota Dizua Nô nata Paw zyta tly awhpata ama hawpa cha ama chhôh khai ngaita kaw ta Pahânoh hmâpâ awhpata Pachynoh liana chata ama nôvah ta Dizua nah khihlâ cha ama sie haw hra.

        Chatanachata Pahânoh liana chata chhôhkha chakaona hneipâpa ta Dizua cha ENGA zy nôvah hnohta y awhpata ama pasaina zie zy cha rei ei ta, ENGA nata ENGI chhao cha aly ngaita kaw ei ta ama lyna mothli dei cha a thata aloh.

         Dizua chhôhkha zyta bie ama rei khai tawhta ENGA cha thlai aduapa ta alynabie reina nata Abeipa lâ thlahchhâna zy cha hnei ta, DIZUA chhôhkha hnohta mylâ eima sie tita nama chhôhkha ta vaw pathlie hr aula, khih liata alyna kyhchhina ei tao aw. Abyuhna nata ângiahna hawhta eima tlykiah lymâ aw tahpata biereina cha a hnei.

          Anodeikua ENGA nôvah zy he chyhsa kawhhloh kawpa ama châpa vâta amylâpa hriatua noh ta ei khapi ta sie thlâh h’awpa kholeipa ei ta, a moh ta ta DIZUA viasa rihchâh zy cha hruapa ta pati niepahmaona zy cha hnei ei ta, he zâ lilaw ta pathliena zy cha  ama tao. He pathliena ama hnei zâh heta DIZUA  kyh vaw pachâ ta, a palôh zydua vaw piekhai tuhpa RÂHSÂ châ deikua cha a chhôhso â patlaw/keichhei khaina daihti vaw tlô ha ta, ahy pahno awhpa riah chipa ta raithli dei a palo ngâ. DIZUA chhaota RÂHSÂ nata azaona ama hnei hapa vâta siesai awhpa cha ngiaroh ngaita kaw ta a chhôhso vâpi dei a cho hra.

          Chatawcha Hriaheih my chata ENGA  khihlâ cha ama chhôhkha ta Dizua chhitha awhpata sie ha ei ta, khih ama tlô tawh a mylâpa Pobie noh liana chata Enga nôvahzy cha ama khih sawzy cha hrua pata alyna kychhinazy atao.

         Kychhi zâ liana chata YMA zyta ama vaih liata laisa y/hnei thiehpa hawhta pachâpa ta Dizua yna Enga nôvahzy oliana chata daihti cha thapha ngaita kawpata hmâ ei ta, he zâ liata ahlaopa Khydi maihta cha Dizua hnazô tliatlâh cha moh ei ta, ama palôhru ry lâ liata ama kho ngâsâ hra.

                   Chatawcha Dizua chhôhkha zychhao noh 3 tlai ama châh tawhta khilâ cha sie avaw daih ha hra ta,   mylâ ama sie aw tahpa zâ liata Enga chata alynabiezy reina hneipa ta Dizua chhôhkhazy châta Phusa tlaw 50000 (Thypawngaw) nata Vaosa Kg 5 tlai pasâpa ei ta, a mylâ Pachynoh liana chata Dizua nô nata Paw zy cha khihlâ pangai awhpata ama sie haw.

                Daihti vaw sie lymâ ta, Dizua nata Enga nôvahzy a kao khona noh cha vaw chhi ha ta, hâta ei 1 amâ vaw ylâh chhôhta Enga nôvah zy chhaota Dizua châta chysia mâru ngâsâpa nata akho awhpa hmo cha taopa lyma ei ta, Dizua chhaota ochhôh hmo byuhpa zydua ahriapa hleikhôta khitlâh liata YMA hmotaona KTP liazy ta phahnai angiah kawpata pua lyma hra ta, ama khisawzy chhaota Dizua cha ama ly-ua ngâsâ.

            Kô 1 tlai ama vaw ylâh ha tawhta a kô heihpa 1989 liata Enga nôvahzy cha khipi viapa lâ apaih awhpata khona vaw hnei ha ei ta, ama paih n’awpa noh nata daihti chhao Tari 10 Phiapi liata achhuahna ama hnei. Daihti nata noh cha vaw sie lymâ ta, mylâ ama sie ha awh tahpa zâ thlâpâ pôlôpa (Fullmoon) na ta pachhyhpa ta Enga chhôhkhazy pathliena Prokram (Programme) pha ngâsâ taopa ta daihti ama hmâ haw.

