MTP VS KTP

Biehmia:

He Article he, MTP Branch, Chheihlu Souvenir liata papua awpa ta ei ropa châ ta, a vaw rei pâ ha. Ama papua thei khao lei vâta, Published khao hlei hra va na. Duah reih chakhyh tua ei si.

HC Malsawmthanga

Mara Thyutlia Py (MTP)

Puhpa Valua Hlychho (R.I.P) nata a viasazy ta kô 1954 pa liata vaw padua ei ta, kô 63 a tloh haw. Py paduana chhâpa hluhpi ama hnei, peimawh leipa y tlâ vei. Mara chi nata pho pabohsa ei ta, chei-ô nata reih palaiseihsa ei ta, hmiahaopazy tawhta a chhâh ama châ. Literature kiahthy n’awpa ta pachâna hmâh ei ta, hmah ama la.

Khizaw liata Marasaw nata Mararâh cha cheihchalo via lymâ ei ta, eima hmia pakaituhpa nata eima thlalôhna chaipa ama châ. Eima vyuhpa ta apopa chatôh ei ta, rairuna maniah ama pathlâpa. Eima thlâ chhiah ei ta, maniah chakuhchavei ei ta, paleih ta phuah thai leipa thlahlôhna cha hmotaopa ta ama palâsa tyh.

Chiehleipazy bao ta, deichhyna lia hmaohkha ta

He he MTP py biepipa (Motto) a châ. Special Assembly liata he py biepipa he thla awpa ta ama pathlu haw tahpa ei thei no kha ei paryhsa lei kaw! Keima mopakha paryhsa leipa la phahnai tlai hra vei. Veihseihpa py zachhihpa biepipa châta he biepipa he â hmie chai tah na ta, thlah palôh chai ta, ama hmotao tyhpa nahta â ryh chai hra.

Laki Conference lâ kha sie hra na ta, a ru lâta ei buakhei chaipa nata Campaign chaipa cha he py biepipa thla achhuahna hlaotloh lei awpa kha a châ. Election ta ei pachâna pabua leipa ta, Miss Contest ta ei pathipalôh hryh hra vei. Ryureih thei awpa châ leipa na ta, Vote pathla thei awpa châ hra va na. Ei siena chhâpa a hlaotloh haw. Keima vâta a hlaotloh ha tah leipa na ta, anodeikua ei chhuahna a hlaotloh ta, thapawh kawpa ta Siaha ei kaw pangai.

Mo to heta deichhy angiah pi ta, baokhâ eimâ ngiah chyu. Eimâ ngiahna daihti â lyu lei vâ nata eimâ ngiahna kao â nano vâ dei tlâ a châ. Akhohtlâh kaw awpa y leipa pi ta, MTP mopakhô ta kuphei thuah ngâkaw awpa y hra ma pi. Eima hro noh daihti liata vâhneina ta maniah a khokhei patluapa vâta MTP he mopakhô a naosia kaw thei. Eima chhâna noh lia deikua MTP ta maniah patyupadua aw ta, maniah pasopanô aw ei ta, eimâ phuh leipa palyupalihna maniah ama hlâ aw. He cheingei he la ahy hmahta akhôkhâh chachei aw ma pi; MTP he la za â vaw chhih tlai na tah t’u?

Mo pakha ta achyhta dâhdei eima tao theipa kha, zawpi ta tôhpi eima vaw phia ha nahta cha hmo hluhpi eima vaw tao thei ha tyh. He vâ heta MTP ta a taopa cha za achhih ta, chi achhih ta, thlahlôh â chhih. Ama hmotaopa chakachalyu ngâkaw awpa châ leipa ta, adyuh ngâkaw hra awpa châ v’ei. Eima taochhei pathlei aw.

