MARA LITERATURE HMAHSIENA LÂTHLÔH

Board of Mara Literature, MADC Siaha ta târi 30 Phiata, 2018 khata 'LIVE Talk Show on Mara Literature' pachhuapanoh ta, NSV Studio liata ahmâpa a châ. Panelist châta Rev. Dr. Laiu Fachhai, Puhpa Laicho Nôtlia nata Puhpa KH. Beithie zy raopa ama châ.

Mara Writers' Club logo

 Puhpa KH. Beithie â mâ thai leina zawhzi ta, a daihti chyta ta keima cha a vyuhpa ta ei tyuh. A chôtlâh liata ei ropa khi ei biepipa cha a châ. Research tao n'awpa daihti ei hnei hluh lei vâta pakiparai hmâ leipa na ta, ei saduthliena hawhta Record hnei thei va na. He hawhpa lâchhâh a sianô kawpa ta arona châbu hmô hra va na. Nôpaw viapazy ei saohiahna tawhta ei pahnona rakha ei vaw pahripaziah aw.

Mara Châbu

Châhnawh eima hnei tawhta daihti thabypa (1908-1950) likawh he cha Mara Literature he Awnanopa nata ahniahnipa sairô a châ, eima tah thei aw. A hluh via syulyu cha eima Missionary zy hriapasana theilâpa a châ hra. Mara saw tawhta châbu papuapa rei awpa pahno va na.

Rev. FW. Savidge khata pachâpahria leipapi ta The Lakher Language Grammar & Dictionary cha kô 1908 khata vaw papua ta, kha kha Mara Literature liata Châbu hmiatuapa a châ ngyu aw. Rev. R.A. Lorrain ropa Grammar & Dictionary of the Lakher or Mara Language cha kô 1910 khata ropa hawhta reipa châ ta, anodeikua kô 1951 ta Published-pa a châ (Kô 2016 khata Art & Culture Department, MADC ta ama Re-print).

Kha tawh khata Mara reih ta Reithaina Hlazy vaw palie lymâ ta, Hlabu chyhpa thlai eima vaw hnei. Biehrai zy vaw palie pathao ta, Zawhana Châbu cha kô 1914 ta a patlô. Biehrai Thiehpa cha kô 1927 ta papuapa a châ. Saku zy vaw padua ei ta, Achutuana Bu cha kô 1908 liata vaw tao ei ta, Awnanopa lâ tawhta Krizyhpa Chiemietôna zy vaw a vaw pua lymâ.

Eima rei hapa hawhta, Mara Literature daihti hmiatuapa lâ he cha Rev. R.A. Lorrain nata Rev. AB. Lorrain Foxall zy hniehnôh sairô vaw châ via chai ta, Châbu apuapa hluh via syulyu cha Awnanopa tawhta papuapa a châ via chai hra. Awnanopa nata Literature he Rev. Dr. Laiu Fachhai biepipa a châ hapa vâta â kichochâpa ta alaichadai va na.

Marasaw tlai ta Mara reih ta Châbu ama vaw papua tuapazy eima reih heih tua aw. Ei pahnotheina rakha liata Mara reih châbu hmiatuapazy nata papua kôzy:

1. Syna chhôhno - S. Mokia, 1948.

2. Quvadis - Mylai Hlychho, 1957.

3. Khataih lâ na sie aw? - Mylai Hlychho, 1962.

4. Mara History - Mylai Hlychho, 1962.

5. Mara Geography - A. Zakia, 1979.

** Awnanopa Thâtih - S. Mokia, 1984/85.

6. Nohpahli nata Hmeiseih - S. Mokia, 1987.

7. Hlâno Marapa Hro kô - S. Mokia, 1988.

8. Mara Political History - Laicho Nôtlia, 1989.

9. Mara Lâ nata Hlazy - Pachi Hlychho, 1992.

10. Hmahsiena Hleidy Part I-III - KH. Beithie, 1993.

11. Mara Grammar - A. Zakia, 1994.

12. Mara Lei Awhsizy - KH. Biethie, 1997.

13. Mara Pawpi Part - I - KH. Beithie, 1998.

14. Nyusa - Rev. NC. Vabeilua, 1999.

15. Zohna tawhta khaihna - F. Ngopaw, 1999.

16. Kyhpachâna Khizaw lia ‘Chhôso bieru’ – KH.Beithie

17.Mara phôhpa nata Ryhpazy - K.Mara

18. Hlâno Marapa haosai – Nôhro Hmôkô

Kô 1948 tawhta 2000 likawh lia heta Awnanopa tawhta papuapa Châbu hluhpi a y aw. Hezy he cha pahlao va na. Châbu hropa apuapa chhao a y thei hra, he he ei pahnotheina rakhapazy a châ.