        Mara dizuah chhaota a yna chhao rei leipata, hmia pahnopazy chhao hnei paki hmâ leipata khihro lâta amâ paih thlâh h’awpa cha a palôh alie ngâsâ ta, aru lâta a mothli deikua a pathla ngâ kawpa a châ.

            A mylâpa Phiapi Tari noh 10 pa chata Mawtaw tiambi (Truck) sâ 1 nata Taxi cha hmâh (Hire) pata amâ paih n’awpa Via râh lâ cha pangai awhpata, ama siena lâthlô liana cha ta ama palôh aliepa vâta bie achho tlâ leipa ei ta, lâthlô tlykha ngô a chalihpa ta Kali nô hawhta aru lâta a hipa ta lôlie ama tao.

          Zâ daw 11:00 rachhôh liata amâ pai n’awpa khih cha tlô ei ta, chahrasala khahlâ pita Enga ta akhitly nota o avaw chalei chiehpa a châpa vâta rairuna deikua hnei hraoh vei ei. Cha zâ cha Mawtaw ama kianazy ama khaobâ kawpa vâta ama hmodâzy chhao a phathipa ta pasopanô tlâ leipa ei ta, amâ môsai haw.

            A mylâpa khih avaw dei na ta ama hmozy cha pasopanôpa ta pathaipahâ ei ta, ama zia n’awpa chhôhpadâhpazy chhao pary-paripa ta ano-no-yta ochhôh rai cha ama hria. Cha amâ paina kô Krisama (Christmas) deikua ama yna khih parohpa liata hmâ awhpa ama khopa vâta Di thlâpa Tari 20 pa ta ama yna khih parohpa lâ cha Krisama hmâ awhpata ama sie haw.

            Khih ama kaw tlô noh mylâpa chata Enga unawhpa ta riasaw avaw sana chanô tlai cha Enga hnota  “ Nama saw ZO-A he nâmo ta rie mohôh ula, na unawhpa he chyhsa tlohpâ leipa achâpa hleikhôta keima ta chhy awhpa la eima khisana a rairu e” tahpata avaw thythlu haw. ENGA nata ENGI hleikhôta Dizua chhao cha rilâpa a hneileipa vâta aly ngaita kawpata Enga unawhpa riasaw ZO-A cha chhy awhpata amâ la ha hra.

            Krisama nata kô thiehpazy ama hmâ khai khôlâ liata ama paina khih lâ cha sie lilaw ha heih ei ta, Khih ama tlô tawhta ENGA unawhpa riasaw ZO-A cha ENGI nata DIZUA  chata nohcharei mohhôh lyma ei ta, khihpipa su lia achâpa vâta Zo-a chhao cha vaw laiseih lymâ ta, Kô 12 akaw tloh ha tawhta cha ENGA nata ENGI palôh cha avaw nano pathao lyma ha hra.

            Dizua cha kyhpachâ kaw hra ei sala Mara laisa a châpa hleikhôta ama thisai a châleipa vâta Zo-a  kyhpachâna cha ama nôvah palôh liata vaw lai via lyma ha ta, Zo-a cha kô 15 akaw tloh tawhta Siku phapa liata pakiasapa ta châzy cha ama vaw pachusa pathao haw hra.

      Chatanachata Zo-a hmo khopa cha taopa ta Dizua khona deikua cha achy chyta hnabei vaw pady lyma ei ta, chahrasala Dizua deikua a pahnopapua mâ vei. Ei kha cha Dizua ta anô nata Paw Enga nôvahzy hnota “ Ei nâ, ei pâ, ochhôh lia saita ypa la ei y ru tu ha ta, tanola Cinima na eimo kho hra, Phusa na pie hra teh u” tahpa ahawna a tao haw.

