SÔRILI NATA A NÔ PALÔH KEICHHEINA

          Nôvah baokha Beiriapha nata Reizi he y ei ta, ku raihriapa ta niebaw â tluapa ama châ tarawpa ta kheihawhpa rai, rietheichhihpa rai ama hriapa chhaota ama palôh a raoh ngaita kaw ta, anodeikua, Pawhrâpa he Sahma niedo kawpa châ ta,chyhsa ry liata a hlaona khophie cha a niedona liata phusâ a hmâh ha chhyhpa a châ. A vaw pari han’ta cha zochhie hneipa chi a châ hra. Sawchanô Pakha Sôrili hnei ei ta, chyhsa o tlôpa ta khihsapa nata ama Paw ta nohchareih ahlaona tlua tyhpa nata ama nô heta âhmie âthâzy paliepachhu chhyhpa ta niebaw â tluapa ama châ.

           Pawhrâpa he rei chiehpa hawhta nohchareih ahlaona hnei tyh hra sala, khihsatôtuna uasa tu leipa ta, nie khi eima hnei khiah â dai tah thlâh hapa nata a niedo awpa saita pachâ thlâh hapa, Saw nata lahpi chhao hrâ leipa ta khôtho râpâh lia saita tlaitlaopa a châpa vâta Nôhrâpa châta hupo âchhih ngaita kaw.  Vâduachhih kawpa ta Pawhrâpa cha saw panona Chapaw kô 1 hlei a châ nota chyhsa hropa cha lahpinô ta hnei ta a lahpinô nah khih lâ a sie syulyu haw.

  Nôhrâpa cha nôhmeipa ta khih vaw sa ha ta, anodeikua, Khazopa ngâna khâchâ a hneipa vâta Abeipa ta phahla leipa ta niedo awpa nata busai awpa cha maniah  pazao thlâh ha aw ta, ei Sawnah chhao pitlopa ta ei papua ngiathia aw tahpa ngiapâna khâchâ a hneipa hawhta âhmie a zuana lia chhaota byhnâ to kaw ta, â daotuhpa chhao a hnei thei ngaita kaw tyh. Nôhrâpa he khi hropa tawhta dyh vaw châpa a châpa vâta chyhsa nô-u riah chi kawpa, a hmo khopa chhao chyhsa hmaohmô ngâh leipa, ano ta hriapapua awpa a khoh viapa a châ. Nôhrâpa ta âhmie paliepachhu ta zuachhia awpa cha a saw mohôh awpa a byuh hapa vâta rairunazy vaw hnei tyh ta, nolychhiki nata hâzoh chhiki a saw panopazy nata ochhôh lyukah rai buakheipa ta noh nata daihti a hmâh tyh.

            Nôhrâpa Reizi he saw sa a pahnie tu leipa vâta Saw pano a sa tawhta cha ano liata chieh-leina a hneipa hawhta ochhôh lyukah rai hriapasapa ta a rie a vaw thei ha  nahta cha ano liata sapa ngiaryh leina a hnei chhyh hapa vâta a sawnah ama pitloh n’awpa cha angiatiah vei. Khazopa ngiachhiena vâta Sôrili cha tlâna pha ngaita kawpazy to lymâ ta,pitloh pathla mâh hra vei sala tualitualâ khi vaw tloh ta Kô 10 tlai a kaw pha ha bâ hra. A nawta chapaw chhao cha khodâh hawhta â vaw râhrei thei ha hra. Ochhôh liata rai chynawh viapa cha Sôrili ta a Nô vaw bao thei ha bâ hra ta, a Nô chhaota â ly ngaita kaw.

          Mykha cha pati ama nie no heta Sôrili nawta chapaw seihnaipa chata A paw cha vaw pado ta, châhrasala, Nôhrâpa cha a sawnah vaw lai via ei sala ama palôh liahsa a hâ tawhta â vahpa duasu sia kawpa cha ei chho aw tahpa â chhua thlâh ha pyly vâta a sawchapawpa ta a paw a pado ngâpa cha a sie ha na tahpa ta a saw cha a dôvei.  Abeipa ngiachhiena nata Nôhrâpa ta Khazopa a ngâna alai kawpa vâta Sôrili nata a nawta Chapaw Byhnâ chhao cha ama hnatlânazy pha ngaita kaw ta, Ochhôh rai cha a Sôrili ku lia sairô â pahnieh thlâh haw.

 Anodeikua, Sôrili he Siku kiazy â kaw daih hapa vâta Beiphiah pasipa nata o pathaipa hleikhô hmo hropa tao hlei leipa ta, achâhta cha a zo châ rei awpa chhao o liata pachu awpa ama y leipa vâta châzy rei thei tyh leipa ta ama ochhôh chhao â tymâ kaw tyh.

          Ei kha cha Reizi he a sapa rie a vaw thei kawpa vâta Beih achho khai tawhta buakha a pazawh ha ta, a sawchanô Sôrili cha Siku kia daihti a hawh pathlei aw tahpa riah a chikheipa vâta pati nie chhielie ta Siku lâ a thao bâ awpa ta a chho. Sôrili chhaota a Nô ta a chhopa hawhta pati nie ta, liahsa a nie khai tawhta beiphiahzy pasi ta, Siku unifawm (Uniform) zy â vaw taona tlâ cha dawh vaw paro khâh ha ta, Siku a tlôpa cha Pachutuhpa ta Klâs (Class) a vaw la ngâkaw.

         Sôrili cha thai lei a pachâ kawna chôta nata noza ngaita kawpa ta Pachutuhpa hnoh chata, chi kawna chôta ‘Papu ei zâ ngia thei ma’? tahpa ta hiah ta, Pachutuhpa hra vaw uasa hlei leipa ta, Sôrili cha a noza tu hapa vâta nata pachutuhpa a chi tu hapa vâta a hmiaphaozy pua a nano khai ha tarawpa ta viasazy ta ama thai chhu awpa cha a chi kawpa vâta reikah a chalyu pâna chôta Pachutuhpa hnoh chata ‘Papu, ngiachhiepa ta ei zâ ngia thei ma’? tahpa ta hiah heih ta, pachutuhpa hra cha, Sôrili a zâ ngiapa ta nahta, dyuchhai liata thlai a paduasa haw.