Krizyhpa Thyutlia Py (KTP)

Kô 1947 ta padua ei ta, Puhpa H. Zacho (R.I.P) nata viasazy ta ama paduapa a châ. Py padua tua no cha ‘Satlia akaona-laihsa akaona (SK-LK)’ tahpa a châ. Awnanopa kuphei châ awpa nata Awnanopa sahlaozy châta byhnâ châ awpa ta paduapa a châ. Thyutliapa nata hawtizy thlahpa hro lâthlôh dopa liata eimâ chhih thei n’awpa ta chakaona rai rônah ngaitapa ama vaw hria lymâ.

Thlahpa lâ kyh liata thyutliapazy chakuhchaveituh chaipa châ ta, lâthlôh khochhihpa pahmô ta, cha-aotuhpa a châ. Hro lâthlôh chhutla chakhâ kawpa liata hro thlalôhna maniah pahneisa ta, pachhana lâthlôh  lâ maniah chhihthatuhpa py rônah ngaitapa a châ.

Krista vyuhpa ta lyuhchâpa

He alei liata Zisu Krista vyuhpa ta pachhana chakaona rai rônah ngaitapa hria awpa he, he py aduana chhâpa nata biepipa a châ. Py biepipa he pha ta, a rônah ngaita kaw. Thyutlia sâh hluhpi leidiana lâthlôh achhih haipazy hrona lâthlôh lâta achhi awpa ta Krista vyuhpa ta lyuhchâna rai ahriapa eima châ.

MTP vs KTP

Noh kha cha biechhotuh rônahpa DL. Moody he bie miakha hiahri ei ta, “Ngiapâtuhpa nohto hro liata thlahchhâna ma peimawh via ma, Biehrai reipa maw?,” tahpa ta. DL. Moody chata, “Avâ liata azaw haipa Pahmôhpi khi sai u la, a mathlaw chavei lâtahpa ma peimawh via ma, chachâh lâtahpa maw?,” tahpa ta hiahri palie ei ta, hiahrituhpazy chata, “Biechhotuhpa y, ama peimawhna phie â lyu,” tahpa ta achhy ei ta.

Yh, he hawh tlai heta thyutliapazy ta MTP nata KTP châta eima chakaona he a peimawhna phie â lyu. Sapa nata thlahpa he pachhaih achhuah tyh pi ta, hiakha lâ pachâ peimawh viapa ta tliah via eimâ chhuah tyh. Pakhâta ta eima pachâ pasia khiahta la, “He tlai he na peimawh via,” tah awpa vaw y hlei vei.

Chyhsazy he eima pachâ peimawh viapa nata kho viapa, apaoh viapa nata saihei viapazy a lyu leipa ta, thapasa viapa nata asaomâ viana kao chhao a kho hra vei. Eima peimawh viana kao y ta, eima duty n’awpa su raopa eihpa a y khai hra. Eima duty su nata peimawhna kao liata thapiphia via awpa tlâ eima vaw châ. He vâ heta chakaona kao hropazy peimawh lei via hawhta pachâna a vaw pih tyh. He he hmo pha leipa a châ.

Ngiapâtuhpa eimâ tah leihkâ vâta MTP chakaona peimawh lei viapa hawhta pachâna ahneipa eima hluh kawpa ta ei pahno tyh. MTP liata pahâh viapa nata thapi aphia viapazy cha ngiapâna kyh liata hnôhkhaw viapa hawhta pachâna taihta ahneipa eima y tyh khiah ma ei tah; he pachâna he ei hao kaw!

Sapa nata thlahpa kyh achakuchaveina he a siepakaoh vei khiahta la eima khihtlâh nata râh he sie thai aw vei. MTP a thatlô vei khiahta la Awnanopa a sipasa via aw ta, tlâ â tymâ via hra aw. KTP nata Awnanopa mokhaoh tawhta chakaona rai hria thai âh leipazy kha MTP ta kyhpachâna chôta ama hria. KTP ta moleipa pha n’awpa ta thlahchhâna chôta deichhy ei ta, MTP ta khihtlâh hro thlalôh thei n’awpa ta moleipazy cha ama chhorei a byuh. Eimâ chhuahpa ‘goal’ a lyu ta, eima chakaona dâh ‘policy’ deikua â nano.