Chahrasala Enga nata Engi nôvah zy chata Dizua chanô na châpa hleikhôta maniah khichhai râh lia châta Cinima zy moh awhpa châ vei, Phusa pie awhpa chhao hnei hra mapi, na nawta Zo-a Siku kiana thla fi (Fee) a hleikhôta ahmo byuhchhiapa tao n’awpa chhaota thlakha ta Rs. 10000 (Thykha) cheih lymâ awhpa byuh tlôta moh leipata y thlâ ha tyh tahpata Dizua cha ama chhy.

Cha zâ tawhna chata Dizua chhao cha Pati chhao aphathipa ta nie khao leipata anô nata paw hnohta, Ei nâ, Ei pâ, nama ydâh he cha moh ei na ta, Zo-a avaw y tawhta cha na uasa khao leipa ei chita, Zo-a hmo khopa deikua cha nama taopa ngâthlâh haw tahpata a rei papua ha hra.

Noh thôh a châ tawhta a noh palina liana chata ama vaih liata viasa sahlaozy chata Dizua cha chareina su (Park) nata thyutliapa zy a paly-pa-uasapa moh awhpata vaw hrua heih ei ta, Dizua chhaota aly ngâsâ ta, anô nata paw hnota “ Ei nâ ei pâ, tanola viasazy chhaota su peimawhpazy eima moh lai aw” tahpa ahawna tao heih ta, cha nota Engi ta, Nunu, Dizua tanola khataih lâ hmahta tanola pua leipa la keima hra cha phathipâ leipa na ta, na nawta Zo-a he bâh kei tly la apha aw” tahpata vaw dytha ha heih ta, Dizua cha a vâsâh ngâsâ ta, a hiehâpa vâta a viasa zyta ama hruapa cha a pua thailei awhpa chhao chho khao leipata a hmia cha Phua phua sah pa ta rakhô lâ cha thlai apangai haw.

Hâta ei kha tlai  daihti avaw sie tawhta noh kha cha ama yna vaih kiapâh vaih kha liata apalypa-uasna Geims (Games) ataopasuana y heih ta, moh awhpa akho hrapa vâta anô nata Paw hnota “ Ei nâ ei pâ, noh hro khôtho pua awhpata su âhlapa lâ a châpa vâta nama paasai leipa chhaota atano cha eima vaih kiapâhta lia châ chho ta ataopasuana na eimo hra aw” tahpata ahawna atao ha heih.

Chahrasala Engi ta, Nunu, Dizua eima vaw tlô tawhta Dawrâ Beiphiazy pathai beileihpa pita atanola bâh pathaih la apha thlyuna tahpata avaw chhy palie heih hra ta, Cha nota anô biereipa cha mao-oh thei khao ngâsâ khao leipata “Ei hmo khopa eih thôh cha tlôkhei ha ei na ta, na dytha khai ha ei chita, he hawhta sahro ama hraipa hawhta o lia y ngâthlâh h’awpa la hoh va na Phusa na pie ula, ei nâ nata ei pâ khih lâ na ei sie ha awh” tahpata reihkah chahrâh kawpata anô ENGI cha thlai achhy palie ha hra.

            A mylâpa noh cha vaw chhi heih ta, Dizua chhao cha anô Engi cha hmo byuhpazy tlôkhei khoh khaoleipa ta apaw ENGA hnona chata “Ei pâ, Ei nâ nata ei pâ hleikhôta ei unawhpazy ahmô awhpa kho kaw na ta ngiachhiepa ta sie n’awpa phusa rie na pie teh”  tahpata chho ta, apaw Enga chhao cha a unawhpa saw Zo-a avaw y tawhta cha a ryu zydua pakhytuh awhpa hawhta pachâpa ta Dizua kyhpachâna cha a palôh liata nohcharei dia lyma ta, Dizua ta phusa avaw hiapa cha, chhôhkha nôhrâpa, na nô Engi kha chho la. Keima la phusa tlawkha chhao avao vana tahpata âchhy haw hra.

            Chatawh chhochhi cha Dizua cha achhôhkha hleikhô ta Marapa a châna siesaipa ta khizaw hneirôna khopa vâta ENGA nata ENGI saw châta a ypa cha avaw ngiapachhi via lyma haw. Khihpi liata ypa ama châpa vâta khataihlâ rai charei/pua awhpa chhaota phusâ sai ta abyuh thlâh hapa vâta nohcharei ta ochhôh hmo byuhpa hriapata daihti ahmâ.