          A viapakao paroh kawpa cha a hmisâ nata â hmie ziezy seisiapa ta thata ra ta, o lâta Hawm-uak (Home work) â vao awpa sâ 7, â vao thei vei khiah Siku tawhta papua awpa a châzie a chho khai tawhta patyusa ha ta. Sôrili cha viasa hryhri lia chhao tah thei leipa ta a mothlih cha pua pa-ô khai ha ta, palôh keichheih kawna chôta viasazy châ ama patlypa cha patly pachhuah hra ta, Siku ama bâ awpa chhao a ngiatiah khao vei.

       Zâlâ Siku ama bâ tawh chata Sôrili cha Pachutuhpa ta a taotia dâhzy nata viapakao paroh kawpa a hropa chalei awpa a byuh ziezy cha a Nô hnohta chho lymâ ta, a Nô chhaota a palôh pasakhei ngaita kaw ta, anodeikua, âhmie zuah chhyhpa ta khihsapa ama châpa vâta pachâ n’awpa pahno hlei leipa ta, a sawchanô cha reikah nai kawpa ta hmo yziezy chho ta, a byuh khiah Siku liata aluh chaipa hnohta pachâthaina tlâ ahaw lah vâ tahpa ta a sawchanô hnoh chata mao-oh hnolo awpa ta achho.

       A mylâpa ta Nôhrâpa cha Siku liata a luh chaipa Laikhua hnoh chata pachâthaina ahaw awpa ta pangai ta, ama duasu âchu mâh leipa vâta nata thla heihpa liata a sawchanô Siku Unifawm (Uniform) thiehpa chalei ngiathia awpa â chhuaziezy cha a chho lymâ. Laikhua cha khâpa thothâh hmah a pahno leipa vâta a no-â kaw ta, a pachâthai awpazie nata a pachutuhlâhpa hnoh chhaota hmo yzie hiahri awpa ta Sôrili Nô Reizi cha chho ta, Nôhrâpa chhao cha aly kawpa ta o lâ â di ha heih.

    A mylâpa ta Siku cha vaw kiah heih ei ta, a luh chaipa Laikhua cha pachutuhpa pakha Tluathâ cha hmo yzie hiahri ta, Tluatha cha sothai kawpa ta Sôrili â do leizie chho lymâ hra ta, a luh chaipa Laikhua chhao cha a hrialâhpa bao hnaita â do leina cha nyuthu awpa khona tlao vaw hnei ha hra ta. A hrialâhpa Tluathâ biereipa cha â dopa hawhta pachâna khâchâ a hnei haw.

       He noh ta Sôrili deikua, Siku a kiapa chhao viasazy hmiakha leina chôta Tluathâ ta eina pazei heih aw tahpa riah a chipa vâta my pati cha lao rôhpa ta nie chhielie ta, Siku o cha pangai tua chaipa a châ.  Pachutuhpazy ta Hawtinah cha chhôhpadâhpa to ama pachuna daihti vaw châ ha heih ta, Tluathâ ta Sôrili cha paduasa ta, Châ avao awpa a tahpa cha pareisa ta, anodeikua, Sôrili cha rei chiehpa hawhta ama ochhôh rairuna vâta nata palôh chatlie kawpa a châ leipa vâta Pachutuhpa ta châ avao awpa a tahpa zydua cha avao khai thei leipa ta a hluh via deikua â vao.

        Pachutuhpa Tluathâ hra cha pachâthaina a chyta hmah hnei leipa ta Sôrili châ â vao thei leipa maih cha châbu liata ei 10 roh chanei awpa ta a chho. Sôrili chhao cha Pachutuhpa biepiena cha za ngaita kawpa ta roh hnolo ta, a ro khai na tlâ cha Siku bâ daihti a vaw châ haw.  Anodeikua a roh khai hlâ lei Pachutuhpa ta adi lei awpa a tah hapa vâta viasazy liahsa amâ di khaina khô lâta a patlô lylia thei ha hra.

         Sôrili Nô Reizi hra cha a saw seihnai viapa cha pasana ta a chô lia vaw tlôthlu ta, a saw buakheipa ta a ypa vâta ochhôh rai tao awpa chhao rairuna a hnei haw. He hawhta Nôhrâ chaipa a châ thlâh hapa vâta a sawchanô utheipa cha Siku pabâsa chy awpa khona palôh taihta a hnei. Zâlâ kawpa ta Sôrili cha Siku vaw bâ ta, mohropa ama bâh khai khô lâ syulyu ta a bâpa a châpa vâta Nôhrâpa ta a saw cha a bâ hawhna chhâpazy hiahri ta, a sawchanô cha palôh pasa kawna chôta nata reikah chaheihpa ta Pachutuhpa duasu zydua cha chho lymâ ta, a mothlih dei a loh pâ ngâkaw.

            Nôhrâpa Reizi heta a sawchanô ku lia saita ochhôh rai soh thlâh h’awpa cha Siku kiah haipazy a châpa vâta ngiaryna hnei thai leipa ta, a theina rakha Beih chhopazy cha a sawchanô ta a tao thei mâh leipa vâta ano ta tao hnolo lymâ ta, ano Beihchho a tao nota a sawchanô utheipa ta a nawta Byhnâ cha a palaokhei tyh. Beiphia pasipa nata o pathaipahâpa cha Sôrili cha hawti ta a châ tarawpa ta a tao hnolo tyh hra. Ei kha cha Sôrili a kiana Siku heta ama pachutuhpa hry liata chyhsa pakha Sôrili vaw daodo ngaita kaw tyhpa achâhta Châbu taihta chaleipa tyhtuhpa cha pisi (Pension) ha awpa a châpa vâta pathliena hnei awpa châ ta, Siku hawti zydua aki khai ngiathia awpa ta pachutuhpazy ta biepiena ama tao haw.