Kô 2000 khô lâ tawhta vaw puapa Mara Châbuzy deikua â kichochâpa ta palâsa khao aw ma pi. Kô 2000-2014 chhôh ta châbu apuapa he hluh muarua vei. Awnanopa tawhta apuapa hluh chai ta, cha leipa cha reikhi-sakhi y pyly vei.

Kô 2014 tawhta kô tota Mara Châbu he reikhi tlaita vaw pua pathao lymâ ta, a ly â chhih ngaita. Mara Writers Club zy ta Mara Book of the Year cha kô 2014 tawhta a vaw tlyh lymâ ei ta, kô 2014-2019 likawh liata Mara Châbu 30 hlei tlai a vaw pua haw.

Mara Magazine

Mara reih ta Magazine pua tuapazy chhao Awnanopa lâ tawhta papuapazy cha alaichadai va na. Pahnotheina rakha liata Magazine papua tuapazy cha:

1. Khaihna (Quarterly Magazine of MADC), 1958.

2. Kô 1969-70 lia khata Puhpa Lebaw Solo nata P. Beiha zy ta Shillong lia Magazine miakha ama vaw papua hra. Magazine moh deikua pahno thei khao va na.

3. Education Bulletin (MADC), 1981. Puhpa H. Tholua nata K. Laihei zy ta ama vaw buakhei.

4. Bydi, MSO Aizawl, 1981. Puhpa J. Rawna cha Editor a châ.

5. Pasaipha, Ist Annual Magazine of Shillong MSO, 1994-95.

6. Pasaipha, 2nd Annual Magazine of MSO Shillong, 1998. Editor cha Puhpa Beihmingia a châ.

7. Awhsicharu, Quarterly Magazine Board of Mara Literature, MADC, 2002.

8.Khaihna, 2006 - Amôbyu MTP General Conference liata papuapa a châ. Buakheituhpazy cha Abie Nôtlia, Elvin B. Chozah nata Zosa Khaila zy ama châ.

9. Maraland Herald 'Vyhphao', 2008 - Tipa MSO Conference liata papuapa châ ta, Puhpa Colin C. Ngohai, Abie Notlia, Gospel Thalai Nohro nata PK. Bohia zy buakheipa a châ.

10. Iahdi, 2012 Puhpa J. Kholai nata Abie Nôtlia zy buakheipa a châ.

Hezy he Mara Magazine hmuatuapazy châ ei ta, he khô lâ deikua alaichadai va na. Awnanopa tawhta Souvenir, Journal nata Py nano nanopazy tawhta Annual Magazine, Souvenir tah leipa cha Mara Magazine rei tlâh pua pyly vei.

Mara Newspaper

1. Hmahsiena, 1954 - Puhpa A. Saimaw chhihthana ry liata, Puhpa A. Zakia cha Editor châ ta, Dr. S. Hrachu cha baokhâtuhpa a châ. Lunglei liata Teacher Training ta ypazy ta Quarterly ta ama papuapa châ ta, JB Press liata ama vaw pataosa tyh.

2. M-Ao (Marapa Ao), 1963 - Rangoon liata kô kha ta ei no papuapa a châ. Puhpa M. Hrakhu, S. Pailei nata L. Paithie zy ta ama buakhei tyh.

3. Mara Thlalâ, 1970's - Puhpa Mylai Hlychho ta a vaw papuapa a châ.

4. Rainô, 1977 - Puhpa Laicho Nôtlia cha Editor châ ta, kô 1979 ta a pachhâsa haw.

5. Dakaria, 1978 - Puhpa C. Riapha cha Editor châ ta, Tipa 'V' liata papuapa a châ.

6. Deiva, 1980 - Puhpa Nahlo Solo pathaopatôpa châ ta, Puhpa FC. Machô cha Editor a châ.

7. Hraisua nata Zawpi Ao, 2000 - Puhpa A. Zawngia cha Editor a châ.

8. Khaihna, 2005 - Puhpa B. Pacho nata Lalramnghaka Chozah zy ta ama papuapa a châ.

9. Awhsicharu, 2007 - Puhpa B. Pacho cha Editor a châ.

10. Deiva, 2013 - Kô 1980 liata ama vaw papua hapa cha pathieh heihpa a châ. Puhpa Robert B. Syuhlô, B. Vabeibaoly nata H. Beitlolai zy ta ama buakhei.