        Noh kha a yrupa vâta Veranda liana cha ano dei ta a tyu pata Feisbuk (Facebook) cha lyubie hlâ ha ta, Satlia pakha tlai cha ano FB liata viasa châta avaw tao pata charei awhpata avaw hrua.

          Satlia ta charei awhpata avaw hruapa cha anô chho mawsala ei na dytha heih awh tahpa riah achipa vâta a reikahleipa ta pua syulyu ha ta Satlia hnona chata acharei syulyu haw. Zâlâ pati nie awhpa avaw daih ta Dizua cha avaw di thai khaoleipa vâta apaw  Enga ta DIZUA cha (Mawbail) ta Khawl (Call) awhpa achhuapa cha a Mawbail cha phie awf (Off) ha ta, Mawbail cheingei a awf pa cha apaw Enga chhao cha a hiehâ ngâsâ.

         Zâ daw 10:00 rachhôh amô awhpa ama chhua lichi nota Dizua cha avaw di ta, anô Engi hra cha khâpa bie hmahta hiahria leipata Dizua hnota “ Chao zuapa ma na châ? Khazia chanô tlai cha adina daihti chhao pahno leipata zâcho awkho pachhi awhpa na chhua! Mylâ tawhtala chyhsa hropa lâ yna apary la apha aw he hawhta na y khiala mao miah na paphyu awh” tahpa reihkah châhrâh kawpa nata ao paro kawpata âvaw hrâh hnao.

                Cha zâ liata DIZUA cha a môzia thai khao leipata rakhô liata palôhruh riethei kawpata a paliepathei kaw nota FB chhôhkha lâ cha a mymia n’awpata charei heih ta, a FB Message avaw pahypa cha a charei lâhpa Satlia pyly khata “ Myla he ei pihna noh kô 25 tyh heihna noh châ ta, Hawtel (Hotel) sâkha liata pati ei chhuanohpa liata pati nie cha hrua na ta, nie khai tawhta zakhano ta su eima tly hmâ leipa maihta ei cha tly khei awh” tahpa hruana cha a hmô haw.

                 Dizua chhao cha thotlâpa khih tawhta vaw laiseihpa a châpa vâta khihpi liata a ypa cha paphasa ngâsâ ta, Satlia ta a hruana cha FB tawhta achhy paliepa ta, Myla eima o kiapâh taihta Mawtaw Kar (Motor Car) ta na vaw dy ma y” tahpa ta satlia cha a chho ha hra.

            A mylâ my Daw 7:30 liana cha ta anô Engi ta Dizua hnota, “Dizua atanola na nawta ZO-A Siku kiana mâ thla (Fee) bâh va pangia ma y” tahpa ta vaw chho ta, chahrasala Dizua cha Satlia pa 1 ta Hawtel liata pati nie awhpata ahruapa nata charei awhpata a hruapa cha avaw parysa lâhlao hapa vâta anô Engi hnota, “ Ei nâ, tanola hmo hropa khâpa hmahta tao thaipa châ vei. Ei viasa pihna (Birthday) alyna liata pati nie na hrua ta, atamy chhao Hawtel liata viasazy chhaota pati nie khona eima hnei awh” tahpa achhy.

          ENGI cha ahiehâ ngâsâ ta a hâ dei chariehpa ta pua achalyu ha ta, Dizua hnota “ Na nawta thla Fi (Fee) pie awhpa na hoh leipa khiahta cha he o liata y khao leipa la na chi heihpa MARAPA zy hnota y ha bâh ma y” tahpata avaw chhy palie heih. Cha tawhta chhochhi cha Dizua nata ENGI zy likawh cha avaw hla via lymâ ta, DIZUA lâthlô cha meithâh hawhta avaw zoh via lyma haw.