        Vâduachhih kawpa ta he noh cheingei hra cha Nôhrâpa he tlâleina ta vaw patu ha ta, a sawchanô hnohta ‘Nunu uthei yh, va pua hlâh ha ma y’ a tah ngâkawpa chhaota Sôrili cha ano kyh vaw pachâ ngaitatuhpa pathliena liata â hlao thei lei awpa cha pei a tah kaw nota a Nô hleikhôta a nawta pachâ ta, khatluta ma ochhôh abua aw tahpa a pachâ tu hapa vâta nata a Nô ngia a chhie hapa vâta pua awpa cha khoh vei. A viasa penawh hnohta a rairunazy cha tlôkheipa ta ama pachutuhpazy hnohta chhop’awpa ta ahawna a tao. A viasa penawh chhao cha pahnokhei thai kaw ei ta, pachutuhpa Tluathâ hnohta, Sôrili ta pachutuhpa pathliena liata â hlao thei lei awpazie cha chho ei ta, Tluathâ cha a hiehâ ngaita ta, Sôrili pachâthaina raita hnei a chhuah leipa ta, a mylâpa ta Siku ama kia n’awpa cha a ngiatiah vei.

          A mylâpa noh cha vaw chhi ha heih tlai ta, Sôrili deikua, a Nô a tlâ via leipa vâta Siku cha kiah thei heih pyly leipa ta, Pachutuhpa Tluathâ chata a viasa penawh hnohta mylâ Pobienoh ta cha kiah ngiathia bâ awpa ta nata a vaw kiah vei khiah ano a pachu chhôhta y thei awpa a châ leizie taihta chho ta, a hrialâhpazy ta he hawhta pachâna a hneipa he pahno tiarâh leipa ei ta, Tluathâ ta hmo a vaw reih han’ta cha â do tlai sy khiah ma tah ei ta tlao ama zo ha chhyh.

       A mylâpa Pobienoh cha vaw chhi ha heih ta, Sôrili cha Tluathâ ta kheita ma eina tah heih sualuah aw tahpa pachâ ta ngiaroh ngaita kaw ta, kiah vei mawh sala Siku tawhta eina papua aw tahpa riah hra chi ha heih tlôh ta. He my cha Nôhrâpa Reizi chhao a pasai hnolo ta a sawchanô Siku a hawh pathlei aw tahpa riah a chipa vâta Beih chho patoh ha ta, Sôrili chhao cha pati liahsa ama nie khai tawhta thlai achhua ta, Siku kiah awpa ta â thao ha hra. 

          Siku dawh cha vaw paro ta, Siku hawti zydua cha a patlâh awpa ama tahpa vâta Sôrili cha ngiaroh ngaita kaw ta, châhrasala, vâhneichhih kawpa ta a luh chaipa Laikhua ta he my cha pahnosana nata hmo byuh hropazy pahnosana a hnei. Bie a rei khai nahta, Siku hawtizy cha ama chhôhpadâhpa nochâ amâ ngia khai ha hra. Subject sâno ama la khô lâta pazôsâ  pua ei ta, Sôrili deikua cha ochhôh lia ano deita ta a viasanah eih, châzy cha patly ta, buakhapi tawhta angia heih awpa ta angiana dawh cha a vaw paro ha heih.

           Tluathâ cha Sôrili zy class liata angia awpa daihti a châpa vâta angia ha ta, Sôrili a kiah lei chhôh ta, Siku hawtizy o lâta Hisâpa tao awpa a tahpa  cha pahmô chyu awpa ta bie pie ta, Sôrili châta deikua a eihrâhpa ta tao awpa ta papôhsana tao awpa nata a supa rei awpa ta chho ta, Sôrili chhaota Papôhsana cha thai ngaita kaw ta, a supa deikua o lâta avao awpa a châ tahpa pahno leipa vâta a vao thei vei.

           Cha, Pachutuhpa Tluathâ â khotlâh dâh nata chyhsa duasu a pahnokheithai lei dâh rimâ cha, Sôrili  Nahkao cha paraisa ta tyu heih dua heih ei 10 tlai pataosa ta, reih chhie kawpa hlâpa ta thata ra pâ lymâ ta, Pachutuhpa pakha pathlie nota â hlao leina chhâpazy cha pahno awpa a chhua leipa ta thata a ra. Sôrili deikua Pachutuhpa a chi kawpa vâta khâpa hmah reihpapua ngâh leipa ta palôhru lâta thata â sihna-i ngâkaw.

     Siku bâ daihti cha vaw châ ta, Sôrili cha heih hmia kha leina vâta Siku bâh awpa sai ta a palôh lia pachâna nata nohchareih kiah hr’aw sala noza hmiachhie ei la aw tahpa pachâna ta a bie. Nochhô â vaw dipa cha a Nô tlai vaw chasi ngâkaw ta, rakhô lia â vaw zia hlâh haw. A nô tlâleipa ta â zia thlâh hapa vâ chata, zâlâ siku kiah awpa chhao a chhuah khao leipa ta, anodeikua, a nô ta a sawchanô cha kiah heih awpa ta chho ta, châhrasala, Sôrili deikua ngiaryna a hnei leipa vâta a nô cha mohôh thei hra vei sala, a nawta chhâ mokhâh awpa a byuhpa vâta Siku cha zâlâ tawhta kiah khao vei.

        Zâlâ Siku dawh vaw paro ta, Sôrili a vaw kiah khao leipa cha Tluathâ ta a pahno nahta, a hrialâhpazy hnohta Siku a kiachhie zie nata biepienazy a phapa ta a zyh khoh leizie cha a haiphiapa ta thata reih ta, a hrialâhpazy hra cha khâpa ma Sôrili nah chhôkha duasu a châ tahpa pahno leipa ta Tluathâ reipa cha zo ngaita kaw ei ta, âmo liata ngiachhiena raita pikhei leipa ei ta, ama hry liata pachutuhpa pano deikua chyhsa duasu pahnokheithai kawpa ama y hra.

           A mylâpa Chutynoh chhaota Sôrili cha a Nô tlâleipa vâta kiah awpa a chhua leipa ta, a Nô ta kiah la a tah ngâkawpa chhaota a nawta pakha Byhna cha a Nô ta mohôh pâ awpa a byuhpa hleikhôta ochhôh rai hria awpa hra byuh pâ tlôh ta, a Nô tlâleina chôta kiah awpa cha a ngiachhie hapa vâta Sôrili cha Siku a chhuti haw. Chutynoh heta thlaita Ezâ( Exam) ha awpa nata Siku liata amâ chu chiehpa zydua a pua khai aw tahpa a châzie cha Pachutuhpazy ta phuah ei ta, Sôrili deikua a pahno leipa hleikhôta o lâta a Nô â huatlâ thei leipa vâta khodâh hawhta o liata châ a chu thei vei.

