CHIPHO HROPA NATA AHNEI PAHLAONA

Khizaw lia heta dâh nata phôh hawhta pakhâpa chi a y tyh. Pakhâ thai rimâ lei awpa, zyh thei chyu ei sih la pha kawpa hluhpi a y hra. Eima rei awpa chhao he hawhpa ‘case’ a châ hra. Biedopa hawhta eima pachâpa he tapôh tlâ reih pi ta, chyhsa hluhpi eima chahri heih cheingei aw. Ahnei hapazy eima maochhiena kyh hawhta rie pachâ leip’aw sih la, ahnei awpazy eimâ khokheina hawhta tlao pachâ muh vy.

Khazohpa ta Israel mozy kheihta a chho ei?

Thokha ta cha, “Biehrai parohpa daihti châ ta e, Biehrai thiehpa daihti a châ hapa cha ma,” eima tah heih aw. He hawhta ei pachâ tyh; Khazohpa ta Israel sawzy kha kyhpachâ ngaita ta, â tly eihpa ama châ. Atanoh deikua khizaw pho to zydua cha Krista thisaih zawhzi ta a kyhpachâ ngaitapa vaw châ khai ha pi ta, chavâta Israel sawzy a chhihthana dâh ei kha eimâ mopâ lymâ awpa a peimawh haw. A kyhpachâpa pho eima vaw châ ha hrapa vâta. He vâ heta a châ thlyu aw, Biehrai parohpa he atanoh taihta eima hmâna chhâpa chhao.

Ryhpachaneina 7:1-5 liata, Hiti mo zy, Kirkasi mo zy, Amawri mo zy, Kana mo zy, Periza mo zy, Hivi mo zy, Zebu mo zy cha Khazohpa ta Israel sawchapawzy ta ama sawchanôzy ama pahneisa awpa pasaih leipa ta, ama sawchanôzy chhao ama sawchapawzy ama pahneisa awpa pasaih hra vei.

Cha hawhta pho hropazy nahta amâ hnei pahlao awpa a pasai lei chhâ chaina cha, Ano (Khazohpa) ama zi haina tawhta khazoh hropazy achhyna lâta ama chhihtha pathlei aw tahpa a chipa vâta a châ. Eima rei pazao via lymâ khiahta cha, Israel sahlaozy cha khizaw liata pho chyh chaipa ama châpa vâta pho hropazy ta ama pahleipadia pathlei aw tahpa Khazohpa ta a vaikhei kaw ei. He vâ heta, pho hropazy cha ama maisâhzy pacho ta, ama lôbôzy pakei ta, ama tlyliah bônazy thlu awpa nata ama khazoh nohthlahzy mei ta rao khai awpa ta Israel sahlaozy cha bie tlao a pie ei. Israel sahlaozy kha chi hropazy ta ama disao awpa pasaih leipa ta, khâchâ apabohsa awpa a khohpa ta â lâ.

Zawsua 23:11-13 – A Hrosohpa Zawsua hnohta Khazohpa bie vaw tlôpa, Izarei sawzy hnohta biesakâ a vawpa ei he reipasia via chhao vaw byuh tu vei; a sia kaw. Izarei sawzy hry liata pahrâpa pho hropazy nahta nôpi-nôvah ta atao rairie rai rai lei awpa ta a chhosie ei. “Chata leipa ta cha aheisai pathleipa ta (Khazohpa aheisaipa a reina a châ) he phozy a ypa sahlao nama hry liata apahrâpazy he azaokhipa ta âmo nahta nôpi nôvah ta ahneipa ta, âmo cha ahneipa ta âmo chhaota ama cha hnei hra khiata la, Abeipa nama Khazohpa ta he phozy he nama mohmô liana chata cha papuapa khao leipa aw ta. Abeipa nama Khazohpa ta he râh pha ngaitapa a cha piepa tawhtapa he, nama leidia khai hlâ lei cha âmo cha nâmo châta khoheih nata aphyh nata nama kâ châta tuna chôchahrei nata nama mokhaoh châta ahloh tlao ama vaw châ aw tahpa a siapa ta pahno teh u (23:12&13).”

He bie lia chhao heta Zawsua ta Izarei sawzy pho hropa nahta ahnei pahlao lei awpa ta biesakâ a vawna chhâ chaipa ei cha, pho hropazy nahta amâ pahlaopahli khiahta cha Khazohpa amâ heisai pathlei aw tahpa a chipa vâta a châ via chai. A sânona liata cha, Izarei sawzy cha pho chyhtapa ama châpa vâta, pho hropazy nahta amâ hnei pahlao khiahta cha ama râh lia tlaita ama disao khai pathlei aw, tahpa a chikhei vâ ei a châ. Kheihawhpa rai châsala, pho hropazy nahta amâ hnei pahlao awpa kha kao to liata âmo châta rairuna nata leidiana a tlôkhei thei aw tahpa a hmôpasia tu hapa vâta a châ rai rai.