            Dizua heih hra cha anô Engi bie reipa cha a papeipahliasa leipata Satlia pa 1 ta ahruana Hawtel liata pati nie awhpata pua syulyu ha ta, pati zy liasa ama nie khai khôlâ liata Satlia hnona chata su pha viapa nata ngiary âchhi viapa suzy cha tly laih lymâ ei ta, khih chhâna lâchhâ Satlia nata Laisa ama charei tyhna su ngiary âchhih kawpa nata thlihua phana su lâ cha charei syulyu ha ei ta, cha su liata thokô ry nodia pha kawpa liata ama tyu thlâh ha nona chata Satlia chata Dizua cha kyhpachâna lyubie a hlâ haw.

          Dizua chhaota anô nata paw Enga nôvahzy ta achô liata ama hiehâpa cha pachâ ta, mylâ hâno na vaw papua pathlei ei sala ei chhaichhâ n’awpa nata abyuh khiahta cha hrochhôh kaolâ awhpa vapa châta ei patu pâ awh tahpa pachâna a hneipa vâta Satlia ta Kyhpachana lyubie ahlâpa cha aparysa haw hra.

         Satlia nata ahy vâ hmahta angiah leipata lyubie ama pary no chata a Mawbail cha miskhawl (Miscall) nata Message vaw tlô ta, avaw mopa cha a ryu zydua to awhpata saw châta ala awhpata vaw hia tuhpa apaw ENGA tlai cha vaw châ thlâh ha ta, he hawhta Message cha avaw roh     “ Nunu Dizua, he hawhta na y ngâthlâh hapa la keimo châta mohchhie hlachhie raita a chhi ta, phusa cha pie awh pita, na chhôhkha yna lâ cha sie la vâ chi” tahpa Message avaw paphao.

            Message arei khaipa tawh na ta apaw Enga cha thlai fawn (Phone) palie ta, chahrasala Enga cha a hiehâpa vâta a Mawbail cha phie awf ha ta, atao n’awpa pahno leipata a charei lâhpa Satlia hnona chata kheitarai châsala na Mawtaw ta eima o kiapâh taihta rie na vaw pathlie la, mylâ ytu khihsa n’awpa dâh deikua Mawbail tawhta eima chho heih awh tahpa ta chho ta, Satlia chhao chata Dizua cha a kei pathlie ha hra.

           Ochhôh â kei ngiapa cha anô Engi ta a hmodâh zydua cha su kha liata vaw pahmao khai ha ta, Dizua chata a no-â tupa vâta Ei nâ, khaziama ei hmo, he hawhta su kha liata nama so khai thlâh haw? khâpa ma a y zie”  tahpata hiahrina tao ta, cha nota anô Engi cha a palôh liata a chhôh vaw

khai ngaita kawpa nata avaw rei kho beihleipa cha vaw rei papua ha ta, “Dizua, khahlâ zydua ta saw hawhta hmôpa ta saw châta châ vaw la pita, anodeikua tahmâla ZO-A y hata nâma na yleipa chhaota pei vei e, na kho khiata cha sie n’awpa phusa cha pie awh pita, na nô paw yna khih lâ cha va sie thlâh ha bâh ma y” tahpa ta Dizua cha avaw chho.

          Chatawcha DIZUA chhaota anô ENGI hnota khazia atahmâ maophyuh dâhlâhpa ta ei na so ei chi, saw châta ala awhpata eima chhôhkha hleikhôta keima eina saohia no ei chi kha nama reisi kaw mâ maw! Ivy nô ta a saw si leipa THAIBIE cha a chôphota kyhpachâ pakhei ta,asaw sipa IVY châta deikua hmo totie akhopa maihta atao tyhpa hawhta nama châ” tahpata paphôhpâ, cha pâ tahpata Engi cha thlai âtlie thlu ha hra.

          Amylâpa chata DIZUA cha khihlâ sie awhpata Sumo Kontar (Counter) cha pangai ha ta, Counter liata âtyu thlâh ha nota a chareilâhpa Satlia tlai cha ano byuhchhiahpa ta Sumo Kontar lâ cha vaw charei laih ta, cha nota DIZUA âtyu thlâh hapa cha hmô ta, thlai a râhnao ta, “DIZUA khataihlâ e na sie awh? Khazia na sie awhpa cha na pahnosa châ chi” tahpata DIZUA cha thlai avaw py pahly ta, Dizua cha angiahmâ ngâsâ ta, aduasu zydua cha Satlia hnona chata cha heih reih cheipa ta Satlia hnona chata âvapa hawh tlaita pachâpa ta achho.

