LO THEILEI J.VIALUA (L)

He reikah he chyhsa ta J. Vialua moh châta ama bipa ma, J. Vialua ta ano nata ano â reina ma pahno pasia va na. Khâpa rai châ sala, he reikah he a do ta, â do via lymâ aw ta, â do zôzaw aw. He khizaw liata Mara chi nata pho â duah chhôh via cha, Marapazy palôh liata J. Vialua he lona noh za hnei beih aw vei!!

FC.Chhuasa

Ano chôchâh eima rei hlâta a pahrâna vaih, Meisavaih Siaha thâtih he achyhta vaw palâsa ei khoh ngaita kaw. Âmo he Siaha avaw pahrâ tuapa sahlaozy châ ei ta. He vaih heta Mara râh châta lôsôhpa a tlohphapa saw sa hluh kaw. Pachi Hlychho, J. Vialua (L), L. Beimokhai, A. Chhualai, Kalvary Hlychho, Damary P. Hlychho, J. Ruby, L. Khuly etc.. He hleikhô ta mohropa, thathina nata hmo hropazy vâta ama talent atyukhei thlâh hapzy chhao ama y hôlôpa ta ei pahno. J. Vialua he lytlâh miah a khôsai tua chaipa a châ vâta, atahmâ cha ano chôchâh deita eima za pahri-paziah chy aw.

“Ei sai tyh aw, tlâhpadâ lâ”, tahpa hla tawhta athaopa ta, kô 39 chhôh ta hla 300 hlei tlai vaw phi hmâ ta, a hla phipazy he chyhsa nano nanopazy ta sa tyh hra ei sala, ano ta a sa hluh chai. Kô 16 a châ nota hla phi pathao ta, ahla phipazy he kao nano nanopa lâ aheihpa za châ hra sala, Vâ-iana nata lôh-liena hla za châ sala â ngia. A hlaphi tua chaipa chhao Love Song châ ta, thyudyupa reikah hmahta châ thlâh ha hra sala, “Uhthei via ei châ”, tah ta a chhy palie ngâh rimâ awpa châ vei. A chaneina deita chhâ vaw moh tua ei sih la:

Chhôhso vâsâhna zydua,
Na pangâ awpa ta;
Pawmaih hry lia nâ ei châ tly,
Di hro rai vâ va na.

Khatlu ta Criticism lâta asâhpa nata athaipa hmah châ hra ei sala, he reikah he tidiah ta chakhiachakhâ n’awpa hmô ei sala pangiasa va na. Pachi Hlychho ta cha, “He hla aphituhpa hnie he a lai aw tahpa â pahnothei kaw," tahpa ta a reihpapua pâ ngâkaw.

He Mara satlia he ano pahnopasiapa ta cha, a reikah puapa rai nai thai vei tahpa eima pahno chyu aw. Hlaphithaipa châ awpa ta, pahmiesa thai tyh va na. Anodeikua, hla phi awpa ta a vaw pihpa rai tlao a vaw châ. Marapa chhi tawhta apuapa hry liata Mara reih aparyhpari thai chaipa, reihmachâpa nata thyutlia reikah pahlao-pahli thai chaipa, Mara reih angiana athaohpapua thai chaipa a châpa ta ei pahno. Râh kyhpachâna hla phi ta, a ngia kaw ta, Gospel lâ aheihpa phi ta chyhsa sy thei kaw ta, lôh-liena nata Love Song chhochhi cha ano akhotuh awpa he y mâh leipa ei ta; ama vaw y awpa chhaota Marapa chhi heta a sapapua mâh leipa a châ thlyu aw. J. Vialua he Mara reih dei châ leipa ta, reih hropa chhao a vaw thai hluh kaw thlyu aw. Thasia T. Azyu ta cha, “Reikah ahlâhlôpa a châpa hawhta Tlaikao reih, khichha reih, Hindi, Bengali nata Dumka reih taihta athaipa a châ," tahpa ta a reih. Mara reih a paryh-pari thaizie nata ngiazie he duah vaw moh tua ei suh u.

Dyhchâ khôphei na kiah no kha,
Bâh lia châ ngia ngâ’pa ei khoh;
A ryh thai khao vei nawhnai kei châ,
Vâ leipa hawh na khôsai chi,
Ei rohpady ei khiahlô nâ lie.

He tluta chhôhso beinôzy dyhchâ khôphei kiah awpa apasaih lei thaipa he ama za y rai ma?