         Chyhsa palôh nainôsôpa chi hra châ lao heih ta, a viasanah hiahri n’awpa châh chhao pahno leipa ta, o liata a nô rai baopa ta a ngosiah thlâh haw. Mykha cha, daoh lâ alôh chalei awpa ta a pua nota, siku liata a viasa pakha ta hâta heihpa liata ezâ amâ thao ha aw tahpa nata Eza nota vaw pua awpa zydua cha vaw chho ta, Sôrili cha Ezâ mawh sala taochhie kaw aw na ta Pachutuhpazy ta ei hmia na pachhie aw ei ta, heih hmia kha aw va na tahpa pachâna a hneipa vâta Ezâ lei awpa ta khona a hnei. Kyh kha lâta Ezâ leipa ta y mawh sala Pachutuhpa Tluathâ ta kheita ma eina tao heih aw tahpa pachâna a hneipa vâta tiama papua sala, tlâ a ezâ lah vâ na tahpa bietluna cha a tao ha heih hra.

           A theina hawhta zâchareih, châ reih tyh ta, anodeikua, reih chiehpa hawhta palôhru thatlô leipa a châpa vâta pachutuhpazy ta avao khai awpa ta ama tahpa cha ano châta rairuna a vaw châ haw. A ngiaroh ngaita kawpa Ezâ daihti cha vaw tlô ha ta, Blebaw (Blackboard) liata hiahrina achhy awpa ama taopa cha a hluh via â chhy tarawpa ta, ei khapi ta châ rei â hriepa a châpa vâta pahlaopahli kaw ta, Ezâ daihti vaw chhâ ta, rizâ (Result) ama vaw phuahpa cha hlaotlona vaw hnei thei khao vei.

          Rizâ ama phuah noh heta Tluathâ hra cha Sôrili a vaw Fe (Failed) pa cha a palôh pasa aw tahpa rai pachâ leipa ta, tlao eilaw ha ta, Sôrili cha a palôh keichhei hlâh ha ta, Siku chhao bâh chy ta a kô heihpa tawhta apha kawpa ta kiah pathi heih awpa pachâna a hnei. O a di ta, a Nô hnohta, a hlaotloh lei zie nata duasu âchu mâh leipa vâta Siku apahâ chy awpa ta chho ta, a Nô chhaota a duasu â chu leipa vâta a sawchanô ta hlaotlona a hnei thei leipa cha pahnothai ngaita kaw ta, anodeikua, Siku bâhsai awpa deikua paryhsa vei.

        Daihti nata noh vaw sie lymâ ta, Siku pathao daihti vaw châ ha heih ta, Sôrili cha Siku kiah awpa raita thathyuna hnei thei khao leipa ta, hâta ei no tlai Siku  kiah khao vei. Nohkha cha ama pachutuhpa ano kyh pachâ kawpa nata a duasu pahnothai kawpa Thlalô ta Sôrili nah o lâ cha pangai ta thatih  â chu pasia haw. Pachutuhpa Thlalô ta Sôrili nah rairunazy  nata ochhôh â tymâzie cha a hmô nahta, a ngiachhie ngaita kaw ta, Sôrili hnohta, Siku  thlaita apazao heih awpa ta a chho. Sôrili chhaota Pachutuhpa ta a khokheinazy cha alythai ngaita kaw ta, Tluathâ ta a taotia dâh nata a mohnaoziezy cha mothlih pa-ôna chôta chaheih reih cheihpa ta Thlalô hnohta tlôkhei a lymâ. Siku kiah heih mawh sala viasa hmiakô liata noza hmiachhiepa ta eina tao heih tlamaw aw tahpa riah a chizie zydua chhao a chho khai haw.

             Pachutuhpa Thlalô cha a palôh pasakhei ngaita kaw ta, Sôrili hnohta, Siku liata hmo peimawhpa zydua taopa khai awpa â chhuazie nata Tluathâ thatih zydua chhao a luh chaipa Laikhua hnohta a tlôkhei khai awpazie chhopa ta hnangâna biezy a chho. Ochhôh liata hmo peimawhpa chalei n’awpa ta Phusâ Rs. 1500/- cha Nôhrâpa Reizi hnohta pie pâ ta, Nôhrâpa nata Sôrili cha aly ngaita kaw ei ta, ama Nôsaw ta Pachutuhpa Thlalô cha pazupathâ awpa dei khoh ei ta, Paw hawhta pachâna taihta ama hnei.

     Zâlâ pati nie khai tawhta Nôhrâpa cha Pachutuhpa Thlalô o lâ pangai ta, a hnohta, alynabie rei awpa nata a sawchanô Sôrili chhao Siku a pahâ chy ta ochhôh lia ano rai bao chy awpa a byuhzie chho awpa a chhua ta, Thlalô o lâ cha a pangai ha tlai hra. Alynabiezy reih ta, a sawchanô Sôrili cha Siku pahâsa chy awpa a châzie deikua chho khoh hlei leipa ta, a luh chaipa hnohta châpaphaopa ta chho awpa â chhua.

Nôhrâpa Reizi he châthaipa châ taraw leipa ta Châ rei nata ro cha a thai thlâh hapa vâta, a mylâpa liana chata he hawhta Siku liata a luh chaipa hnohta châpaphaopa a roh.

To,

            The Headmaster

            Kyhpachâna

            Primary Siku

Subj :   Ei sawchanô Sôrili thatih pahnosana.

Papu,

            Ahmiatua chaita Siku liata ei sawchanô nama vaw mohôhna kyh zydua vâta   alynabie ei cha reih hmeiseih ei.

            Eina pahnopa hawh ei chi ta, eima chhôkha duasu cha keima ku liata â pahniehpa, tlua chhyh nie chhyhpa eima châpa vâta ei sawchanô Sôrili he atakô cha chhôkha rairuna vâta ochhôh rai baokhâ awpa a byuh ha chypa vâta Siku apahâ chy awpa a vaw byuh haw.