                 Cha, Satlia chhao chata Dizua ta mothli chhaota avaw chhopa cha apalôh chakhei kaw ta, lapinô châta hnei awhpata a chho haw. Dizua chhaota khihpi su tawhta thotlâpa lâ pangai heih awhpa cha anô paw zyta eina ei-lawh pathlei aw ei tahpa a pachâpa vâta Satlia ahawna cha parysa pa ta Satlia nata cha Opi pary kho awhpata bietaina hneipa ta Satliapa olâ cha ama kua lilawh ha heih. He satlia he a nôpaw ta châ pachusa taraw ei ta, anodeikua a nôpaw pahno leipa ta a kho dâh hawhta y ta, Chyhsa o liata ano deita o tlôpa a châ.

       Hâta ei thôh tlai ama hnei tawhta âvapa cha Dizua hnota “Na y chakhypa hlâta cha na hmo zuah awhpata chysia chala p’aw nata chysia dao na tao awh tahpata Dizua cha chho ta, Dizua chhaota a hmeiseihpa hawhta pachâpa ta aly ngâsâ ta, noh kha cha âvapa chata chysia la awhpa chata râh hropa lâ siesai haw ta, râh hropa lâ achâpa vâta a Mawbail sim cha hmâ theipa châ khaoleipa ta, noh thôh a pha tawhta atlôna Hawtel hnei tuhpa nata Dizua vapa cha ama hnei haw.

           Dizua cha âvapa ta lapinô hropa ahneipa raita pahno leipata, bie achho theipa a châ khaoleipa vâta kheita ma kei deita y sala niebaw ei patopatia thei awh tahpa pachâpa ta a palôhruh rie thei ngaita kaw ta, zâ kha cha a yrupa ta TV amo ngâ nota âvapa lapinô ta pahnolei a pachâpa ta Dizua cha Lenlain (Landline) tawhta Dizua hnota “Na kyhpachâ ngaitapa hrochhôh vapa châta na tlypa paw kha Hotel sâkha a hneituhpa nô nata ama hnei ha” tahpata na vaw chhopa ma y eina tah e, tahpata vaw chho ta,  (Telephone) line cha avaw chiepâ haw.

           Zâ  Daw 12 : 00 vaw paro ta Dizua cha TV awf ta avaw fawn tuhpa Landline liana chata Khawl palie heih ta, chahrasala cha Landline ahneituhpa cha chyhsa hropa pi vaw châ ta, bie achho awhpa na chhuapa he vaih hropa chyhsa na a châ e” tahpa avaw chhy ta, Dizua cha a zozâkhidei ta rakhô liata palôhruh riethei atao.

           Hâta ei kha daihti asie tawhta Dizua cha hro hnabeidyna ta vaw bie lymâ ta, kheita ma he khihpi su lia heta y thei sala tahpa saita pachâna a hneipa vâta khiliah liata chapaw ahmôpa maih cha achhiepha thlu leipata vaw kho chakhy lyma ta, cha khihpi liata mo mahnôh zyduata Dizua cha chao zuahpa, sihrypa hawhta ama vaw hmô haw.

     Mara saw thokha ta DIZUA cha khihpipa su thokha liata  chyhsa hropa nata ama charei khohpa hmô tyh ei ta, anodeikua su kha liata y parei hmâ tyh leipata su hro lâ phie â pasie ha tyh. Tahmâ he Mara saw a châh ta ano hmô tuhpa thokha zyta khataih su liata a y tahpa cha FB tawh zy chhaota tluapa ta pachha papua awhpa ta ama tlua hai…….

      Châbu sâkha boh kha chhôh liata a thatih sianôpa nata a chhichâna zydua roh khai awhpa cha âki thei rimâ awhpa a châleipa vâta mo ta hmô thei cheingei awhpat a nothlapa (Video) ta patopatia haipa châ ta, mylâ hâno thlaita pua awhpata hmahla haipa a hâ.

Writer : LB.Thatlo, Saikao

Model : Ng.Veronica.

( Content Image (Model Photo) eima hmâpa nothlahpa nata he phôhpa heta âzaona hnei vei- Admin)