Ryureituhpazy 3:5-7 – Izarei sawzy (pathlazy) cha Kana mo zy, Hiti mo zy, Amawri mo zy, Periza mo zy, Hivi mo zy, Zeru mo zy hry liata y ei ta, ama sawchanôzy cha lahpinô ta hnei ei ta, ama sawchanôzy cha ama sawchapawpazy ama pahneisa haw. Khazohpa mohmô ta hmo moleipa tao ha ei ta, ama khazohzy chakao ei ta, Baal nata Astarô khazohzy amâ vaw chhy haw. Khazohpa a pathi a ia ngaita kaw. Chatanachata, Izarei sawzy cha Mesopotamia beipa Kusarisathai ku liata Khazohpa ta zuah ha ei ta, kô charie chhôh tlai seichâna liata amâ tâh.

Izarei sawzy nata Mara sawzy he eimâ vaw lyu kaw ei aw. Pho hropa ama hnei nahta ama hneipa chi nata pho chhichâna nata culture amâ vaw hly ha tyh tahpa a sia kaw. He vâ heta Khazohpa ta a vaih ngâsâ ei. Amopâ ei suh u.

Âthaona 24:1-9 – Abraha cha vaw machâ ha ta, a sawchapaw Aisika cha lahpinô hnei â vaw daih haw. Ama pahrâ haina râh Kana chanô cha Aisika ta a hnei pathlei aw tahpa a chi ngaita. Chatanachata, a sei machâ hry liata a ngâ chaipa pakha hnohta Aisika ta Kana mozy lahpinô ta a hnei lei n’awpa ta a byhpi liahsa chapaosapa ta chhie a pasasa. Vaw thi pathlei ha sala, a sawchapawpa ta pho hropa a vaw hnei pathlei aw tahpa a chi hmeiseih. Cha tawhcha a sei cha Izarei sawzy pahrâna râh lâ tuah ta, Aisika lahpinô awpa a patluasa haw. Â kichochâpa ta eima pahno khoh khiahta cha Biehrai tlâ vaw reih t’u.

Aisika ta pho hropa a hnei ha khiahta cha Khazohpa khozie hawhta Izarei sawzy chhihtha thei khao aw vei tahpa Abraha ta a chi. Pho chyhtapa ama châpa vâta pabohsa ta, papôhsa awpa cha Khazohpa biepiepa a châ. Chapaw ta pho hropa a hnei khiahta cha a puhpazy cha pho hropa vaw châ ha aw ei ta, puhpazy bie pa-eipachhia cha a vaw ru kaw tlai aw. Chanô ta pho hropa a hnei ha chhochhi khiahta cha, mâ ta chaleipa a châ hapa vâta a chipho châna nata zyna cha a vahpa â hly ha tyh. Yh, he vâ tlai heta Khazohpa ta Izarei sawzy cha amâ boh thei n’awpa ta pho hropa rai hnei awpa a vaw paryhsa leipa a châ.

Ezra 9:10-12 – Izarei sawzy cha ama râh liata pahrâpa pho hropazy hnei pahlao khai ha ei ta, ama zyna ama papuapalei khai haw. Pho hropa lahpi/vahpa ta hnei lei awpa ta Khazohpa biepiepazy cha amâ heisai haw tahpa eima hmô. Cha tawhcha, Ezra cha Abeipa lâta reihpha cheih ta, Khazohpa pathi-iana amâ khôkhâh thei n’awpa ta Izarei saw, pho hropa ahneipazy cha riahpha kawpa ta achhaih awpa ta chhie taihta amâ pasasa tahpa eima hmô (Ezra 10-na reih pazao ei sih la).

 Chatanachata, pho hropa lahpinô ta ahneipazy chata ama lahpinôzy cha achhaih ei ta, Khazohpa lâta reihpha cheihpa ta atheihna ama hlâ.

                Ama pa-ipacha ngaita na tah t’u? “He ngâsâ he la, pha vei,” tah awpa taihta Izarei sawzy kha ama vaw ‘feeling’. He hawhta ama ‘feeling’ thlâh vei khiahta cha pho hropazy ta phie ama disao aw tahpa ama sia ngaita.

I Abeizy 11:1-8 eima rei khiahta cha, abei Sawlawmaw paraona nata Khazohpa pathi-iana vâta Izarei sawzy chôta hriena a patlôsapa thâtih eima hmô. Khâpa hropa vâta châ vei, Sawlawmaw ta Phirao sawchanô hleikhô ta pho hropa chanô hluhpizy lahpinô ta a hneipa vâta a châ. Khazohpa bie zyh khao leipa ta, pho hropazy a hneipa vâta bei Sawlawmaw cha a chhâna liata cha pho hropa khazohzy lâta a palôh tlao a vaw pahei haw. A lahpinô nata a puhpazy ta ama vaw pahnie syulyu thlâh haw.

Lahpinôzy hmotaotheizie nata vahpazy palôh ama panano theizie a sia kaw thlâh vei ma? Khazoh sathawthupa, bei Sawlawmaw hmahta he hawhta a palôh ama panano thei thlâhpa he. Keimo Marasaw chhochhi cha eima chheipâh liata pahrâpa chiphozy hry liata chyh chaipa châ pâ lâlao pi ta, pho hropa chanôzy ta miah ama disao nao kaw tlai aw. A sia thlâh haw.