Nô nata paw hluhpizy chhao eima palôh phaozie eima thla a peimawh. KTP hmotaopa liata eima sawzy pasaipa-i pi ta, pathliepathlaw pi ta, eima chati tyh. A pha, a ly â chhih. Anodeikua, MTP hmotao daihti lia deikua eima sawzy cha moleina hmo tao h’awpa hawhta ma eima pachâ bao ma, pakhâ thlâh hapa eima y tyh. Pha vei, a pei kaw!

Khizaw moleina he a sâh ngaita bâ ta, thyutliapazy ta moleina lâthlôh achhih awpa ta nô nata pawzy dôvei n’awpa lâpi sinôpa ama pahno kaw bâ. KTP siepahliepa ta nô nata pawzy phie dôvei ta, moleina lâthlôh achhih hapa ama hluh kaw. Chavâta, nô nata pawzy ta eima pahno chanei awpa peimawh kawpa cha, KTP liata eima sawzy amâ hmâ kawpa vâta moleina tawhta aboh via pachai leipa ei ta, MTP liata amâ hmâ hluh kawpa vâta moleina lâthlôh a hnia via hlei veih ei, tahpa hi.

Zisu Krista policy nata programme kha l’y ‘key’ alyu leipa ta eima siekhei. Eima siekheina ‘key’ chyu liata phahnai angiah ta, tôhpi phia awpa tlâ eima vaw châ.

KTP Programme liata ahlao awpa ta nô nata pawzy hiapa ngâkaw byuh tlâ hlei leipa pi ta, MTP Programme liata ahlao awpa ta deikua nô nata pawzy cha pakhâta ta hiapa awpa angiahpa ama y tyh. Thokha chhochhi la ama nô nata pawzy ta pasaih leipa taihta ama y. ‘A khizaw hro’ eima tah bao ma châ? Khizaw liata pahrâpa eima châ hih! Biehrai reizie ta kô 70-80 chhôh hroh awpa châ pi ta, eima hro chhôh liata ‘khizaw hro’ he mopakhô thei awpa châ ma pi. Eima khizaw hro â thlâzi vei khiahta la naw, chhôhkha, khihtlâh, Awnanopa hrozy a thlâzi thai hr’aw vei. He he sia tua ei suh u.

MTP, MSO nata MCHP Conference-zy khichhai ama tlô chyh kaw tyhpa he pei ei tah kaw tyh. Eima chi nata pho pabohsa ta riahvaina kyh liata eima diathlâzie nata pachâ peimawh leizie a palâsa ei tah tyh. He vâ heta viasa a hluh theina hawhta hrua tyh ei na ta, ei Campaign tyh ei!

He khizaw adyuhna pathaihpa tlyliah lia heta adisaona thlihpipa he ru ngaita ta, chi nata pho chynawh viapa hluhpi cha chanaohpa ta ama y tyh. Marasawzy chhao thata maniah chanaoh ei ta, maniah dôh ei ta, maniah amâ chadai hai hih. Keimo Marasaw chhochhi la eima ‘dadieh’ pachai khiah ma ei tah tyh.

Marasaw chanô ta pho hropa vahpa hnei ta, a sawzy cha reipâ y veih ei (a tlâhpipa ta), a vahpa reih amâ hly. Marasaw chapaw ta pho hropa lahpinô hnei ta, pachâ chhie eimâ chhih ha heih pyly! Pho hropazy ta eima râh kaw pangai ei ta, eima râh lia chati kôsy khihsa ei ta, ama reih nata culture siesai cha rei lei, râh tlao ama pakawh. Keimo deikua râh hropa liata eima laiseih khiahta cha eima riarô pahlei patoh kaw pi ta, eima reih nata culture ta maniah â râsai patoh kaw. Eima râh chhôh lia dâhdei hmahta pho hropazy opa hnei hluhpa cha eima reih hlâta pho hropazy reih eimâ paoh via thlâh ha hi, eima dadieh tlai my!