               Cha hleikhôta, khihsa rairuna vâta nata ei sawchanô he Pachutuhpazy tao awpa nama tahpazy chhao he hawhta eima duasu a châ thlâh hapa vâta vaw taopa thei tyh leipa na ta, reih angiah leina vâta châ vei tahpa rie na vaw pahnokhei u la, ei sawchanô ta Siku pachutuhpazy biepiena hlao a vaw patloh thei leina kyh liazy chhaota nama ngiathaina ei châ haw ei. Châhdi deikua nama Siku liata kiah heih awpa ta rie miah nama pasai awpa ta ei châ haw chanei ei.

                                    Eichâ ly ngaita ei.

                                                 

                                                               Na ngâtlâhpa,

                                                                          

                                                              Reizi(Sôrili Nô)

                                                                                         

         Hâta heihpa hriatuanoh Siku kiah daihti  vaw châ ta, Sôrili Nô ta aluh chaipa hnohta a sawchanô Siku bâ awpa ta châ a paphaopa cha a luh chaipa Laikhua ta a vaw hmô nahta, pei tah ngaita ta, a hrialâhpazy hnohta, a phata ta deichhyta pakiasa heih awpa peimawhziezy reikhei ta, cha nota Tluathâ chata a haiphiapa ta Sôrili ta châ avao awpa â vao khoh leina nata Siku a hawh ngâthlâh hanazy cha reih lymâ ta, a luh chaipa Laikhua chhao cha Tluathâ biereipa cha â do tlai khiah ma tahpa pachâna a hnei nota ama hry liata Sôrili thapasa kawtuhpa Thlalô cha thlai â kaw dua haw.

      Sôrili nô rairuzie nata ama ochhôh â tymâzie hleikhôta ochhôh liata Sôrili kuphei saita a châziezy cha reih lymâ hra ta, deichhy amâ ngiahzie nata ama duasu pahnothai awpa a byuhzie hleikhôta Sôrili ta Siku a hawh tyhna chhâpa nata Ezâ na liata hlaotlohna a hnei thei leina chhâpazy a reih. A byuh khiah ano ta a mohôh awpazie nata Pachutuhpazy chhaota Siku hawti rairu viapazy cha ama hlao tawhta bao byuhna lia bao awpa a peimawhziezy thata a reih.

             Thlalô ta he hawhta Sôrili thatih dopa a vaw reih ha nahta cha, pachutuh hropazy chhao thai lei apachâ ngaita kaw ei ta, Tluathâ chhao cha a noza ngaita kaw ta, Sôrili cha, a Nô hnohta a phata ta chho ta Siku pakiahsa heih awpa chho awpa ta Thlalô ku liana chata ama pahnieh haw. Zâlâ Siku ama bâ tawhta Pachutuhpa Thlalô cha Sôrili nah o lâ charei ta, Sôrili Nô hnoh chata Pachutuhpazy ama bie pachiapa nata Sôrili Siku pakiasa heih awpa a peimawhzie hleikhôta Primary Siku a pua hlâ lei ano ta totie pachâ khaipa ta mohôh awpa a khonaziezy chhao a chho.

        Châhrasala, Nôhrâpa ta Pachutuhpa hnohta, kô a lâlaozie nata  kô heihpa liata a a sawchanô cha pha kawpa ta Siku pakiasa heih awpa â chhuazie hleikhôta Nôhrâpa pakha deita cha ochhôh â tymâzie reih ta, a sawchânô cha hawtita hmah châ chy hra sala, ochhôh liata a pahniena rakha a Nô rai bao awpa ângiahzie zydua reih lymâ ta, Pachutuhpa Thlalô chhao cha Nôhrâ chaipa ta a pahâ chy awpa ta a reih han’thâlâ cha Sôrili ngiachhie ngaita kawna chôta o cha puasai ta  âdi ha hra.

       Daihti nata noh cha ti lohpa hawhta vaw khô lymâ ta, Sôrili nawta Chapaw chhao cha vâro tlai vaw lai ha bâ ta, a palôh chhao a hâ kaw bâ hra. Mykha cha vâduchhih kawpa ta nôhrâpa Reizi cha Ti thai ta, kahmi a kiah awpa cha a pahniahpa vâta ti cha pathla chaimâh ta ano chhao cha chhôh lâ kheihawhpa ma â chhu ha tly? A rietheikhei ngaita kaw ta, a husopa taihta a rietheikheipa hleikhôta ochhôh hmo tao ta apiepâ awpa taihta rairuna vaw hnei ha ta, â zia hlâh haw.

      A mylâpa ta thohna o pangai awpa ta a sawchanô chata a Nô hnohta chho ta, châhrasala, Nôhrâpa cha a pasana vâta ano kho ta thohna o pangai awpa cha a ngâ leipa ta, mylâ a châ aw tahpa zâ chhochhi cha a riethei ngaita kaw ta, a mathlai taihta pua a tly khai ha ta, bie chhao reih thei khao vei.

      A mylâpa my noh vaw chhi  ta, a Sawchanô chata a Nô ta â viasa kaw tyhpa hnoh cha pangai lymâ ta, a Nô thohna o lâ pangaikhei awpa a byuhzie a tlôkhei. A Nô viasapa chhao chata thohna o cha pangaikhei ta, Sôrili cha o liata a nawta chapaw cha a palaokhei. Thohna o liata Dawty hro penawh hra pati ama nie lichih ma a châ ha ma, hmo hropa ma ama tao ma, y tlâ leipa ei ta, pakha ngâlâh he vaw y ta,  a yna su pangaipa ta a viasa nô ytukhisa dâh nata thlaita mohôh awpa ta a chhopa cha Dawty heih hra cha, Awfisar (Officer) pakha a mohôh haipa cha pachâ peimawh via ha ta, Reizi viasa nô hnoh chata tahmâ no la a mâ leipa na ta, tavia dawty hropa amâ vy nahta ama cha vaw moh aw tahpa ta chho ta, Reizi viasa nô cha a palôh apasa ngaita kaw. 

             Pachutuhpa â khotlâh kawpa Tluathâ nata Dawty tawhta âlâpasia kawpa cha tao theina duasu liata âduapa thokhazy cha riethei viapazy hlâta khihsa thei viapa nata mochhyu y viapa liata khokheina hnei via ei ta, ama pachâ peimawh via tahpa chhao âlâpasia kaw tah t’u. Nôhrâpa cha a pasana vâ chata ei khapita a chasipa a vaw sâh chaimâh ta a palôh a vaw thei khao vei. A viasa Nô cha Dawty hropa aw awpa ta Nôhrâpa a ypâ awpa hra y tlôh ei va, a nôpo ngaita kaw ta, Nôhrâpa cha ao paro kawpa ta  awsao ta, vâhneichhih kawpa ta ama kiapâh chhôhpadâhpa miakha liata tlâlei ypâ penawh ta vaw thei ei ta thlai amâ râhnao.