Na mo ai lei nawhlyzy pi,
Hazo mokuhramâ na khaihna o lia;
Ei pâ a y thlyu aw tahta valâzoh pi,
Na hnazô hmô’pa rai y khao tlôh vâ,
Raithli chhao vaw kua pi!

Reih via awpa pahno va na. He hlabie heta ei hluhpi na chhei ha ta, eina pazei chanei via heih chy thlyu aw. Chhôhkha pawhrâhpa ta a paryu hapazy tovyuh cha he hla châh kha deita chhao heta a chhopasia khai. Khizaw liata reih ngia chaipa ta ama rei tyhpa French reih ta palie awpa pasaih leipa na ta, reih hneirôh chaipa English chhaota pasaih hlei hra va na.

A ngie raolao laih na châvâ nopi,
Thlihua nai zualua nah sâh thai vawtozy;
Tuhpi thosôh pawti zyh ei,
Azaw thai sa tlâh to suto sai ta;
Hryh lai’pa ei khoh.

Yzia n’awpa pahnothai khao leina taihta palôliena ahneipa hluhpi ama za y tyh thlyu aw. Haleluia Paw tluta reihpasia thaipa he English Poets-zy hry liata chhao ama za hluh rai ma?

Rev. NC. Vabeilua ta cha J. Vialua kha, “Nationalist, Social Reformer, Poet, Composer, Naturalist," a za châ tahpa ta a roh. He he liahsa ta ta a hla nata bie â chu khai tawhta a reipa châ ta, â do hra aw. He he thyutliazy chhaota ama vaw hmôpasia kawpa a châ thlyu aw. A ri y noh kha khizaw su nano nanopa liata taokheina daihti, chhôhso keichheihna chôta ama za hmâh hôlô hra tahpa eima pahno. 

Marasaw, a thinoh nata ri y noh cheingei ta he hawhta daihti ziehpa su hrolâ ta ama za hmâkhei ngâpa he za y sala pangiasa va na.

A pôraoh, a hnazô nata lôhpi phaona liata Mara satlia kha, tlaichhaituhpa hnei hluh ta, apasaih leipa hluh ei ta, ngiabâh ngaitapa a hnei hluh.

A thinoh kha a ri za kiah hra na ta. Zawpi hluh kaw ei ta, pawpi ri hluh ta, nôpaw amâ ki. Politician y ei ta, Pastor-zy hmia hmô ei na ta, Media nah bua ei ta; NGO’s, Artiste, Officer nata Driver, keimozy hawhpa Laymen-zy taih chhaota. Thyutlia deikua eima chyh kaw. Khâpa lôhpi ma eima phaoh tly pahno va na. Daihti kaw sie lymâ awpa liata kha noh ta a ri ama kia lei vâta thyutlia hluhpi angiapachhipa za y chili ei sala pangiasa na ta, ama vaw y hapa chhaota ei no âh aw vei. He rachhôh nona heta America liata Michael Jackson cha thi hra ta. America State nano nanopa tawh hleikhô ta, khizaw su nano nanopa tawhta thyutlia sâh hluhpizy ta ri kia awpa ta America amâ ngai chhichhu. Cha nota, Siaha thyutliazy deikuala Meisavaih ngai hoh ma pi.

J. Vialua-zy hawhpa he a leilô hnohta achyhta piepa châ tyh ta, atotuhpa chi nata pho cha chi nata pho vâhneipa ama châ tyh. Chhâ (generation) to lia maih ta piepa châ heih leipa ta, a châh via chhieta ta amâ vaw lâ tyh. Marasawzy hnohta khati ta ma J. Vialua hawhpa he piepa eima châ heih aw vâ tly? Eima Politician zy, Pastor nata Officer zy he la lytlâh miah ama vaw khôsai hapa chhaota athlatuh awpa thyutlia zawzie ama y. J. Vialua deikuala a thla thai’pa châ vei. Ano vyuhpa rao thai’pa châ leipa ta, atlyh thai’pa châ hra vei.

Châbu rotuhpa nata hlaphithaipazy heta chi nata pho he ama papôhkhasa thei chai tyh. A pa-eipachhia khohpa nama y tlyma? Politics liata pachâ dâhzy â nano tyhpa vâta py hluhpi ta y ha pi ta, awnanopa lia chhao eima maluh nata â phu leipa ta py eima hluh. J. Vialua zy ta cha he sahlao zydua he miah sypahmaoh khai ha ei ta, râh-ri chaphie khai ha ei ta, International Boundary chaphiepa ta khizaw su to liata Mara sawzy lôh miakha miah ama paphaosa tyh. Haleluia Paw cha bôzyu lytlâh miah khôsai ha hra sala, a hlazy ta chi nata pho papôhsana rai he ama hria lymâ aw.