Nehemiah 13:24-27 – He bie he la â rona dâh ualua ta eima moh tua aw. “Cha no chata Zudah chyhsa Asadô chanô zy, Amawna chanô zy, Môaba chanô zy lahpinô ta ahneipazy hmô na ta; ama saw khophiezy cha Asadô reih tlao cheih ei ta, cha sahlao reinazie hawhta dei leipa cha Zu reih ta reih thei leipa ei ta. Chatawhcha âmo lâta paphôh na ta; chhiesa na ta, thokhazy cha tu na ta, ama sâzy phia na ta, “Nama sawchanôzy cha chazy sahlao sawchapawpazy pahneisa aw veih ei chi,” tahpa reipa ta Khazohpa moh ta chhie pasasa na ta. Izarel beipa Sawlawmaw chhao kha he hawhpa hmozy liata a moleipa châ vei mâ?

Biehrai chhopasiana bu pakai byuh vei, a sia ngaita kaw. Izarei sahlaozy ta pho hropa reih ama hmâpa kha na Nehemiah ta a tao thei ngâsâ vei. Reih ta chi nata pho tao tlôh ta, ama reih ama hmâ khao vei khiahta cha Izarei phopi cha a leidia aw tahpa a sia.

A chô liata Biehrai bo nata châh eima palâsapazy tawhta chi hropa hneipa he chi chyhnawh viapazy châta cha leidiana lâthlôh a châ, tahpa a sia ngaita. Chi hropa lahpi/vahpa ta hneipa, ama saw nata vahpa/lahpizy Mara reih pathaisa ta, Mara chipho châna lâta palôh paheisa theipa rei awpa hluh veih ei. Achyhta deita châ ei ta, reithaitlâh ama châ kaw. A hluh via syulyu deikua leikhaoh eima chapao khai haw.

Chi chyh viapazy ta chipho lai viapazy sydie achhuahpa he hmo rairu kawpa a châ. Chavâta, sydie ta pahnie achhuahpa hlâta cha, âmo tawhta avaih ta, khâchâ apabohsa awpa he a pha via. ‘Attacking Game’ hlâta cha ‘Defensive Game’ he eimâ boh n’awpa chhaichhi pha viapa a lyu kaw. Ama ‘Counter Attack’ he chi â chhih kaw; vaih pahnie khao tyh ma pi.

“Â nano hnei vei chi to reih to he, Vâbei nawh hawh chana Kalvari lia, a nano hlei vei,” tahpa hlabie tlai he thlah eimâ palôhna chaipa miakha a châ. Tlai chuh, Khazohpa hmiakô liata chi to reih to he anano hlei ngyu’ ma pi. Anodeikua, eima reih nata chipho châna pahlei awpa he Khazohpa ta pasaih sala a ngia vei.

Cha khiahta la, hetana heta patuapalua tua rai ei si. Marasaw chi hropa vahpa/lahpinô ta hneipazy ta ama lahpinô/vahpa nata sawzy Mara reih ama pacheisa theipa ma hluh via ei ma, ama vahpa/lahpinôzy reih ama pacheisa hapa maw? Eima palôhrupa chyu ta achhy tua ei suh u. Ama lahpinô/vahpazy nata sawzy, Mara Awnanopa liata ykhei theipa ma hluh via ei ma, pho hropa reih hmâna Awnanopa lâta ykheipa maw? Ama saw, samoh nata sahlâhzy ta Mara reih ma amâ paoh via ma, chi hropa reih maw?

Hiahrina hluh ta, achhy awpa chhao a hluh aw. Patuapalua awpa hluh aw ta, pachâna thata a pasisa. Khazohpa heta pho hropa hnei awpa he pasaih bohbi vei tah awpa la châ vei, a pasaih cheingei aw. Anodeikua, eima reih nata chipho châna khâchâ pabohsa awpa maniah a khoh tahpa sia chanei ei suh u.

Khâpa vâta ma he hawhpa biezy he eima reih pâ ngâkaw? A chhâpa la naw, Marasaw he la eima vaw dadieh tu ha. Pho hropa ahneipa cha rei lei, keimo nata keimo ahneipazy pi tlai chhao hmahta eima sawzy reih hropa eima pacheisa thei thlâh hapa cha. “Eima yna su ta â chu vei he maw,” tahpa bie he eimâ tlychakapa nata hmia apahliena chaipa a châ tyh. Â do aw. Yh, he vâ tlai heta na eima dahdie kaw, eima tahna chhâpa hi. He vâ heta atanoh tawhta la eimâ boh thei n’awpa lâthlôh khâ patuapalua ha bâ ei sih la, Krizyhpa nô nata pawzy ta eima sawchanô nata sawchapawzy pasopakâ chyu ei suh u.

-HC.Malsawmthanga

College Vaih, Siaha.

(Camp : Tuikhuatlang, Aizawl.)