            Âmo chata ama ngia vaw chhie ngaita kaw ei ta, Dawty lâ cha thlai a râhnaopa ta Reizi duasu pha lei ziezy cha ama chho. Dawty hropa pakha cha o lâ tawhta â vy no vaw châ chho ta, Nôhrâpa Reizi â ziana lâ cha thlai a pangai. Vâhneichhih kawpa ta thohna akaw khaipa pachao ta a vaw piepa cha Reizi chhao a vaw huatlâ via lymâ ta, chhôh lâta pasana khiakhi kawpa tlyma vaw châ hraoh leipa ta, a kârupa â vaw mieh pasipa tlao a vaw châ. A viasa Nô chhao cha aly ngaita kaw ta, Reizi chaipa ta tlâ viana lâ a vaw pangai hapa hnaita Dawty pakhata a uasa leina thatihzy cha reih khoh hlei leipa ta, reikah leipa ta cho â thli hlâh haw. 

            Nôhrâpa liahsa a vaw tlâ via ha tawhta cha thohna o tawhta puapa ta o lâ  pangai ha heih ei ta, Nôhrâpa chhao cha nohkha noh-no tawhta cha ochhôh rai chhao a vaw hria thei lymâ ha hra. A sawchapaw seihnaipa chhao cha a palôh kaw hâh via lymâ ha hra ta, a nô rai hriapa chhao pabua tu khao hra vei. A sawchapaw chaipa ta a palôh a kaw hâh via ha tawhta cha âhmie-âthâzy paliepachhu awpa  a chhua ha heih ta, anodeikua, khihpi viapa lâ pangai awpa khona a hnei haw.

      Châhrasala, ei khapi ta khihpi pangai awpa cha a rairukhei hapa vâta âhmie zuana phusâ tlawkha tlawno pachô ta, Kô chhâ chy Phiapi rachhôh liata khihpi cha pangai awpa achhuana a hnei. Nohkha cha Pachutuhpa pakha Sôrili kyh vaw pachâ kaw tyhtuhpa Thlalô ta Reizi nah o lâ cha vaw charei heih ta, châhdi lâta Sôrili Siku Form nata Châbu hleikhôta hmo hropa a byuhpa maih ano ta taopa khai awpa ta a khona thatihzy cha Reizi hnohta a chho. Reizi cha â ly kaw nota a yna khih liata pahrâ parei thai awpa a châ khao leizie nata ano châta khihpi pangaipa cha a phao â hua via thlyu aw tahpa a hnabeisei ziezy chho hra ta, Pachutuhpa palôh a pahnie ngaita kaw.

         Pachutuhpa Thlalô chata, Reizi ta cha hawhta a vaw rei ha nahta cha, kyh kha lâta a pyhkhei thai kaw ta, anodeikua, ama sie n’awpa daihti a tlô hlâ via ta pahnosa awpa ta ahawna a tao. Reizi chhaota Pachutuhpa ta cha hawhta ama sie n’awpa daihti pahnosa awpa ta â hawna cha pachâ peimawh  kawpa ta pahnosa ngiathia awpa a châzie chhao a chho hra. Avaw zâlâ pâ laih hapa vâta Pachutuhpa Thlalô chhao a di ha ta, Reizi chhao cha Beih chho â thao pâ laih ha hra.

       Zâlâ Beihzy vaw syu ta, pati ama vaw nie khai na tlâ cha vaw zoh pâ laih ha heih ta, Nôhrâpa chata a saw utheipa Sôrili hnoh chata, khihpi ama pangai tita cha ano khôtho râpâh hmo zuachhiapa ta a y h’awpa vâta ochhôh lyukah rai liata tiama papua via awpa a byuhzie nata a nawta chapaw chhao ano ku liata â pahnieh via h’awpazie chho lymâ ta, Reizi chhao palôhâh ngaita kawpa ta a Nô ta hmo a chhopa zydua cha a phata ta chabo ta, a palôh lia avao ngâthlâh ha awpa â chhua hra.

      Noh nata daihti cha a thei hmâ leipa ta thlai sie para lymâ ta, khihpi ama pangai n’awpa noh cha hâta eikha dâdei a vaw byuh ha bâ. Ama siena daihti âhnia hapa vâta Nôhrâpa ta a sawchanô utheipa Sôrili cha ama pachutuhpa Thlalô hnohta hâta heihpa liata ama sie ha awpa thatih chho awpa ta a tua. Vâhneichhih kawpa ta Pachutuhpa cha a khiliah chareina lia a hmôchhopa vâta tlao chho ha ta, Pachutuhpa chhao Reizi sawchanô nô cha pazipa ta ama o lâ charei awpa ta a pangai ha hra.

             Pachutuhpa Thlalô he chyhsa kyhpachâna hnei ngaita kawpa a châna hawhta Reizi nata a sawzy khih ama puasai awpa cha a ngiachhie ngaita kaw ta, a palôh dei a keichhei thlâh haw. A chhâpa cha khihpi su cha pha kaw hra sala, a sawnah khotlâpazy hluh aw ta, hmo totie chalei awpa nata o tlô mâ pie awpazy a byuhpa vâta Nôhrâpa saita a pachâ awpa cha pachâkhei ta, a palôru rie a theikhei ngaita.

        Châhrasala, Nôhrâ chaipa ta â chhua ha tawhta cha thlyu thai rimâ awpa châ leipa ta, thlahchhâna daihtizy hmâh ta, Phusa Rs. 3500/- cha khihpi su liata amâ patopatia n’awpa ta Nôhrâpa hnoh chata a pie. Reizi cha â lyna vâta a hmia lia a vaih hmâ leipa ta raithlih ti dei palo ta, a saw seihnaipa chapaw chata Pachutuhpa cha hmia pahno kawpa hawhta a bâ lia a ngieh ta, pathlie awpa chhao khoh khao vei.

Pazao heih awpa.