Ngiapâtuhpa châ pi ta, krizyhpa râh eima châ. Biehrai liata Khazohpa ta pho â tlypa Izarei sawzy a chhihthana dâh he achupasia via tua ei suh u. Atahmâhlâ reihkah ta Izarei sawzy he khizaw liata ‘feeling’ chaipa ama châ ngyu aw! Khazohpa ta, “nama feeling kaw, moleina a châ,” a tah leipa a châ ngyu aw!

Eima chi nata pho abohna kyh he KTP chakaona tawhta cha tôhpiphia ngâkaw â ngia khai leina kao a y ngyu thei aw. MTP kawpa ta KTP Member chhao rai a daihti nata su liata cha tôhpiphia chyu ei suh u. KTP Member cha MTP Member châ pi ta, MTP Member pyly kha na KTP Member tlâ châ pyly pi!

KTP ta apakhy ei sala, MTP ta vaih chakichabazy hryhpa ta moleina amâ dyuh aw. MTP ta thlâ chao aw ei ta, KTP ta thopi ama pa-eih aw. MTP ta khihtlâh hro thlalôh kawpa ry liata eima chareipalao thei n’awpa ta azovâ ta achakichaba nata chavah-chahaoh hryh aw ei ta, KTP ta lyuhchâna rai hriapa ta azovâ chakaona rai hria aw ei ta, achhyna o nata râhzohpa su liazy thlah ama chhâ aw. KTP ta hro taopathi n’awpa ta thlahchhâna ta chakao aw ei ta, MTP ta hro taopathi n’awpa ta tharôhpa ta ama chhorei aw. MTP ta khizaw liata Marasawzy eimâ boh lymâ thei n’awpa ta ‘a khizaw kawpa ta’ tei aw ei ta, KTP zy ta Khazohpa thatlôna angâchhâna chôta ‘a thlah kawpa ta’ eimâ boh lymâ thei n’awpa ta ama tei lymâ hra aw.

Bie pachhâna

MTP nata KTP zy, Mara reih nata Culture pabohsana kyh liata tiama via chyu tua ei suh u. Nehemiah kha ‘feeling’ kaw lei mawh sala Jerusalem ku kha ama padua thei vâ ma, ei tah tyh. A sapa nata thlah kawpa ta eimâ boh thei n’awpa nata aduapapua n’awpa kao eima tei â ngiah. Chipho hropazy chhao ama tei chyu. A chhâpa cha Awnanopa he râh pakawhna chhaichhi tiah kawpa a châ tahpa pahno pasia ei ta, ryhpaohna ta ama hmâh. Keimo Marasawzy chhao a sia viapa ta he chôchâh he hmô bâ ei suh u.

Tlâ vaw tah hr’aw sala, châ eimâ chu no khata Mizo nata Hmar nahzy la ama reih ta apakhyna service su ahla katô ha hra sala ama pangai lyhlia thlâh ha tyh. Keimo deikua a rainao viapa sai tlua pi ta, â hnia viapa sai moh pi ta, pho hropazy ta veih-lâ ta maniah ama sydiena lia khata eima pihpathi hmâ kaw tyh. Mara reih service liata apakhy leipa eima hluh kaw tyh. He zydua taih he l’y Mara reih nata culture pabohsa n’awpa kyh liata peimawh ha bâ.

Khazia ma reih pabohsana nata chi nata pho pabohsana chôchâh he eima rei hoh kaw? Maniah nama ai kaw bâ thei aw. Thokha chhochhi la na chhyhthai heih aw veih ei, ei pahno chhielie. Châhrasala, rei via lymâ peimawh ta, pabohsa via lymâ eimâ ngiah. Apahra via lymâ peimawh ta, tha apatlô via lymâ eimâ ngiah. A chhâpa la eima duasu na a boh vei.

Eima râh, reih nata chei-ôzy he MTP nata KTP zy ta pabohsapa ta, palaiseihsa lymâ ei s'u.

-HC.Malsawmthanga.
College Vaih,Siaha.