11. Mararâh Thlalâ, 2014 - Puhpa Robert B. Syuhlô nata Aron Chhachhai zy ta ama papuapa a châ.

12. Times of Maraland, 2016 - Puhpa B. Dawpho cha Editor châ ta, atanoh taihta a papua pazao lymâ. Mara Daily Newspaper pua chhôhpa a châ hai.

Official Organ Magazine & Newspaper

Awnanopa nata Py nano nanopazy ta Official Organ Newspaper ama vaw papua hôlô hra. Daily châ tlâ leipa ta, a tlâhpipa ta Weekly & Monthly a châ via chai.

KTP, MTP, MSO nata MCHP zy ta Souvenir/Magazine nata Newspaper zy ama vaw papua via chai. Hezy deikua â kichochâpa ta palâsa tiah aw ma pi.

Shillong MSO zy ta Pasaipha Weekly Newspaper khâ vaw papua tyh ei ta, atahmâ taihta ama papuapa ta ei pahno. Siaha lia chhao MTP College Vaih ta Siaramo Weekly Newspaper cha kô 2010 tawhta papua ei ta, atanoh taihta Regular kawpa ta Mara reih Weekly Newspaper papua y chhôhpa a châ. MTP Meisavaih, MTP Siaha Vaihpi, MTP New Colony zy ta Aolainô, Thlihua nata Huasua Weekly Newspaper vaw papua tyh taraw ei ta, sie parei veih ei. Huasua he MTP New Colony ta Monthly ta ama vaw papua tyh hra.

Local Church nano nanopa liata KTP Branch zy ta Mara reih ta Weekly Newspaper vaw papua hôlô ei ta, hezy he Mara Literature pahrotuhpa peimawh kawpa ama châ. Siaha khihchhôh nata Tipa liata Local Church hluh via ta ama papua chyu. Thotlâh khih thokha liata KTP zy chhaota ama papua hra.

Atahmâ duahmo

Publication Board, Art & Culture Department nata Board of Mara Literature, MADC zy zawhzi ta kô 2014 tawh khata Mara Châbu thata a vaw pua. A ly â chhih ngâsâ. Kô 2014 hlâ zydua ta Mara Châbu puapa nata kô 2014-2019 likawh liata apuapa he ahlie kaw muarua sala pangiasa va na. Chavâta ta atahmâ he Mara Literature ta daihti khochhihpa a hmâh hai eima tah thei aw.

Magazine/Souvenir he eima rei hapa hawhta, Mopakha ta sôhpaliena châta papuapa y veih ei. A tlia lia khata Deiva Monthly Magazine pha kawpa vaw pua ta, atahmâ he pua pazao khao mâh vei. Puhpa Robert B. Syuhlô nata B. Vabeibaoly zy ta ama papuapa a châ.

MCHP HQ zy ta Nohzuah Annual Magazine papua tyh ei ta, MSO ta Vyhphao Monthly Magazine ama papua tyh hra. Châhrasala hezy he regular kawpa ta la papua thei veih ei.

ECM KTP HQ ta Ambassador Monthly Magazine papua pazao lymâ ei ta, ECM KNP zy chhaota Dorcus ama papua hnolo hra. Krizyhpa Chiahmie (ECM HQ) he Monthly Magazine liata cha Regular chaipa a châ ngyu aw. CCI (M) Awnanopa chhaota Journal Magazine nata Newspaper ama papua tyh hra.

Board of Mara Literature, MADC ta Hla nata Bie Monthly Magazine cha regular kawpa ta papua lymâ ei ta, Art & Culture Department, MADC chhaota Quarterly Magazine Lyuhbie ama papua lymâ hra.

Awnanopa Weekly Newspaper zy rei leipa ta cha, Weekly Newspaper ychhôhpa cha Siaramo, An Official Organ of MTP College Vaih he a châ.

Daily Newspaper regular kawpa ta papuapa ychhôhpa cha Times of Maraland ngâlâh eima hnei hai. Awhsicharu he a tlia tawh kha cha regular khao vei.

He a chô liata ei vaw palâsapa he a kichochâ hra vei sala, a hluh via syulyu cha â hlao aw. Yh, he he Mara Literature hmahsiena lâthlôh liata eima duahmo cha a châ chy. Tôhpi phia ta, Mara Châbu, Magazine nata Newspaper zy a pua hluh via lymâ thei n'awpa ta hmahla â ngiah kaw.

Written by : HC.Malsawmthanga 

(HC.Malsawmthanga Profile kichopa moh/pahno khopa chata acho liata amoh (name) liana khita click pata nama hmo/pahno thei aw-Admin)