       Pachutuhpa cha y ngâthlâh thai awpa a châ leipa vâta Nôhrâpa ta a sawchapaw va cha chalo ta, Thlalô cha palôh zao kawna chôta o lâ a di awpa ta pua ha ta, Pachutuhpa hrozie nata hmotaopa chata Nôhrâpa cha a palôh pahnie ngaita kaw ta a palôh liata Khazopa bie miakha âvaw lâpa cha “Nôhmeipazy vahpa châ aw na ta, Nôpaw hnei leipazy Paw ta ei châpa aw” tahpa he châ ta, ano châta Khazopa ângiapâna kyh liata hro pathiehtuhpa nata pa-ituhpa vaw châ ta, Abeipa lâta alynabie reina thlahchhâna cha ahmâhpazi.

           Khichhôh chyhsazy ta Reizi nata a saw nah Siaha khihpi lâta amâ pasie awpa cha vaw pahno tlâ leipa ei ta, hânoh ama sie ha aw tahpa zâ liata Pachutuhpa Thlalô ta Reizi nata a saw nah khihpi lâta amâ pasie aw tahpa cha Awnano nôpaw pakha o achareina liata a reipapuapa tawhta Local liata chârotuhpa (Karanie) cha vaw pahno ta, anodeikua a zothâ charei awpa ta rairuna a hneipa vâta mylâ ama sie aw tahpa zâta a chakao lâhpa pakha hrua ta thlahchhâna chhaota thlyu awpa achhuana ahnei.

           A mylâpa noh cha vaw chhi ha ta, zâlâ daihti liana chata Awnano liata Nôpaw pano ta Reizi nah cha tlypa ta thlahchhâna daihtizy ama hmâh khai tawhta Reizi hnohta khodâh hawhta ama tlykiah thei lei zie pachâthainazy ahawpa ta khih liata khisa awpa nata ama thei leipa chhaota kô zy chhâ pachhâ awpa ta Nôhrâpa cha ama chho.

     Châhrasala, Reizi cha sie awpa ta âchhua khai hapa hleikhôta ano châta khihpi liata pahrâpa cha ano châta hmo zuachhiana ârypaoh viana zie nata a saw nah siku kiana liata hmahsie viana a châ thlyu aw tahpa a hnabeiseinazy cha chho lymâ ei ta, Awnano Nôpaw nah chhao cha Nôhrâh chaipa ta cha hawhta avaw rei han’ta cha thlyu raruah mawh ei sala a khisana liata baokhâ thei tlôh leip’aw sih la tahpa pachâna ama hneipa vâta reih baichha ngâh khao hra leipa ei ta o lâ cha amâ di ha hra.

        A mylâpa liana chata khihpi viapa lâ a paih awpa ta a thao ha tlai ei ta, khihpi liata o tlôh awpa patopatia chiehpa a châpa vâta rairuna hnei hraoh leipa ei ta, vaih chaki lâchhâh ta o miakha a tlô mâ nao kawpa liana chata tlôh ei ta, ama tlô tawhta a mylâpa liata ozy pathaipahâpa ta a hânohpa tawhta cha Nohrâpa Reizi cha chyhsa eih âhmie zuahlao awpa tluapa ta adaihti nata noh cha hmâh ta, a utheipa Sôrili cha a nawta palaokheipa ta nohchareih o lia daihti a hmâh hra.

       Khihpi ama pangai tawhta hâta ei kha a khô tawhta cha Krisma thlihua chata khihpi liata pahrâpa Manôh nata daoh hneituhpazy palôh kô vaw daih pathao ha ta, chysia nata hawti khoh awpa chi nano nanopazy cha ama daoh liata ama soh pathao ha hra. Cha nota Nôhrâpa deikua khiliah âhmie a zuana liata chasipaw ziza hiazazy chata kahrao hriabu ta vaw tlôthlu ha ta, chasipa lâta âchhi haw.

    My kha cha alôh ama hnei khao leipa vâta Nôhrâpa ta a sawchanô Sôrili cha tua ta, a nawta chapaw chhao cha a uta khâchâ a u hapa vâta Sôrili cha a nawta achhih laihpa ta daoh lâ cha Alôh chalei awpa ta ama pua haw. Daoh liata hmo ama chalei khai tawhta o amâ dina lâchhâh lâthlô kiah liata hawti nah hmo khoh awpa ama zuana su liata Tripar nata Meithei nothlah ama zuapa cha Sôrili nawta chapaw chata hmô ha ta, a mo a la kawpa vâta daoh lâ cha pangai ta, a uta hnohta chalei va awpa ta âhnaw haw.

        Sôrili cha a hiehâ ngaita ta, a nawta cha pazei awpa taita khona hnei ta, anodeikua khiliah râpâh liata tu awpa cha khoh hmeiseih leipa ta a nawta cha o amâ di tawhta zâlâ chalei awpa ta a chho ngâkawpa chhaota a nawta chapaw cha mothlih chhaota hmo ama zuana lia cha â nôh hlâh haw. Daoh hneituhpa hra cha chi hropa bao hnaita Hawti a cha ngâkawpa hlâta cha a hmo zuah thei va na tahpa lâchhâh sai pachâ ta, Sôrili hnoh chata a nawta cha su hropa lâ vawkhei h’awpa ta a chho.

            Sôrili cha a noza ngaita kaw ta, a nawta kho leina chô chata parai ta o lâ cha âdikhei lyma ha hra. O ama tlô tawhta a nô hnota hmo yzie cha chho ta, a nô cha a hiehâ kaw hrasala, a chhôchhipa palôhâh leipa hmo khopa cha pahnothai ngaita kaw hra ta, mylâ hânoh âhmie a zuachhiana tawhta a chalei va awpa ziezy chho ta, a sawchapaw va cha a palôh a patlâh. Nôhrâpa chhao avaw tlâ via tawhta cha Krisma tlô n’awpa daihti cha hâta ei no deita abyuhpa vâta hmo zuachhiapa cha âmochhih ngaita kaw.