Viahpa Kalâ tlaikao chariah miah dyuh ei,
Marasawzy vaw thyu bâ teh u;
Hy â hra t’u Mara thyutliazy,
Aolainô Meithei a chaba ta;

Hy Mara thyutlia sawzy vaw thyu bâ teh u.

KH. Beithie ta cha, “Marapa râh tha a pasa tu hapa vâta Gandhiji palôh phaoh thei khao leipa ta, Subhas Chandra Bose palôh aphaohpa…," tahpa ta J. Vialua he a reih. Ei thei ngâthlâh ha. My kha cha Bazar lâ pua na ta, thopi daoh miakha liata vâ ngia na ta, ano chhao cha a zâ ngia hra ta, ei hmiata liata a a vaw tyuh ta. Eima râh nôpawpazy ryureina dâh liata a palôh a pasa zie thata eina pahripaziah thlu. Ahy ma ei châ na pahno sala pangiasa va na. Râh chôchâh he parikhei ta a hrukhei.

Khâpa kô liata ma tahpa ei vaw palâlao ngâ nota, Pihnô K. Pari châropa tawhta 2009 a châ tahpa ei vaw sia ha heih. Peirâh ngaipa ta lytlâh miah a khôsai kô cheingei khaw. Lyuva Khutla Siaha tlyliah liata hmâna daihti liata thata lâh chaimâ ta, hla pathao ta, seih ki chakhyh ta, a châhta a seih ki cha soh ta, a bâh pazawhpa ta chô pahmôpi hawhta a pahiehpahâ ta. He noh liata a thapawh chaipa nata a ly chaipa a châ. Daihti rei chhao sie hmâ vei, 29th June 2009 liata cha a thina bie ta Marasawzy yna khizaw zydua a a vaw khaipahlie thlâh haw. Tlai chuh, Khaihra Choza nata L. Pakhô zy chhaota Peirâh liata tlâ vaw hmâhpazao via lah vâ ei!

Thyutliazy ta a hlaphipazy he sa khoh kaw tyh ei ta. Ataopasuana nata zawpi apôhpakhynazy liata ama sa tyh. Cha sahlaozy chata J. Vialua ta miah a losai patoh tu hapa vâsâhna lyubie deita ei n’aw hlâ ei. Ama ao pha vei, thai veih ei ei tahna châ tiarâh vei; eina pavâsa via tyh ei, ei tahna tlao a châ. Atakô kô 2013 Lyuva Khutla lia chhao khata vaw vâ ngaita kaw heih na ta, a ru lâta ei y a vaw ru ngaita kaw. Lo thai lei J. Vialua, na lo patoh kaw tlôh dia!!

A thi no khata ano pasai leina bietana (message) a khohpa maih ro awpa tah ei ta (kha message kha a bu ta tao awpa hawhta reina y ta, atahmâ khataih lia za y aw vâ tly?). Cha liana cha lô-eih kawpa ta, "Father of Mara Love Song tahpa Title ei cha hlâ," tahpa ta ei roh hra khaw.

Chhôhkha sanawh-rinô châ leipa, khôtho lâ tawhta a hmiatua chaipa châ awpa ta (?) 2012 liana khata College Vaih MTP thâtihbu, Siaramo chhôhkhazy ta a thlâ, Meisatlâh thlâsu liatahpa cha za tly ei ta, he ama hmotaopa he thyutliazy ta ama taopazao lymâ nahta hnabeiseih na ta, ei ngiapâ. A khizaw sapa vaw lo ha hra sala, a hla nata biezy deikua lona noh hnei beih aw vei.

Khâpa lôhpi ma phaoh chi ta, he tlupo ta na chi nata pho ta cha tlaichhai pi ta, châ bôchhâ pi ta, châ palaikhei pi ta, eima pasaih lei thlâ bao nahta, sihnôh kua khao lei awpa ta miah na khôsai thlâh ha tly? Nâ palai thai ei cha t’aw ma, cha sôna nâ tao thai tlao ei cha tah hri vâ tly? Khâpa rai châ sala, Literature khizaw liata pho rônah chaipazy hmiakô lia chhaota zakheichhih lei awpa hla 300 hlei tlai miah na siesaipa vâta Mara chi nata pho moh ta alynabie ei cha hlâ. Eima châ ly ngaita kaw!

-FC.Chhuasa
College Vaih, Siaha.