        Châhrasala, chyhsa eih paliepachhuahpa a châpa vâta a pachâna hawhta a thôh tu leipa ta, a saw nah chysia hleikhôta o tlô mâ nata ama nohto nie awpa hleikhôta hmohropa abyuhpazy a y hapa vâta a saw nah chysia chalei n’awpa a khichao thei leipa ta a y tlamaw aw tahpa riah chipa ta a palôh cha ngiaryh leina ta a bie thlâh haw. Khazopa ta ahriapasana liata byhnâ pie ta, o tlô mâ nata ama nohto nie awpa hleikhôta a saw nah Krisma chysia chalei n’awpa khi cha phusâ avaw hnei haw. Anodeikua, a saw nah chysia, pheiky hleikhô hmo hropa chalei n’awpa ta deikua a phusa hneipa ta avaw khichao thai khao vei.

            Krisma noh cha noh 3 ngâlâh vaw byuh ha bâ ta, Nôhrâpa cha a saw nah chysia chalei awpa ta ano dei pua mawh la avaw su tlamaw leipa ei sala tahpa nata âmo achhi mawh la ama khotlâpa vaw hluh sala chalei n’awpa y tlôh leipa ta khiliah râpâh a maohphyupa ta eima y tlamaw aw tahpa pachâpa ta a palôh cha lâlao ngaita kaw ta, achhâna liata cha kheihawhpa rai avaw châpa chhaota ei saw nah cha tlâ achhi lah vâ tahpa pachâna hnei ha ta, a saw nah chhao rai cha ama nô zi awpa ama khoh hapa vâta Bazar lâ cha ama pua haw.

     Chysiazy cha liahsa ama chalei khai tawhta o lâ a di awpa amâ chhua nota Nôhrâpa ngiarohna hawh tlaita Sôrili nata a nawta cha hawti hmo khopa zuana lia chata Sôrili ta Tâtâ nothlahpa nata a nawta Chapaw ta Mawtaw nothlahpa cha hmô ha heih ei ta, Sôrili deikua uthei viapa a châna hawhta Tâtâ nothlahpa cha a khoh kaw nota rei ngâh leipa ta, a palôh liata deikua chysia hlâta kho viana hnei ta, a nawta chapaw deikua palôhâh leipa cha bao hnaita Mawtaw nothlahpa cha khâchâ a haw hapa vâta Nôhrâpa ta hmo mâ cha daoh hneituhpa hnota hiahri ta, châhrasala a pachâna hlâta a mâ vaw ru kawpa vâta chalei va leipa ta a saw nah cha o lâ âdikhei syulyu haw.

          O ama tlô tawhta a sawchapawpa cha a palôh rai tlâh thei leipa ta cha ngâthlâh ha ta, utheipa Sôrili chhao cha chysia hlâta Maitanô Tâtâ nothlahpa a khoh via zie nata chysia cha a hnei leipa chhaota pei a tah lei zie a nô hnota a chho ha hra. Nôhrâpa cha a saw nah chô liata hiehâna nata ngiachhiena pahlaopa ta a palôruh rie a thei ngaita.

           Mohropa sawzy ama thapha zie a hmôpa chata a saw nah hmo khopa tao lei awpa cha ngiaryhna rai a hnei thei leipa vâta Krisma chhôhta âhmie ravopa nata vaw tlâzia lei pathlei ei sala a vaih n’awpa ta thohna chalei n’awpa châta a sopa chata a saw nah hmo khopa cha chalei va awpa ta ano deita ta pua ha ta, daoh hneituhpa hra tlawkha chhao a hmo zuapa cha panao khoh leipa ta Nôhrâpa Reizi hra a phusâ hneipa ta a khi heih leipa ta kheita ma ei tao sualuah vâ i tahpa pachâpa ta daoh tlyhmia liana chata reikah leipa ta cho â thlih hlâh haw.

             A phusâ hneipa ta â khi vei tawhta cha a saw nah ta ama khopa cheingei cha chaleipa thei leipa ta a mâ nao viapa chi cha chalei va ta, Krisma chhôhta âhmie chalei n’awpa deikua tlawkha hmahta hnei khao vei. O lâ a di ta, a saw nah cha a phata ta ama palôh patlâh ta, a saw nah chhao cha ama khopa cheingei hnei thei hra vei ei sala ama hnei hrahropa cha ama palôh a tlâh ngaita kaw.

            Krisma my noh cha vaw chhi ha ta, pati ama vaw niepa cha Âhrâ tihâ dei nie ei ta, a sawchanô utheipa Sôrili heih hrata a nô hnota ‘Ei Nâ yh, tamy dia ma Krisma my tlai sa zy eimâ hmie hra vei’ tahpa ta chho ta, a Nô ta hmo chhichâ ziezy avaw chhopasiapa cha palôhâh thai kawpa ta Sôrili chhao cha palôhtlâh kawpa ta pati cha nie hra ta, Krisma noh cha heihzy hawhta chysia mâ ru kawpa a tao thei hra vei ei sala heihzy hnota ama hmâh khoh thei ha hra.

       Nôhrâpa Reizi he a palôh liata lai chaipa cha HNABEISEINA he châ ta, Khazopa pahno kawpa a châpa vâta rairu kawpa ta khisatôtu padua hra sala a saw nah cha âhmie nata hmo hropa zuachhiapa ta papitlosa awpa achhuana khâchâ hnei ta, a saw nah chhao chyhsa phapa ta ama pua aw ngiathia aw tahpa khâchâ hnabeiseipa ta ahmo taopa liana chata ngâchhih ngaita kawpa nata Khazopa a saohiana chôta tao lymâ ta a saw nah chhao ama kaw pitloh tawhta cha a Nô hriapasa ziezy hmô thaipa ta achhuana sia kawpa hneipa ta Kô 10 hlei avaw sie tawhta cha a saw nah châthaipa ta hlaozy vaw hnei ei ta, olyu pha kawpazy paduapa ta thadâ kawpa ta khisatôtu cha ama padua thei ha hra.

         Nôhrâpa Reizi nata a saw nah tawhta a chhopasia khoh kawpa cha rairuna chi to avaw tlô no chhaota a to liata ryraotuh Khazopa liata alynabie khâ reih ta, ano lia a pahnieh ta, ngâ awpa nata hmo eima taopa lia palôh tlokhu piepa ta HNABEISEINA NOH CHHIPA hâna chôta hmo taopa lia heta hlaotlohna a y tyh tahpa he a sia kawpa ta maniah a chhopasia.

-LB.Thatlo,Saikao